Istisnā 9

mulk milne kā sabab isrāīl kī rāstī nahīṅ hai

¹sun ai isrāīl! āj tū daryā-e-yardan ko pār karne vālā hai. dūsrī taraf tū aisī qaumoṅ ko bhagā degā jo tujh se baṛī aur tāqatvar haiṅ aur jin ke shāndār shaharoṅ kī fasīleṅ āsmān se bāteṅ kartī haiṅ. ²vahāṅ anāqī baste haiṅ jo tāqatvar aur darāzaqad haiṅ. tū ḵẖud jāntā hai ki un ke bāre meṅ kahā jātā hai, “kaun anāqiyoṅ kā sāmnā kar saktā hai?” ³lekin āj jān le ki rabb terā ḵẖudā tere āge āge chalte hue unheṅ bhasm kar dene vālī āg kī tarah halāk karegā. vah tere āge āge un par qābū pāegā, aur tū unheṅ nikāl kar jaldī miṭā degā, jis tarah rabb ne vādā kiyā hai.

⁴jab rabb terā ḵẖudā unheṅ tere sāmne se nikāl degā to tū yah na kahanā, “maiṅ rāstbāz hūṅ, isī liye rabb mujhe lāiq samajh kar yahāṅ lāyā aur yah mulk mīrās meṅ de diyā hai.” yah bāt hargiz durust nahīṅ hai. rabb un qaumoṅ ko un kī ġalat harkatoṅ kī vajah se tere sāmne se nikāl degā. ⁵tū apnī rāstbāzī aur diyānatdārī kī binā par us mulk par qabzā nahīṅ karegā balki rabb unheṅ un kī sharīr harkatoṅ ke bāis tere sāmne se nikāl degā. dūsre, jo vādā us ne tere bāpdādā ibrāhīm, ishāq aur yāqūb ke sāth qasam khā kar kiyā thā use pūrā honā hai.

⁶chunāṅche jān le ki rabb terā ḵẖudā tujhe terī rāstī ke bāis yah acchhā mulk nahīṅ de rahā. haqīqat to yah hai ki tū haṭdharm qaum hai.

sone kā bachhṛā

⁷yād rakh aur kabhī na bhūl ki tū ne registān meṅ rabb apne ḵẖudā ko kis tarah nārāz kiyā. misr se nikalte vaqt se le kar yahāṅ pahuṅchne tak tum rabb se sarkash rahe ho. ⁸ḵẖāskar horib yānī sīnā ke dāman meṅ tum ne rabb ko itnā ġussā dilāyā ki vah tumheṅ halāk karne ko thā. ⁹us vaqt maiṅ pahāṛ par chaṛh gayā thā tāki patthar kī taḵẖtiyāṅ yānī us ahd kī taḵẖtiyāṅ mil jāeṅ jo rabb ne tumhāre sāth bāṅdhā thā. kuchh khāe pie baġair maiṅ 40 din aur rāt vahāṅ rahā.

^10-11 jo kuchh rabb ne āg meṅ se kahā thā jab tum pahāṛ ke dāman meṅ jamā the vahī kuchh us ne apnī uṅglī se donoṅ taḵẖtiyoṅ par likh kar mujhe diyā. ¹²us ne mujh se kahā, “fauran yahāṅ se utar jā. terī qaum jise tū misr se nikāl lāyā bigaṛ gaī hai. vah kitnī jaldī se mere ahkām se haṭ gae haiṅ. unhoṅ ne apne liye but ḍhāl liyā hai. ¹³maiṅ ne jān liyā hai ki yah qaum kitnī ziddī hai. ¹⁴ab mujhe chhoṛ de tāki maiṅ unheṅ tabāh karke un kā nām-o-nishān duniyā meṅ se miṭā ḍālūṅ. un kī jagah maiṅ tujh se ek qaum banā lūṅgā jo un se baṛī aur tāqatvar hogī.”

¹⁵maiṅ muṛ kar pahāṛ se utrā jo ab tak bhaṛak rahā thā. mere hāthoṅ meṅ ahd kī donoṅ taḵẖtiyāṅ thīṅ. ¹⁶tumheṅ dekhte hī mujhe mālūm huā ki tum ne rabb apne ḵẖudā kā gunāh kiyā hai. tum ne apne liye bachhṛe kā but ḍhāl liyā thā. tum kitnī jaldī se rabb kī muqarrarā rāh se haṭ gae the.

¹⁷tab maiṅ ne tumhāre dekhte dekhte donoṅ taḵẖtiyoṅ ko zamīn par paṭaḵẖ kar ṭukṛe ṭukṛe kar diyā. ¹⁸ek aur bār maiṅ rabb ke sāmne muṅh ke bal girā. maiṅ ne na kuchh khāyā, na kuchh piyā. 40 din aur rāt maiṅ tumhāre tamām gunāhoṅ ke bāis isī hālat meṅ rahā. kyūṅki jo kuchh tum ne kiyā thā vah rabb ko nihāyat burā lagā, is liye vah ġazabnāk ho gayā thā. ¹⁹vah tum se itnā nārāz thā ki maiṅ bahut ḍar gayā. yūṅ lag rahā thā ki vah tumheṅ halāk kar degā. lekin is bār bhī us ne merī sun lī. ²⁰maiṅ ne hārūn ke liye bhī duā kī, kyūṅki rabb us se bhī nihāyat nārāz thā aur use halāk kar denā chāhatā thā.

²¹jo bachhṛā tum ne gunāh karke banāyā thā use maiṅ ne jalā diyā, phir jo kuchh bāqī rah gayā use kuchal diyā aur pīs pīs kar pāuḍar banā diyā. yah pāuḍar maiṅ ne us chashme meṅ phaiṅk diyā jo pahāṛ par se bah rahā thā.

²²tum ne rabb ko tabaerā, massā aur qabrot-hattāvā meṅ bhī ġussā dilāyā. ²³qādis-barnīa meṅ bhī aisā hī huā. vahāṅ se rabb ne tumheṅ bhej kar kahā thā, “jāo, us mulk par qabzā karo jo maiṅ ne tumheṅ de diyā hai.” lekin tum ne sarkash ho kar rabb apne ḵẖudā ke hukm kī ḵẖilāfvarzī kī. tum ne us par etimād na kiyā, na us kī sunī. ²⁴jab se maiṅ tumheṅ jāntā hūṅ tumhārā rabb ke sāth ravayyā bāġiyānā hī rahā hai.

²⁵maiṅ 40 din aur rāt rabb ke sāmne zamīn par muṅh ke bal rahā, kyūṅki rabb ne kahā thā ki vah tumheṅ halāk kar degā. ²⁶maiṅ ne us se minnat karke kahā, “ai rabb qādir-e-mutlaq, apnī qaum ko tabāh na kar. vah to terī hī milkiyat hai jise tū ne fidyā de kar apnī azīm qudrat se bachāyā aur baṛe iḵẖtiyār ke sāth misr se nikāl lāyā. ²⁷apne ḵẖādimoṅ ibrāhīm, ishāq aur yāqūb ko yād kar, aur is qaum kī zid, sharīr harkatoṅ aur gunāh par tavajjuh na de. ²⁸varnā misrī kaheṅge, ‘rabb unheṅ us mulk meṅ lāne ke qābil nahīṅ thā jis kā vādā us ne kiyā thā, balki vah un se nafrat kartā thā. hāṅ, vah unheṅ halāk karne ke liye registān meṅ le āyā.’ ²⁹vah to terī qaum haiṅ, terī milkiyat jise tū apnī azīm qudrat aur iḵẖtiyār se misr se nikāl lāyā.”