Vāiz 11

muhabbat kā fāidā

¹apnī roṭī pānī par phaiṅk kar jāne de to mut’addid dinoṅ ke bād vah tujhe phir mil jāegī. ²apnī milkiyat sāt balki āṭh muḵẖtalif kāmoṅ meṅ lagā de, kyūṅki tujhe kyā mālūm ki mulk kyā kyā musībat se dochār hogā.

³agar bādal pānī se bhare hoṅ to zamīn par bārish zarūr hogī. daraḵẖt junūb yā shimāl kī taraf gir jāe to usī taraf paṛā rahegā.

⁴jo har vaqt havā kā ruḵẖ dekhtā rahe vah kabhī bīj nahīṅ boegā. jo bādloṅ ko taktā rahe vah kabhī fasal kī kaṭāī nahīṅ karegā.

⁵jis tarah na tujhe havā ke chakkar mālūm haiṅ, na yah ki māṅ ke peṭ meṅ bacchā kis tarah tashkīl pātā hai usī tarah tū allāh kā kām nahīṅ samajh saktā, jo sab kuchh amal meṅ lātā hai.

⁶subah ke vaqt apnā bīj bo aur shām ko bhī kām meṅ lagā rah, kyūṅki kyā mālūm ki kis kām meṅ kāmyābī hogī, is meṅ, us meṅ yā donoṅ meṅ.

apnī javānī se lutf’andoz ho

⁷raushnī kitnī bhalī hai, aur sūraj āṅkhoṅ ke liye kitnā ḵẖushgavār hai. ⁸jitne bhī sāl insān zindā rahe utne sāl vah ḵẖushbāsh rahe. sāth sāth use yād rahe ki tārīk din bhī āne vāle haiṅ, aur ki un kī baṛī tādād hogī. jo kuchh āne vālā hai vah bātil hī hai.

⁹ai naujavān, jab tak tū javān hai ḵẖush rah aur javānī ke maze letā rah. jo kuchh terā dil chāhe aur terī āṅkhoṅ ko pasand āe vah kar, lekin yād rahe ki jo kuchh bhī tū kare us kā javāb allāh tujh se talab karegā. ¹⁰chunāṅche apne dil se raṅjīdgī aur apne jism se dukh-dard dūr rakh, kyūṅki javānī aur kāle bāl dam bhar ke hī haiṅ.