Vāiz 9
1in tamām bātoṅ par maiṅ ne dil se ġaur kiyā. in ke muāine ke bād maiṅ ne natījā nikālā ki rāstbāz aur dānishmand aur jo kuchh vah kareṅ allāh ke hāth meṅ haiṅ. ḵẖwāh muhabbat ho ḵẖwāh nafrat, is kī bhī samajh insān ko nahīṅ ātī, donoṅ kī jaṛeṅ us se pahale māzī meṅ haiṅ. 2sab ke nasīb meṅ ek hī anjām hai, rāstbāz aur bedīn ke, nek aur bad ke, pāk aur nāpāk ke, qurbāniyāṅ pesh karne vāle ke aur us ke jo kuchh nahīṅ pesh kartā. acchhe shaḵẖs aur gunāhgār kā ek hī anjām hai, halaf uṭhāne vāle aur is se ḍar kar gurez karne vāle kī ek hī manzil hai.
3sūraj tale har kām kī yahī musībat hai ki har ek ke nasīb meṅ ek hī anjām hai. insān kā mulāhazā kar. us kā dil burāī se bharā rahatā balki umr bhar us ke dil meṅ behudgī rahatī hai. lekin āḵẖirkār use murdoṅ meṅ hī jā milnā hai.
4jo ab tak zindoṅ meṅ sharīk hai use ummīd hai. kyūṅki zindā kutte kā hāl murdā sher se behatar hai. 5kam az kam jo zindā haiṅ vah jānte haiṅ ki ham mareṅge. lekin murde kuchh nahīṅ jānte, unheṅ mazīd koī ajr nahīṅ milnā hai. un kī yādeṅ bhī miṭ jātī haiṅ. 6un kī muhabbat, nafrat aur ġairat sab kuchh baṛī der se jātī rahī hai. ab vah kabhī bhī un kāmoṅ meṅ hissā nahīṅ leṅge jo sūraj tule hote haiṅ.
zindagī ke maze le!
7chunāṅche jā kar apnā khānā ḵẖushī ke sāth khā, apnī mai zindādilī se pī, kyūṅki allāh kāfī der se tere kāmoṅ se ḵẖush hai. 8tere kapṛe har vaqt safed [a] yānī ḵẖushī manāne ke kapṛe. hoṅ, terā sar tel se maharūm na rahe. 9apne jīvansāthī ke sāth jo tujhe piyārā hai zindagī ke maze letā rah. sūraj tale kī bātil zindagī ke jitne din allāh ne tujhe baḵẖsh die haiṅ unheṅ isī tarah guzār! kyūṅki zindagī meṅ aur sūraj tale terī mehanat-mashaqqat meṅ yahī kuchh tere nasīb meṅ hai. 10jis kām ko bhī hāth lagāe use pūre josh-o-ḵẖurosh se kar, kyūṅki pātāl meṅ jahāṅ tū jā rahā hai na koī kām hai, na mansūbā, na ilm aur na hikmat.
duniyā meṅ hikmat kī qadar nahīṅ kī jātī
11maiṅ ne sūraj tale mazīd kuchh dekhā. yaqīnī bāt nahīṅ ki muqāble meṅ sab se tez dauṛne vālā jīt jāe, ki jaṅg meṅ pahalavān fatah pāe, ki dānishmand ko ḵẖurāk hāsil ho, ki samajhdār ko daulat mile yā ki ālim manzūrī pāe. nahīṅ, sab kuchh mauqe aur ittifāq par munhasir hotā hai. 12nīz, koī bhī insān nahīṅ jāntā ki musībat kā vaqt kab us par āegā. jis tarah machhliyāṅ zālim jāl meṅ ulajh jātī yā parinde phaṅde meṅ phaṅs jāte haiṅ usī tarah insān musībat meṅ phaṅs jātā hai. musībat achānak hī us par ā jātī hai.
13sūraj tale maiṅ ne hikmat kī ek aur misāl dekhī jo mujhe aham lagī.
14kahīṅ koī chhoṭā shahar thā jis meṅ thoṛe se afrād baste the. ek din ek tāqatvar bādshāh us se laṛne āyā. us ne us kā muhāsarā kiyā aur is maqsad se us ke ird-gird baṛe baṛe burj khaṛe kie. 15shahar meṅ ek ādmī rahatā thā jo dānishmand alabattā ġarīb thā. is shaḵẖs ne apnī hikmat se shahar ko bachā liyā. lekin bād meṅ kisī ne bhī ġarīb ko yād na kiyā. 16yah dekh kar maiṅ bolā, “hikmat tāqat se behatar hai,” lekin ġarīb kī hikmat haqīr jānī jātī hai. koī bhī us kī bātoṅ par dhyān nahīṅ detā. 17dānishmand kī jo bāteṅ ārām se sunī jāeṅ vah ahamaqoṅ ke darmiyān rahane vāle hukmarān ke zordār elānāt se kahīṅ behatar haiṅ. 18hikmat jaṅg ke hathiyāroṅ se behatar hai, lekin ek hī gunāhgār bahut kuchh jo acchhā hai tabāh kartā hai.