Ifisiyoṅ 5

raushnī meṅ zindagī guzārnā

¹chūṅki āp allāh ke piyāre bacche haiṅ is liye us ke namūne par chaleṅ. ²muhabbat kī rūh meṅ zindagī yūṅ guzāreṅ jaise masīh ne guzārī. kyūṅki us ne ham se muhabbat rakh kar apne āp ko hamāre liye allāh ke huzūr qurbān kar diyā aur yūṅ aisī qurbānī ban gayā jis kī ḵẖushbū allāh ko pasand āī.

³āp ke darmiyān zinākārī, har tarah kī nāpākī yā lālach kā zikr tak na ho, kyūṅki yah allāh ke muqaddasīn ke liye munāsib nahīṅ hai. ⁴isī tarah sharmanāk, ahamaqānā yā gandī bāteṅ bhī ṭhīk nahīṅ. in kī jagah shukrguzārī honī chāhie. ⁵kyūṅki yaqīn jāneṅ ki zinākār, nāpāk yā lālchī masīh aur allāh kī bādshāhī meṅ mīrās nahīṅ pāeṅge (lālach to ek qism kī butparastī hai).

⁶koī āp ko bemānī alfāz se dhokā na de. aisī hī bātoṅ kī vajah se allāh kā ġazab un par jo nāframān haiṅ nāzil hotā hai. ⁷chunāṅche un meṅ sharīk na ho jāeṅ jo yah karte haiṅ. ⁸kyūṅki pahale āp tārīkī the, lekin ab āp ḵẖudāvand meṅ raushnī haiṅ. raushnī ke farzand kī tarah zindagī guzāreṅ, ⁹kyūṅki raushnī kā phal har tarah kī bhalāī, rāstbāzī aur sacchāī hai. ¹⁰aur mālūm karte raheṅ ki ḵẖudāvand ko kyā kuchh pasand hai. ¹¹tārīkī ke bephal kāmoṅ meṅ hissā na leṅ balki unheṅ raushnī meṅ lāeṅ. ¹²kyūṅki jo kuchh yah log poshīdgī meṅ karte haiṅ us kā zikr karnā bhī sharm kī bāt hai. ¹³lekin sab kuchh beniqāb ho jātā hai jab use raushnī meṅ lāyā jātā hai. ¹⁴kyūṅki jo raushnī meṅ lāyā jātā hai vah raushan ho jātā hai. is liye kahā jātā hai,

“ai sone vāle, jāg uṭh!

murdoṅ meṅ se jī uṭh,

to masīh tujh par chamkegā.”

¹⁵chunāṅche baṛī ehatiyāt se is par dhyān deṅ ki āp zindagī kis tarah guzārte haiṅ - besamajh yā samajhdār logoṅ kī tarah. ¹⁶har mauqe se pūrā fāidā uṭhāeṅ, kyūṅki din bure haiṅ. ¹⁷is liye ahamaq na baneṅ balki ḵẖudāvand kī marzī ko samjheṅ.

¹⁸sharāb meṅ matwāle na ho jāeṅ, kyūṅki is kā anjām ayyāshī hai. is ke bajāy rūh-ul-quds se māmūr hote jāeṅ. ¹⁹zabūroṅ, hamd-o-sanā aur ruhānī gītoṅ se ek dūsre kī hausalāafzāī kareṅ. apne diloṅ meṅ ḵẖudāvand ke liye gīt gāeṅ aur naġamāsarāī kareṅ. ²⁰hāṅ, har vaqt hamāre ḵẖudāvand īsā masīh ke nām meṅ har chīz ke liye shukr kareṅ.

miyāṅ-bīvī kā tālluq

²¹masīh ke ḵẖauf meṅ ek dūsre ke tābe raheṅ. ²²bīviyo, jis tarah āp ḵẖudāvand ke tābe haiṅ usī tarah apne shauhar ke tābe bhī raheṅ. ²³kyūṅki shauhar vaise hī apnī bīvī kā sar hai jaise masīh apnī jamāat kā. hāṅ, jamāat masīh kā badan hai jise us ne najāt dī hai. ²⁴ab jis tarah jamāat masīh ke tābe hai usī tarah bīviyāṅ bhī apne shauharoṅ ke tābe raheṅ.

²⁵shauharo, apnī bīviyoṅ se muhabbat rakheṅ, bilkul usī tarah jis tarah masīh ne apnī jamāat se muhabbat rakh kar apne āp ko us ke liye qurbān kiyā ²⁶tāki use allāh ke liye maḵẖsūs-o-muqaddas kare. us ne use kalām-e-pāk se dho kar pāk-sāf kar diyā ²⁷tāki apne āp ko ek aisī jamāat pesh kare jo jalālī, muqaddas aur beilzām ho, jis meṅ na koī dāġ ho, na koī jhurrī, na kisī aur qism kā nuqs. ²⁸shauharoṅ kā farz hai ki vah apnī bīviyoṅ se aisī hī muhabbat rakheṅ. hāṅ, vah un se vaisī muhabbat rakheṅ jaisī apne jism se rakhte haiṅ. kyūṅki jo apnī bīvī se muhabbat rakhtā hai vah apne āp se hī muhabbat rakhtā hai. ²⁹āḵẖir koī bhī apne jism se nafrat nahīṅ kartā balki use ḵẖurāk muhayyā kartā aur pāltā hai. masīh bhī apnī jamāat ke liye yahī kuchh kartā hai. ³⁰kyūṅki ham us ke badan ke āzā haiṅ. ³¹kalām-e-muqaddas meṅ bhī likhā hai, “is liye mard apne māṅ-bāp ko chhoṛ kar apnī bīvī ke sāth paivast ho jātā hai. vah donoṅ ek ho jāte haiṅ.” ³²yah rāz bahut gaharā hai. maiṅ to us kā itlāq masīh aur us kī jamāat par kartā hūṅ. ³³lekin is kā itlāq āp par bhī hai. har shauhar apnī bīvī se is tarah muhabbat rakhe jis tarah vah apne āp se rakhtā hai. aur har bīvī apne shauhar kī izzat kare.