Ifisiyoṅ 1
1yah ḵẖat paulus kī taraf se hai, jo allāh kī marzī se masīh īsā kā rasūl hai.
maiṅ ifisus shahar ke muqaddasīn ko likh rahā hūṅ, unheṅ jo masīh īsā meṅ īmāndār haiṅ.
2ḵẖudā hamārā bāp aur ḵẖudāvand īsā masīh āp ko fazl aur salāmatī baḵẖsheṅ.
masīh meṅ ruhānī barkateṅ
3ḵẖudā hamāre ḵẖudāvand īsā masīh ke bāp kī hamd-o-sanā ho! kyūṅki masīh meṅ us ne hameṅ āsmān par har ruhānī barkat se navāzā hai. 4duniyā kī taḵẖlīq se peshtar hī us ne masīh meṅ hameṅ chun liyā tāki ham muqaddas aur beaib hālat meṅ us ke sāmne zindagī guzāreṅ.
yah kitnī azīm muhabbat thī! 5pahale hī se us ne faislā kar liyā ki vah hameṅ masīh meṅ apne beṭe-beṭiyāṅ banā legā. yahī us kī marzī aur ḵẖushī thī 6tāki ham us ke jalālī fazl kī tamjīd kareṅ, us muft nemat ke liye jo us ne hameṅ apne piyāre farzand meṅ de dī. 7kyūṅki us ne masīh ke ḵẖūn se hamārā fidyā de kar hameṅ āzād aur hamāre gunāhoṅ ko muāf kar diyā hai. allāh kā yah fazl kitnā vasī hai 8jo us ne kasrat se hameṅ atā kiyā hai.
apnī pūrī hikmat aur dānāī kā izhār karke 9allāh ne ham par apnī poshīdā marzī zāhir kar dī, yānī vah mansūbā jo use pasand thā aur jo us ne masīh meṅ pahale se banā rakhā thā. 10mansūbā yah hai ki jab muqarrarā vaqt āegā to allāh masīh meṅ tamām kāināt ko jamā kar degā. us vaqt sab kuchh mil kar masīh ke tahat ho jāegā, ḵẖwāh vah āsmān par ho yā zamīn par.
11masīh meṅ ham āsmānī bādshāhī ke vāris bhī ban gae haiṅ. allāh ne pahale se hameṅ is ke liye muqarrar kiyā, kyūṅki vah sab kuchh yūṅ sar’anjām detā hai ki us kī marzī kā irādā pūrā ho jāe. 12aur vah chāhatā hai ki ham us ke jalāl kī sitāish kā bāis baneṅ, ham jinhoṅ ne pahale se masīh par ummīd rakhī.
13āp bhī masīh meṅ haiṅ, kyūṅki āp sacchāī kā kalām aur apnī najāt kī ḵẖushḵẖabarī sun kar īmān lāe. aur allāh ne āp par bhī rūh-ul-quds kī muhar lagā dī jis kā vādā us ne kiyā thā. 14rūh-ul-quds hamārī mīrās kā baiānā hai. vah hameṅ yah zamānat detā hai ki allāh hamārā jo us kī milkiyat haiṅ fidyā de kar hameṅ pūrī maḵẖlsī tak pahuṅchāegā. kyūṅki hamārī zindagī kā maqsad yah hai ki us ke jalāl kī sitāish kī jāe.
paulus kī duā
15bhāiyo, maiṅ ḵẖudāvand īsā par āp ke īmān aur āp kī tamām muqaddasīn se muhabbat ke bāre meṅ sun kar 16āp ke liye ḵẖudā kā shukr karne se bāz nahīṅ ātā balki āp ko apnī duāoṅ meṅ yād kartā rahatā hūṅ. 17merī ḵẖās duā yah hai ki hamāre ḵẖudāvand īsā masīh kā ḵẖudā aur jalālī bāp āp ko dānāī aur mukāshfā kī rūh de tāki āp use behatar taur par jān sakeṅ. 18vah kare ki āp ke diloṅ kī āṅkheṅ raushan ho jāeṅ. kyūṅki phir hī āp jān leṅge ki yah kaisī ummīd hai jis ke liye us ne āp ko bulāyā hai, ki yah jalālī mīrās kaisī daulat hai jo muqaddasīn ko hāsil hai, 19aur ki ham īmān rakhne vāloṅ par us kī qudrat kā izhār kitnā zabardast hai. yah vahī behad qudrat hai 20jis se us ne masīh ko murdoṅ meṅ se zindā karke āsmān par apne dahane hāth biṭhāyā. 21vahāṅ masīh har hukmarān, iḵẖtiyār, quvvat, hukūmat, hāṅ har nām se kahīṅ sarfarāz hai, ḵẖwāh is duniyā meṅ ho yā āne vālī duniyā meṅ. 22allāh ne sab kuchh us ke pāoṅ ke nīche karke use sab kā sar banā diyā. yah us ne apnī jamāat kī ḵẖātir kiyā 23jo masīh kā badan hai aur jise masīh se pūrī māmūrī hāsil hotī hai yānī us se jo har tarah se sab kuchh māmūr kar detā hai.