Vāiz 5

allāh kā ḵẖauf mānnā

¹allāh ke ghar meṅ jāte vaqt apne qadmoṅ kā ḵẖayāl rakh aur sunne ke liye tayyār rah. yah ahamaqoṅ kī qurbāniyoṅ se kahīṅ behatar hai, kyūṅki vah jānte hī nahīṅ ki ġalat kām kar rahe haiṅ.

²bolne meṅ jaldbāzī na kar, terā dil allāh ke huzūr kuchh bayān karne meṅ jaldī na kare. allāh āsmān par hai jabki tū zamīn par hī hai. lihāzā behatar hai ki tū kam bāteṅ kare. ³kyūṅki jis tarah hadd se ziyādā mehanat-mashaqqat se ḵẖwāb āne lagte haiṅ usī tarah bahut bāteṅ karne se ādmī kī hamāqat zāhir hotī hai.

⁴agar tū allāh ke huzūr mannat māne to use pūrā karne meṅ der mat kar. vah ahamaqoṅ se ḵẖush nahīṅ hotā, chunāṅche apnī mannat pūrī kar. ⁵mannat na mānnā mannat mān kar use pūrā na karne se behatar hai.

⁶apne muṅh ko ijāzat na de ki vah tujhe gunāh meṅ phaṅsāe, aur allāh ke paiġambar ke sāmne na kah, “mujh se ġairirādī ġaltī huī hai.” kyā zarūrat hai ki allāh terī bāt se nārāz ho kar terī mehanat kā kām tabāh kare?

⁷jahāṅ bahut ḵẖwāb dekhe jāte haiṅ vahāṅ fuzūl bāteṅ aur beshumār alfāz hote haiṅ. chunāṅche allāh kā ḵẖauf mān!

zālimoṅ kā zulm

⁸kyā tujhe sūbe meṅ aise log nazar āte haiṅ jo ġarīboṅ par zulm karte, un kā haq mārte aur unheṅ insāf se maharūm rakhte haiṅ? tājjub na kar, kyūṅki ek sarkārī mulāzim dūsre kī nigahbānī kartā hai, aur un par mazīd mulāzim muqarrar hote haiṅ. ⁹chunāṅche mulk ke liye har lihāz se fāidā is meṅ hai ki aisā bādshāh us par hukūmat kare jo kāshtkārī kī fikr kartā hai.

daulat ḵẖushhālī kī zamānat nahīṅ de saktī

¹⁰jise paise piyāre hoṅ vah kabhī mutmain nahīṅ hogā, ḵẖwāh us ke pās kitne hī paise kyūṅ na hoṅ. jo zardosat ho vah kabhī āsūdā nahīṅ hogā, ḵẖwāh us ke pās kitnī hī daulat kyūṅ na ho. yah bhī bātil hī hai. ¹¹jitnā māl meṅ izāfā ho utnā hī un kī tādād baṛhtī hai jo use khā jāte haiṅ. us ke mālik ko us kā kyā fāidā hai sivā-e-is ke ki vah use dekh dekh kar mazā le? ¹²kām-kāj karne vāle kī nīṅd mīṭhī hotī hai, ḵẖwāh us ne kam yā ziyādā khānā khāyā ho, lekin amīr kī daulat use sone nahīṅ detī.

¹³mujhe sūraj tale ek nihāyat burī bāt nazar āī. jo daulat kisī ne apne liye mahfūz rakhī vah us ke liye nuqsān kā bāis ban gaī. ¹⁴kyūṅki jab yah daulat kisī musībat ke bāis tabāh ho gaī aur ādmī ke hāṅ beṭā paidā huā to us ke hāth meṅ kuchh nahīṅ thā. ¹⁵māṅ ke peṭ se nikalte vaqt vah naṅgā thā, aur isī tarah kūch karke chalā bhī jāegā. us kī mehanat kā koī phal nahīṅ hogā jise vah apne sāth le jā sake.

¹⁶yah bhī bahut burī bāt hai ki jis tarah insān āyā usī tarah kūch karke chalā bhī jātā hai. use kyā fāidā huā hai ki us ne havā ke liye mehanat-mashaqqat kī ho? ¹⁷jīte jī vah har din tārīkī meṅ khānā khāte hue guzārtā, zindagī bhar vah baṛī raṅjīdgī, bīmārī aur ġusse meṅ mubtalā rahatā hai.

¹⁸tab maiṅ ne jān liyā ki insān ke liye acchhā aur munāsib hai ki vah jitne din allāh ne use die haiṅ khāe pie aur sūraj tale apnī mehanat-mashaqqat ke phal kā mazā le, kyūṅki yahī us ke nasīb meṅ hai. ¹⁹kyūṅki jab allāh kisī shaḵẖs ko māl-o-matā atā karke use is qābil banāe ki us kā mazā le sake, apnā nasīb qabūl kar sake aur mehanat-mashaqqat ke sāth sāth ḵẖush bhī ho sake to yah allāh kī baḵẖshish hai. ²⁰aise shaḵẖs ko zindagī ke dinoṅ par ġaur-o-ḵẖauz karne kā kam hī vaqt miltā hai, kyūṅki allāh use dil meṅ ḵẖushī dilā kar masrūf rakhtā hai.