Vāiz 12

¹javānī meṅ hī apne ḵẖāliq ko yād rakh, is se pahale ki musībat ke din āeṅ, vah sāl qarīb āeṅ jin ke bāre meṅ tū kahegā, “yah mujhe pasand nahīṅ.” ²use yād rakh is se pahale ki raushnī tere liye ḵẖatm ho jāe, sūraj, chāṅd aur sitāre aṅdhere ho jāeṅ aur bārish ke bād bādal lauṭ āeṅ. ³use yād rakh, is se pahale ki ghar ke paharedār thartharāne lageṅ, tāqatvar ādmī kubṛe ho jāeṅ, gandum pīsne vālī naukrāniyāṅ kam hone ke bāis kām karnā chhoṛ deṅ aur khiṛkiyoṅ meṅ se dekhne vālī ḵẖavātīn dhundalā jāeṅ. ⁴use yād rakh, is se pahale ki galī meṅ pahuṅchāne vālā darvāzā band ho jāe aur chakkī kī āvāz āhistā ho jāe. jab chiṛiyāṅ chahachahāne lageṅgī to tū jāg uṭhegā, lekin tamām gītoṅ kī āvāz dabī sī sunāī degī. ⁵use yād rakh, is se pahale ki tū ūṅchī jagahoṅ aur galiyoṅ ke khatroṅ se ḍarne lage. go bādām kā phūl khil jāe, ṭiḍḍī bojh tale dab jāe aur karīr kā phūl phūṭ nikle, lekin tū kūch karke apne abdī ghar meṅ chalā jāegā, aur mātam karne vāle galiyoṅ meṅ ghūmte phireṅge.

⁶allāh ko yād rakh, is se pahale ki chāṅdī kā rassā ṭūṭ jāe, sone kā bartan ṭukṛe ṭukṛe ho jāe, chashme ke pās ghaṛā pāsh pāsh ho jāe aur kueṅ kā pānī nikālne vālā pahiyā ṭūṭ kar us meṅ gir jāe. ⁷tab terī ḵẖāk dubārā us ḵẖāk meṅ mil jāegī jis se nikal āī aur terī rūh us ḵẖudā ke pās lauṭ jāegī jis ne use baḵẖshā thā.

⁸vāiz farmātā hai, “bātil hī bātil! sab kuchh bātil hī bātil hai!”

ḵẖātmā

⁹dānishmand hone ke ilāvā vāiz qaum ko ilm-o-irfān kī tālīm detā rahā. us ne mut’addid amsāl ko sahīh vazan de kar un kī jāṅch-paṛtāl kī aur unheṅ tartībavār jamā kiyā. ¹⁰vāiz kī koshish thī ki munāsib alfāz istemāl kare aur diyānatdārī se sacchī bāteṅ likhe.

¹¹dānishmandoṅ ke alfāz āṅkus kī mānind haiṅ, tartīb se jamāshudā amsāl lakṛī meṅ mazbūtī se ṭhoṅkī gaī kīloṅ jaisī haiṅ. yah ek hī gallābān kī dī huī haiṅ.

¹²mere beṭe, is ke ilāvā ḵẖabardār rah. kitābeṅ likhne kā silsilā kabhī ḵẖatm nahīṅ ho jāegā, aur hadd se ziyādā kutubabīnī se jism thak jātā hai.

¹³āo, iḵẖtitām par ham tamām tālīm ke ḵẖulāse par dhyān deṅ. rabb kā ḵẖauf mān aur us ke ahkām kī pairvī kar. yah har insān kā farz hai. ¹⁴kyūṅki allāh har kām ko ḵẖwāh vah chhupā hī ho, ḵẖwāh burā yā bhalā ho adālat meṅ lāegā.