Istisnā 34

mūsā kī vafāt

¹yah barkat de kar mūsā moāb kā maidānī ilāqā chhoṛ kar yarīhū ke muqābil nabū pahāṛ par chaṛh gayā. nabū pisgā ke pahāṛī silsile kī ek choṭī thā. vahāṅ se rabb ne use vah pūrā mulk dikhāyā jo vah isrāīl ko dene vālā thā yānī jiliād ke ilāqe se le kar dān ke ilāqe tak, ²naftālī kā pūrā ilāqā, ifrāīm aur manassī kā ilāqā, yahūdāh kā ilāqā bahīrā-e-rūm tak, ³junūb meṅ dasht-e-najab aur khajūr ke shahar yarīhū kī vādī se le kar zuġar tak. ⁴rabb ne us se kahā, “yah vah mulk hai jis kā vādā maiṅ ne qasam khā kar ibrāhīm, ishāq aur yāqūb se kiyā. maiṅ ne un se kahā thā ki un kī aulād ko yah mulk milegā. tū us meṅ dāḵẖil nahīṅ hogā, lekin maiṅ tujhe yahāṅ le āyā hūṅ tāki tū use apnī āṅkhoṅ se dekh sake.”

⁵is ke bād rabb kā ḵẖādim mūsā vahīṅ moāb ke mulk meṅ faut huā, bilkul usī tarah jis tarah rabb ne kahā thā. ⁶rabb ne use bait-faġūr kī kisī vādī meṅ dafan kiyā, lekin āj tak kisī ko bhī mālūm nahīṅ ki us kī qabr kahāṅ hai.

⁷apnī vafāt ke vaqt mūsā 120 sāl kā thā. āḵẖir tak na us kī āṅkheṅ dhundalāīṅ, na us kī tāqat kam huī. ⁸isrāīliyoṅ ne moāb ke maidānī ilāqe meṅ 30 din tak us kā mātam kiyā.

⁹phir yashūa bin nūn mūsā kī jagah khaṛā huā. vah hikmat kī rūh se māmūr thā, kyūṅki mūsā ne apne hāth us par rakh die the. isrāīliyoṅ ne us kī sunī aur vah kuchh kiyā jo rabb ne unheṅ mūsā kī mārifat batāyā thā.

¹⁰is ke bād isrāīl meṅ mūsā jaisā nabī kabhī na uṭhā jis se rabb rū-ba-rū bāt kartā thā. ¹¹kisī aur nabī ne aise ilāhī nishān aur mojize nahīṅ kie jaise mūsā ne firaaun bādshāh, us ke mulāzimoṅ aur pūre mulk ke sāmne kie jab rabb ne use misr bhejā. ¹²kisī aur nabī ne is qism kā baṛā iḵẖtiyār na dikhāyā, na aise azīm aur haibtanāk kām kie jaise mūsā ne isrāīliyoṅ ke sāmne kie.