Istisnā 6

sab se baṛā hukm

¹yah vah tamām ahkām haiṅ jo rabb tumhāre ḵẖudā ne mujhe tumheṅ sikhāne ke liye kahā. us mulk meṅ in par amal karnā jis meṅ tum jāne vāle ho tāki us par qabzā karo. ²umr bhar tū, tere bacche aur pote-navāse rabb apne ḵẖudā kā ḵẖauf māneṅ aur us ke un tamām ahkām par chaleṅ jo maiṅ tujhe de rahā hūṅ. tab tū der tak jītā rahegā. ³ai isrāīl, yah merī bāteṅ sun aur baṛī ehatiyāt se in par amal kar! phir rabb tere ḵẖudā kā vādā pūrā ho jāegā ki tū kāmyāb rahegā aur terī tādād us mulk meṅ ḵẖūb baṛhtī jāegī jis meṅ dūdh aur shahad kī kasrat hai.

⁴sun ai isrāīl! rabb hamārā ḵẖudā ek hī rabb hai. ⁵rabb apne ḵẖudā se apne pūre dil, apnī pūrī jān aur apnī pūrī tāqat se piyār karnā. ⁶jo ahkām maiṅ tujhe āj batā rahā hūṅ unheṅ apne dil par naqsh kar. ⁷unheṅ apne bacchoṅ ke zahananashīn karā. yahī bāteṅ har vaqt aur har jagah tere laboṅ par hoṅ ḵẖwāh tū ghar meṅ baiṭhā yā rāste par chaltā ho, leṭā ho yā khaṛā ho. ⁸unheṅ nishān ke taur par aur yāddahānī ke liye apne bāzūoṅ aur māthe par lagā. ⁹unheṅ apne gharoṅ kī chaukhṭoṅ aur apne shaharoṅ ke darvāzoṅ par likh.

¹⁰rabb tere ḵẖudā kā vādā pūrā hogā jo us ne qasam khā kar tere bāpdādā ibrāhīm, ishāq aur yāqūb ke sāth kiyā ki maiṅ tujhe kan’ān meṅ le jāūṅgā. jo baṛe aur shāndār shahar us meṅ haiṅ vah tū ne ḵẖud nahīṅ banāe. ¹¹jo makān us meṅ haiṅ vah aisī acchhī chīzoṅ se bhare hue haiṅ jo tū ne un meṅ nahīṅ rakhīṅ. jo kueṅ us meṅ haiṅ un ko tū ne nahīṅ khodā. jo aṅgūr aur zaitūn ke bāġ us meṅ haiṅ unheṅ tū ne nahīṅ lagāyā. yah haqīqat yād rakh. jab tū us mulk meṅ kasrat kā khānā khā kar ser ho jāegā ¹²to ḵẖabardār! rabb ko na bhūlnā jo tujhe misr kī ġulāmī se nikāl lāyā.

¹³rabb apne ḵẖudā kā ḵẖauf mānnā. sirf usī kī ibādat karnā aur usī kā nām le kar qasam khānā. ¹⁴dīgar mābūdoṅ kī pairvī na karnā. is meṅ tamām paṛosī aqvām ke devtā bhī shāmil haiṅ. ¹⁵varnā rabb tere ḵẖudā kā ġazab tujh par nāzil ho kar tujhe mulk meṅ se miṭā ḍālegā. kyūṅki vah ġayūr ḵẖudā hai aur tere darmiyān hī rahatā hai.

¹⁶rabb apne ḵẖudā ko us tarah na āzmānā jis tarah tum ne massā meṅ kiyā thā. ¹⁷dhyān se rabb apne ḵẖudā ke ahkām ke mutābiq chalo, un tamām hidāyāt aur qavānīn par jo us ne tujhe die haiṅ. ¹⁸jo kuchh rabb kī nazar meṅ durust aur acchhā hai vah kar. phir tū kāmyāb rahegā, tū jā kar us acchhe mulk par qabzā karegā jis kā vādā rabb ne tere bāpdādā se qasam khā kar kiyā thā. ¹⁹tab rabb kī bāt pūrī ho jāegī ki tū apne dushmanoṅ ko apne āge āge nikāl degā.

²⁰āne vāle dinoṅ meṅ tere bacche pūchheṅge, “rabb hamāre ḵẖudā ne āp ko in tamām ahkām par amal karne ko kyūṅ kahā?” ²¹phir unheṅ javāb denā, “ham misr ke bādshāh firaaun ke ġulām the, lekin rabb hameṅ baṛī qudrat kā izhār karke misr se nikāl lāyā. ²²hamāre dekhte dekhte us ne baṛe baṛe nishān aur mojize kie aur misr, firaaun aur us ke pūre gharāne par haulnāk musībateṅ bhejīṅ. ²³us vaqt vah hameṅ vahāṅ se nikāl lāyā tāki hameṅ le kar vah mulk de jis kā vādā us ne qasam khā kar hamāre bāpdādā ke sāth kiyā thā. ²⁴rabb hamāre ḵẖudā hī ne hameṅ kahā ki in tamām ahkām ke mutābiq chalo aur rabb apne ḵẖudā kā ḵẖauf māno. kyūṅki agar ham aisā kareṅ to phir ham hameshā kāmyāb aur zindā raheṅge. aur āj tak aisā hī rahā hai. ²⁵agar ham rabb apne ḵẖudā ke huzūr rah kar ehatiyāt se un tamām bātoṅ par amal kareṅge jo us ne hameṅ karne ko kahī haiṅ to vah hameṅ rāstbāz qarār degā.”