Istisnā 7

dūsrī kan’ānī qaumoṅ ko nikālnā hai

¹rabb terā ḵẖudā tujhe us mulk meṅ le jāegā jis par tū jā kar qabzā karegā. vah tere sāmne se bahut sī qaumeṅ bhagā degā. go yah sāt qaumeṅ yānī hittī, jirjāsī, amorī, kan’ānī, farizzī, hivvī aur yabūsī tādād aur tāqat ke lihāz se tujh se baṛī hoṅgī ²to bhī rabb terā ḵẖudā unheṅ tere havāle karegā. jab tū unheṅ shikast degā to un sab ko us ke liye maḵẖsūs karke halāk kar denā hai. na un ke sāth ahd bāṅdhnā aur na un par raham karnā. ³un meṅ se kisī se shādī na karnā. na apnī beṭiyoṅ kā rishtā un ke beṭoṅ ko denā, na apne beṭoṅ kā rishtā un kī beṭiyoṅ se karnā. ⁴varnā vah tumhāre bacchoṅ ko merī pairvī se dūr kareṅge aur vah merī nahīṅ balki un ke devtāoṅ kī ḵẖidmat kareṅge. tab rabb kā ġazab tum par nāzil ho kar jaldī se tumheṅ halāk kar degā. ⁵is liye un kī qurbāngāheṅ ḍhā denā. jin pattharoṅ kī vah pūjā karte haiṅ unheṅ chiknā-chūr kar denā, un ke yasīrat devī ke khambe kāṭ ḍālnā aur un ke but jalā denā.

⁶kyūṅki tū rabb apne ḵẖudā ke liye maḵẖsūs-o-muqaddas hai. us ne duniyā kī tamām qaumoṅ meṅ se tujhe chun kar apnī qaum aur ḵẖās milkiyat banāyā. ⁷rabb ne kyūṅ tumhāre sāth tālluq qāim kiyā aur tumheṅ chun liyā? kyā is vajah se ki tum tādād meṅ dīgar qaumoṅ kī nisbat ziyādā the? hargiz nahīṅ! tum to bahut kam the. ⁸balki vajah yah thī ki rabb ne tumheṅ piyār kiyā aur vah vādā pūrā kiyā jo us ne qasam khā kar tumhāre bāpdādā ke sāth kiyā thā. isī liye vah fidyā de kar tumheṅ baṛī qudrat se misr kī ġulāmī aur us mulk ke bādshāh ke hāth se bachā lāyā. ⁹chunāṅche jān le ki sirf rabb terā ḵẖudā hī ḵẖudā hai. vah vafādār ḵẖudā hai. jo us se muhabbat rakhte aur us ke ahkām par amal karte haiṅ un ke sāth vah apnā ahd qāim rakhegā aur un par hazār pushtoṅ tak meharbānī karegā. ¹⁰lekin us se nafrat karne vāloṅ ko vah un ke rū-ba-rū munāsib sazā de kar barbād karegā. hāṅ, jo us se nafrat karte haiṅ, un ke rū-ba-rū vah munāsib sazā degā aur jhijhkegā nahīṅ.

¹¹chunāṅche dhyān se un tamām ahkām par amal kar jo maiṅ āj tujhe de rahā hūṅ tāki tū un ke mutābiq zindagī guzāre. ¹²agar tū un par tavajjuh de aur ehatiyāt se un par chale to phir rabb terā ḵẖudā tere sāth apnā ahd qāim rakhegā aur tujh par meharbānī karegā, bilkul us vāde ke mutābiq jo us ne qasam khā kar tere bāpdādā se kiyā thā. ¹³vah tujhe piyār karegā aur tujhe us mulk meṅ barkat degā jo tujhe dene kā vādā us ne qasam khā kar tere bāpdādā se kiyā thā. tujhe bahut aulād baḵẖshne ke ilāvā vah tere khetoṅ ko barkat degā, aur tujhe kasrat kā anāj, aṅgūr aur zaitūn hāsil hogā. vah tere revṛoṅ ko bhī barkat degā, aur tere gāy-bailoṅ aur bheṛ-bakriyoṅ kī tādād baṛhtī jāegī. ¹⁴tujhe dīgar tamām qaumoṅ kī nisbat kahīṅ ziyādā barkat milegī. na tujh meṅ aur na tere maveshiyoṅ meṅ bāṅjhpan pāyā jāegā. ¹⁵rabb har bīmārī ko tujh se dūr rakhegā. vah tujh meṅ vah ḵẖatarnāk vabāeṅ phailne nahīṅ degā jin se tū misr meṅ vāqif huā balki unheṅ un meṅ phailāegā jo tujh se nafrat rakhte haiṅ.

¹⁶jo bhī qaumeṅ rabb terā ḵẖudā tere hāth meṅ kar degā unheṅ tabāh karnā lāzim hai. un par raham kī nigāh se na dekhnā, na un ke devtāoṅ kī ḵẖidmat karnā, varnā tū phaṅs jāegā.

¹⁷go terā dil kahe, “yah qaumeṅ ham se tāqatvar haiṅ. ham kis tarah inheṅ nikāl sakte haiṅ?” ¹⁸to bhī un se na ḍar. vahī kuchh zahan meṅ rakh jo rabb tere ḵẖudā ne firaaun aur pūre misr ke sāth kiyā. ¹⁹kyūṅki tū ne apnī āṅkhoṅ se rabb apne ḵẖudā kī vah baṛī āzmāne vālī musībateṅ aur mojize, us kā vah azīm iḵẖtiyār aur qudrat dekhī jis se vah tujhe vahāṅ se nikāl lāyā. vahī kuchh rabb terā ḵẖudā un qaumoṅ ke sāth bhī karegā jin se tū is vaqt ḍartā hai. ²⁰na sirf yah balki rabb terā ḵẖudā un ke darmiyān zambūr bhī bhejegā tāki vah bhī tabāh ho jāeṅ jo pahale hamloṅ se bach kar chhup gae haiṅ. ²¹un se dahshat na khā, kyūṅki rabb terā ḵẖudā tere darmiyān hai. vah azīm ḵẖudā hai jis se sab ḵẖauf khāte haiṅ. ²²vah raftā raftā un qaumoṅ ko tere āge se bhagā degā. tū unheṅ ek dam ḵẖatm nahīṅ kar sakegā, varnā jaṅglī jānvar tezī se baṛh kar tujhe nuqsān pahuchāeṅge.

²³rabb terā ḵẖudā unheṅ tere havāle kar degā. vah un meṅ itnī saḵẖt afrā-tafrī paidā karegā ki vah barbād ho jāeṅge. ²⁴vah un ke bādshāhoṅ ko bhī tere qābū meṅ kar degā, aur tū un kā nām-o-nishān miṭā degā. koī bhī terā sāmnā nahīṅ kar sakegā balki tū un sab ko barbād kar degā.

²⁵un ke devtāoṅ ke mujassme jalā denā. jo chāṅdī aur sonā un par chaṛhāyā huā hai us kā lālach na karnā. use na lenā varnā tū phaṅs jāegā. kyūṅki in chīzoṅ se rabb tere ḵẖudā ko ghin ātī hai. ²⁶is tarah kī makrūh chīz apne ghar meṅ na lānā, varnā tujhe bhī us ke sāth alag karke barbād kiyā jāegā. tere dil meṅ us se shadīd nafrat aur ghin ho, kyūṅki use pūre taur par barbād karne ke liye maḵẖsūs kiyā gayā hai.