Vāiz 6
1mujhe sūraj tale ek aur burī bāt nazar āī jo insān ko apne bojh tale dabāe rakhtī hai.
2allāh kisī ādmī ko māl-o-matā aur izzat atā kartā hai. ġaraz us ke pās sab kuchh hai jo us kā dil chāhe. lekin allāh use in chīzoṅ se lutf uṭhāne nahīṅ detā balki koī ajnabī us kā mazā letā hai. yah bātil aur ek baṛī musībat hai. 3ho saktā hai ki kisī ādmī ke sau bacche paidā hoṅ aur vah umrrasīdā bhī ho jāe, lekin ḵẖwāh vah kitnā būṛhā kyūṅ na ho jāe, agar apnī ḵẖushhālī kā mazā na le sake aur āḵẖirkār sahīh rusūmāt ke sāth dafnāyā na jāe to is kā kyā fāidā? maiṅ kahatā hūṅ ki us kī nisbat māṅ ke peṭ meṅ zāe ho gae bacche kā hāl behatar hai. 4beshak aise bacche kā ānā bemānī hai, aur vah aṅdhere meṅ hī kūch karke chalā jātā balki us kā nām tak aṅdhere meṅ chhupā rahatā hai. 5lekin go us ne na kabhī sūraj dekhā, na use kabhī mālūm huā ki aisī chīz hai tāham use mazkūrā ādmī se kahīṅ ziyādā ārām-o-sukūn hāsil hai. 6aur agar vah do hazār sāl tak jītā rahe, lekin apnī ḵẖushhālī se lutf’andoz na ho sake to kyā fāidā hai? sab ko to ek hī jagah jānā hai.
7insān kī tamām mehanat-mashaqqat kā yah maqsad hai ki peṭ bhar jāe, to bhī us kī bhūk kabhī nahīṅ miṭtī. 8dānishmand ko kyā hāsil hai jis ke bāis vah ahamaq se bartar hai? is kā kyā fāidā hai ki ġarīb ādmī zindoṅ ke sāth munāsib sulūk karne kā fan sīkh le? 9dūrdarāz chīzoṅ ke ārzūmand rahane kī nisbat behatar yah hai ki insān un chīzoṅ se lutf uṭhāe jo āṅkhoṅ ke sāmne hī haiṅ. yah bhī bātil aur havā ko pakaṛne ke barābar hai.
allāh kā muqāblā koī nahīṅ kar saktā
10jo kuchh bhī pesh ātā hai us kā nām pahale hī rakhā gayā hai, jo bhī insān vujūd meṅ ātā hai vah pahale hī mālūm thā. koī bhī insān us kā muqāblā nahīṅ kar saktā jo us se tāqatvar hai. 11kyūṅki jitnī bhī bāteṅ insān kare utnā hī ziyādā mālūm hogā ki bātil haiṅ. insān ke liye is kā kyā fāidā?
12kis ko mālūm hai ki un thoṛe aur bekār dinoṅ ke daurān jo sāy kī tarah guzar jāte haiṅ insān ke liye kyā kuchh fāidāmand hai? kaun use batā saktā hai ki us ke chale jāne par sūraj tale kyā kuchh pesh āegā