Ifisiyoṅ 4

badan kī yagāṅgat

¹chunāṅche maiṅ jo ḵẖudāvand meṅ qaidī hūṅ āp ko tākīd kartā hūṅ ki us zindagī ke mutābiq chaleṅ jis ke liye ḵẖudā ne āp ko bulāyā hai. ²har vaqt halīm aur narmdil raheṅ, sabr se kām leṅ aur ek dūsre se muhabbat rakh kar use bardāsht kareṅ. ³sulah-salāmatī ke baṅdhan meṅ rah kar rūh kī yagāṅgat qāim rakhne kī pūrī koshish kareṅ. ⁴ek hī badan aur ek hī rūh hai. yūṅ āp ko bhī ek hī ummīd ke liye bulāyā gayā. ⁵ek ḵẖudāvand, ek īmān, ek baptismā hai. ⁶ek ḵẖudā hai, jo sab kā vāhid bāp hai. vah sab kā mālik hai, sab ke zarīe kām kartā hai aur sab meṅ maujūd hai.

⁷ab ham sab ko allāh kā fazl baḵẖshā gayā. lekin masīh har ek ko muḵẖtalif paimāne se yah fazl atā kartā hai. ⁸is liye kalām-e-muqaddas farmātā hai, “us ne bulandī par chaṛh kar qaidiyoṅ kā hujūm giriftār kar liyā aur ādmiyoṅ ko tuhfe die.” ⁹ab ġaur kareṅ ki chaṛhne kā zikr kiyā gayā hai. is kā matlab hai ki pahale vah zamīn kī gaharāiyoṅ meṅ utrā. ¹⁰jo utrā vah vahī hai jo tamām āsmānoṅ se ūṅchā chaṛh gayā tāki tamām kāināt ko apne āp se māmūr kare. ¹¹usī ne apnī jamāat ko tarah tarah ke ḵẖādimoṅ se navāzā. bāz rasūl, bāz nabī, bāz mubashshir, bāz charvāhe aur bāz ustād haiṅ. ¹²in kā maqsad yah hai ki muqaddasīn ko ḵẖidmat karne ke liye tayyār kiyā jāe aur yūṅ masīh ke badan kī tāmīr-o-taraqqī ho jāe. ¹³is tarīqe se ham sab īmān aur allāh ke farzand kī pahachān meṅ ek ho kar bāliġ ho jāeṅge, aur ham mil kar masīh kī māmūrī aur balūġat ko mun’akis kareṅge. ¹⁴phir ham bacche nahīṅ raheṅge, aur tālīm ke har ek jhoṅke se uchhalte phirte nahīṅ raheṅge jab log apnī chālākī aur dhokebāzī se hameṅ apne jāloṅ meṅ phaṅsāne kī koshish kareṅge. ¹⁵is ke bajāy ham muhabbat kī rūh meṅ sacchī bāt karke har lihāz se masīh kī taraf baṛhte jāeṅge jo hamārā sar hai. ¹⁶vahī nasoṅ ke zarīe pūre badan ke muḵẖtalif hissoṅ ko ek dūsre ke sāth joṛ kar muttahid kar detā hai. har hissā apnī tāqat ke muvāfiq kām kartā hai, aur yūṅ pūrā badan muhabbat kī rūh meṅ baṛhtā aur apnī tāmīr kartā rahatā hai.

masīh meṅ naī zindagī

¹⁷pas maiṅ ḵẖudāvand ke nām meṅ āp ko āgāh kartā hūṅ ki ab se ġairīmāndāroṅ kī tarah zindagī na guzāreṅ jin kī soch bekār hai ¹⁸aur jin kī samajh aṅdhere kī girift meṅ hai. un kā us zindagī meṅ koī hissā nahīṅ jo allāh detā hai, kyūṅki vah jāhil haiṅ aur un ke dil saḵẖt ho gae haiṅ. ¹⁹behiss ho kar unhoṅ ne apne āp ko ayyāshī ke havāle kar diyā. yūṅ vah na bujhne vālī piyās ke sāth har qism kī nāpāk harkateṅ karte haiṅ.

²⁰lekin āp ne masīh ko yūṅ nahīṅ jānā. ²¹āp ne to us ke bāre meṅ sun liyā hai, aur us meṅ ho kar āp ko vah sacchāī sikhāī gaī jo īsā meṅ hai. ²²chunāṅche apne purāne insān ko us ke purāne chāl-chalan samet utār denā, kyūṅki vah apnī dhokebāz shahavatoṅ se bigaṛtā jā rahā hai. ²³allāh ko āp kī soch kī tajdīd karne deṅ ²⁴aur nae insān ko pahan leṅ jo yūṅ banāyā gayā hai ki vah haqīqī rāstbāzī aur quddūsiyat meṅ allāh ke mushābeh hai.

²⁵is liye har shaḵẖs jhūṭ se bāz rah kar dūsroṅ se sacch bāt kare, kyūṅki ham sab ek hī badan ke āzā haiṅ. ²⁶ġusse meṅ āte vaqt gunāh mat karnā. āp kā ġussā sūraj ke ġurūb hone tak ṭhaṅḍā ho jāe, ²⁷varnā āp iblīs ko apnī zindagī meṅ kām karne kā mauqā deṅge. ²⁸chor ab se chorī na kare balki ḵẖūb mehanat-mashaqqat karke apne hāthoṅ se acchhā kām kare. hāṅ, vah itnā kamāe ki zarūratmandoṅ ko bhī kuchh de sake. ²⁹koī bhī burī bāt āp ke muṅh se na nikle balki sirf aisī bāteṅ jo dūsroṅ kī zarūriyāt ke mutābiq un kī tāmīr kareṅ. yūṅ sunne vāloṅ ko barkat milegī. ³⁰allāh ke muqaddas rūh ko dukh na pahuṅchānā, kyūṅki usī se allāh ne āp par muhar lagā kar yah zamānat de dī hai ki āp usī ke haiṅ aur najāt ke din bach jāeṅge. ³¹tamām tarah kī talḵẖī, taish, ġusse, shor-sharābā, gālī-galoch balki har qism ke bure ravayye se bāz āeṅ. ³²ek dūsre par meharbān aur rahamdil hoṅ aur ek dūsre ko yūṅ muāf kareṅ jis tarah allāh ne āp ko bhī masīh meṅ muāf kar diyā hai.