Ifisiyoṅ 6

bacchoṅ aur vālidain kā tālluq

¹baccho, ḵẖudāvand meṅ apne māṅ-bāp ke tābe raheṅ, kyūṅki yahī rāstbāzī kā taqāzā hai. ²kalām-e-muqaddas meṅ likhā hai, “apne bāp aur apnī māṅ kī izzat karnā.” yah pahalā hukm hai jis ke sāth ek vādā bhī kiyā gayā hai, ³“phir tū ḵẖushhāl aur zamīn par der tak jītā rahegā.”

⁴ai vālido, apne bacchoṅ se aisā sulūk mat kareṅ ki vah ġusse ho jāeṅ balki unheṅ ḵẖudāvand kī taraf se tarbiyat aur hidāyat de kar pāleṅ.

ġulām aur mālik

⁵ġulāmo, ḍarte aur kāṁpte hue apne insānī mālikoṅ ke tābe raheṅ. ḵẖulūsdilī se un kī ḵẖidmat yūṅ kareṅ jaise masīh kī. ⁶na sirf un ke sāmne hī aur unheṅ ḵẖush rakhne ke liye ḵẖidmat kareṅ balki masīh ke ġulāmoṅ kī haisiyat se jo pūrī lagan se allāh kī marzī pūrī karnā chāhate haiṅ. ⁷ḵẖushī se ḵẖidmat kareṅ, is tarah jaisā ki āp na sirf insānoṅ kī balki ḵẖudāvand kī ḵẖidmat kar rahe hoṅ. ⁸āp to jānte haiṅ ki jo bhī acchhā kām ham ne kiyā us kā ajr ḵẖudāvand degā, ḵẖwāh ham ġulām hoṅ yā āzād. ⁹aur māliko, āp bhī apne ġulāmoṅ se aisā hī sulūk kareṅ. unheṅ dhamkiyāṅ na deṅ. āp ko to mālūm hai ki āsmān par āp kā bhī mālik hai aur ki vah jānibdār nahīṅ hotā.

ruhānī zirābaktar

¹⁰ek āḵẖirī bāt, ḵẖudāvand aur us kī zabardast quvvat meṅ tāqatvar ban jāeṅ. ¹¹allāh kā pūrā zirābaktar pahan leṅ tāki iblīs kī chāloṅ kā sāmnā kar sakeṅ. ¹²kyūṅki hamārī jaṅg insān ke sāth nahīṅ hai balki hukmarānoṅ aur iḵẖtiyār vāloṅ ke sāth, is tārīk duniyā ke hākimoṅ ke sāth aur āsmānī duniyā kī shaitānī kuvvatoṅ ke sāth hai. ¹³chunāṅche allāh kā pūrā zirābaktar pahan leṅ tāki āp musībat ke din iblīs ke hamloṅ kā sāmnā kar sakeṅ balki sab kuchh sar’anjām dene ke bād qāim rah sakeṅ.

¹⁴ab yūṅ khaṛe ho jāeṅ ki āp kī kamar meṅ sacchāī kā paṭkā baṅdhā huā ho, āp ke sīne par rāstbāzī kā sīnāband lagā ho ¹⁵aur āp ke pāoṅ meṅ aise jūte hoṅ jo sulah-salāmatī kī ḵẖushḵẖabarī sunāne ke liye tayyār raheṅ. ¹⁶is ke ilāvā īmān kī ḍhāl bhī uṭhāe rakheṅ, kyūṅki is se āp iblīs ke jalte hue tīr bujhā sakte haiṅ. ¹⁷apne sar par najāt kā ḵẖod pahan kar hāth meṅ rūh kī talvār jo allāh kā kalām hai thāme rakheṅ. ¹⁸aur har mauqe par rūh meṅ har tarah kī duā aur minnat karte raheṅ. jāgte aur sābitqadmī se tamām muqaddasīn ke liye duā karte raheṅ. ¹⁹mere liye bhī duā kareṅ ki jab bhī maiṅ apnā muṅh kholūṅ allāh mujhe aise alfāz atā kare ki pūrī dilerī se us kī ḵẖushḵẖabarī kā rāz sunā sakūṅ. ²⁰kyūṅki maiṅ isī paiġām kī ḵẖātir qaidī, hāṅ zanjīroṅ meṅ jakṛā huā masīh kā elchī hūṅ. duā kareṅ ki maiṅ masīh meṅ utnī dilerī se yah paiġām sunāūṅ jitnā mujhe karnā chāhie.

āḵẖirī salām

²¹āp mere hāl aur kām ke bāre meṅ bhī jānnā chāheṅge. ḵẖudāvand meṅ hamārā azīz bhāī aur vafādār ḵẖādim tuḵẖikus āp ko yah sab kuchh batā degā. ²²maiṅ ne use isī liye āp ke pās bhej diyā ki āp ko hamāre hāl kā patā chale aur āp ko tasallī mile.

²³ḵẖudā bāp aur ḵẖudāvand īsā masīh āp bhāiyoṅ ko salāmatī aur īmān ke sāth muhabbat atā kareṅ. ²⁴allāh kā fazl un sab ke sāth ho jo anmiṭ muhabbat ke sāth hamāre ḵẖudāvand īsā masīh ko piyār karte haiṅ.