Vāiz 7
acchhā kyā hai?
1acchhā nām ḵẖushbūdār tel se aur maut kā din paidāish ke din se behatar hai.
2ziyāfat karne vāloṅ ke ghar meṅ jāne kī nisbat mātam karne vāloṅ ke ghar meṅ jānā behatar hai, kyūṅki har insān kā anjām maut hī hai. jo zindā haiṅ vah is bāt par ḵẖūb dhyān deṅ. 3dukh haṅsī se behatar hai, utrā huā chiharā dil kī behatrī kā bāis hai. 4dānishmand kā dil mātam karne vāloṅ ke ghar meṅ ṭhahartā jabki ahamaq kā dil aish-o-ishrat karne vāloṅ ke ghar meṅ ṭik jātā hai.
5ahamaqoṅ ke gīt sunne kī nisbat dānishmand kī jhiṛkiyoṅ par dhyān denā behatar hai. 6ahamaq ke qahqahe degchī tale chaṭaḵẖne vāle kāṅṭoṅ kī āg kī mānind haiṅ. yah bhī bātil hī hai.
7nārvā nafā dānishmand ko ahamaq banā detā, rishvat dil ko bigāṛ detī hai.
8kisī muāmale kā anjām us kī ibtidā se behatar hai, sabr karnā maġrūr hone se behatar hai.
9ġussā karne meṅ jaldī na kar, kyūṅki ġussā ahamaqoṅ kī god meṅ hī ārām kartā hai.
10yah na pūchh ki āj kī nisbat purānā zamānā behatar kyūṅ thā, kyūṅki yah hikmat kī bāt nahīṅ.
11agar hikmat ke ilāvā mīrās meṅ milkiyat bhī mil jāe to yah acchhī bāt hai, yah un ke liye sūdmand hai jo sūraj dekhte haiṅ. 12kyūṅki hikmat paisoṅ kī tarah panāh detī hai, lekin hikmat kā ḵẖās fāidā yah hai ki vah apne mālik kī jān bachāe rakhtī hai.
13allāh ke kām kā mulāhazā kar. jo kuchh us ne pechdār banāyā kaun use suljhā saktā hai?
14ḵẖushī ke din ḵẖush ho, lekin musībat ke din ḵẖayāl rakh ki allāh ne yah din bhī banāyā aur vah bhī is liye ki insān apne mustaqbil ke bāre meṅ kuchh mālūm na kar sake.
intihāpasandoṅ se dareġ kar
15apnī abas zindagī ke daurān maiṅ ne do bāteṅ dekhī haiṅ. ek taraf rāstbāz apnī rāstbāzī ke bāvujūd tabāh ho jātā jabki dūsrī taraf bedīn apnī bedīnī ke bāvujūd umrrasīdā ho jātā hai. 16na hadd se ziyādā rāstbāzī dikhā, na hadd se ziyādā dānishmandī. apne āp ko tabāh karne kī kyā zarūrat hai? 17na hadd se ziyādā bedīnī, na hadd se ziyādā hamāqat dikhā. muqarrarā vaqt se pahale marne kī kyā zarūrat hai? 18acchhā hai ki tū yah bāt thāme rakhe aur dūsrī bhī na chhoṛe. jo allāh kā ḵẖauf māne vah donoṅ khatroṅ se bach niklegā.
19hikmat dānishmand ko shahar ke das hukmarānoṅ se ziyādā tāqatvar banā detī hai. 20duniyā meṅ koī bhī insān itnā rāstbāz nahīṅ ki hameshā acchhā kām kare aur kabhī gunāh na kare.
21logoṅ kī har bāt par dhyān na de, aisā na ho ki tū naukar kī lānat bhī sun le jo vah tujh par kartā hai. 22kyūṅki dil meṅ tū jāntā hai ki tū ne ḵẖud mut’addid bār dūsroṅ par lānat bhejī hai.
kaun dānishmand hai?
23hikmat ke zarīe maiṅ ne in tamām bātoṅ kī jāṅch-paṛtāl kī. maiṅ bolā, “maiṅ dānishmand bannā chāhatā hūṅ,” lekin hikmat mujh se dūr rahī. 24jo kuchh maujūd hai vah dūr aur nihāyat gaharā hai. kaun us kī tah tak pahuṅch saktā hai? 25chunāṅche maiṅ ruḵẖ badal kar pūre dhyān se is kī tahqīq-o-taftīsh karne lagā ki hikmat aur muḵẖtalif bātoṅ ke sahīh natāij kyā haiṅ. nīz, maiṅ bedīnī kī hamāqat aur behudgī kī dīvāngī mālūm karnā chāhatā thā.
26mujhe mālūm huā ki maut se kahīṅ talḵẖ vah aurat hai jo phaṅdā hai, jis kā dil jāl aur hāth zanjīreṅ haiṅ. jo ādmī allāh ko manzūr ho vah bach niklegā, lekin gunāhgār us ke jāl meṅ ulajh jāegā.
27vāiz farmātā hai, “yah sab kuchh mujhe mālūm huā jab maiṅ ne muḵẖtalif bāteṅ ek dūsre ke sāth munsalik kīṅ tāki sahīh natāij tak pahuṅchūṅ. 28lekin jise maiṅ ḍhūṅḍtā rahā vah na milā. hazār afrād meṅ se mujhe sirf ek hī diyānatdār mard milā, lekin ek bhī diyānatdār aurat nahīṅ [a] diyānatdār izāfā hai tāki āyat kā jo ġāliban matlab hai vah sāf ho jāe. .
29mujhe sirf itnā hī mālūm huā ki go allāh ne insānoṅ ko diyānatdār banāyā, lekin vah kaī qism kī chālākiyāṅ ḍhūṅḍ nikālte haiṅ.”