Vāiz 1

har duniyāvī chīz bātil hai

¹zail meṅ vāiz ke alfāz qalamband haiṅ, us ke jo dāūd kā beṭā aur yarūshalam meṅ bādshāh hai,

²vāiz farmātā hai, “bātil hī bātil, bātil hī bātil, sab kuchh bātil hī bātil hai!” ³sūraj tale jo mehanat-mashaqqat insān kare us kā kyā fāidā hai? kuchh nahīṅ! ⁴ek pusht ātī aur dūsrī jātī hai, lekin zamīn hameshā tak qāim rahatī hai. ⁵sūraj tulū aur ġurūb ho jātā hai, phir sur’at se usī jagah vāpas chalā jātā hai jahāṅ se dubārā tulū hotā hai. ⁶havā junūb kī taraf chaltī, phir muṛ kar shimāl kī taraf chalne lagtī hai. yūṅ chakkar kāṭ kāṭ kar vah bār bār nuqtā-e-āġāz par vāpas ātī hai. ⁷tamām daryā samundar meṅ jā milte haiṅ, to bhī samundar kī satah vahī rahatī hai, kyūṅki daryāoṅ kā pānī musalsal un sarchashmoṅ ke pās vāpas ātā hai jahāṅ se bah niklā hai. ⁸insān bāteṅ karte karte thak jātā hai aur sahīh taur se kuchh bayān nahīṅ kar saktā. āṅkh kabhī itnā nahīṅ dekhtī ki kahe, “ab bas karo, kāfī hai.” kān kabhī itnā nahīṅ suntā ki aur na sunnā chāhe. ⁹jo kuchh pesh āyā vahī dubārā pesh āegā, jo kuchh kiyā gayā vahī dubārā kiyā jāegā. sūraj tale koī bhī bāt naī nahīṅ. ¹⁰kyā koī bāt hai jis ke bāre meṅ kahā jā sake, “dekho, yah naī hai”? hargiz nahīṅ, yah bhī ham se bahut der pahale hī maujūd thī. ¹¹jo pahale zindā the unheṅ koī yād nahīṅ kartā, aur jo āne vāle haiṅ unheṅ bhī vah yād nahīṅ kareṅge jo un ke bād āeṅge.

hikmat hāsil karnā bātil hai

¹²maiṅ jo vāiz hūṅ yarūshalam meṅ isrāīl kā bādshāh thā. ¹³maiṅ ne apnī pūrī zahanī tāqat is par lagāī ki jo kuchh āsmān tale kiyā jātā hai us kī hikmat ke zarīe taftīsh-o-tahqīq karūṅ. yah kām nāgvār hai go allāh ne ḵẖud insān ko is meṅ mehanat-mashaqqat karne kī zimmādārī dī hai.

¹⁴maiṅ ne tamām kāmoṅ kā mulāhazā kiyā jo sūraj tule hote haiṅ, to natījā yah niklā ki sab kuchh bātil aur havā ko pakaṛne ke barābar hai. ¹⁵jo pechdār hai vah sīdhā nahīṅ ho saktā, jis kī kamī hai use ginā nahīṅ jā saktā.

¹⁶maiṅ ne dil meṅ kahā, “hikmat meṅ maiṅ ne itnā izāfā kiyā aur itnī taraqqī kī ki un sab se sabqat le gayā jo mujh se pahale yarūshalam par hukūmat karte the. mere dil ne bahut hikmat aur ilm apnā liyā hai.” ¹⁷maiṅ ne apnī pūrī zahanī tāqat is par lagāī ki hikmat samjhūṅ, nīz ki mujhe dīvāngī aur hamāqat kī samajh bhī āe. lekin mujhe mālūm huā ki yah bhī havā ko pakaṛne ke barābar hai. ¹⁸kyūṅki jahāṅ hikmat bahut hai vahāṅ raṅjīdgī bhī bahut hai. jo ilm-o-irfān meṅ izāfā kare, vah dukh meṅ izāfā kartā hai.