Istisnā 30

taubā ke musbat natīje

¹maiṅ ne tujhe batāyā hai ki tere liye kyā kuchh barkat kā aur kyā kuchh lānat kā bāis hai. jab rabb terā ḵẖudā tujhe terī ġalat harkatoṅ ke sabab se muḵẖtalif qaumoṅ meṅ muntashir kar degā to tū merī bāteṅ mān jāegā. ²tab tū aur terī aulād rabb apne ḵẖudā ke pās vāpas āeṅge aur pūre dil-o-jān se us kī sun kar un tamām ahkām par amal kareṅge jo maiṅ āj tujhe de rahā hūṅ. ³phir rabb terā ḵẖudā tujhe bahāl karegā aur tujh par raham karke tujhe un tamām qaumoṅ se nikāl kar jamā karegā jin meṅ us ne tujhe muntashir kar diyā thā. ⁴hāṅ, rabb terā ḵẖudā tujhe har jagah se jamā karke vāpas lāegā, chāhe tū sab se dūr mulk meṅ kyūṅ na paṛā ho. ⁵vah tujhe tere bāpdādā ke mulk meṅ lāegā, aur tū us par qabzā karegā. phir vah tujhe tere bāpdādā se ziyādā kāmyābī baḵẖshegā, aur terī tādād ziyādā baṛhāegā.

⁶ḵẖatnā rabb kī qaum kā zāhirī nishān hai. lekin us vaqt rabb terā ḵẖudā tere aur terī aulād kā bātinī ḵẖatnā karegā tāki tū use pūre dil-o-jān se piyār kare aur jītā rahe. ⁷jo lānteṅ rabb terā ḵẖudā tujh par lāyā thā unheṅ vah ab tere dushmanoṅ par āne degā, un par jo tujh se nafrat rakhte aur tujhe īzā pahuṅchāte haiṅ. ⁸kyūṅki tū dubārā rabb kī sunegā aur us ke tamām ahkām kī pairvī karegā jo maiṅ tujhe āj de rahā hūṅ. ⁹jo kuchh bhī tū karegā us meṅ rabb tujhe baṛī kāmyābī baḵẖshegā, aur tujhe kasrat kī aulād, maveshī aur fasleṅ hāsil hoṅgī. kyūṅki jis tarah vah tere bāpdādā ko kāmyābī dene meṅ ḵẖushī mahsūs kartā thā usī tarah vah tujhe bhī kāmyābī dene meṅ ḵẖushī mahsūs karegā.

¹⁰shart sirf yah hai ki tū rabb apne ḵẖudā kī sune, sharīat meṅ darj us ke ahkām par amal kare aur pūre dil-o-jān se us kī taraf rujū lāe.

¹¹jo ahkām maiṅ āj tujhe de rahā hūṅ na vah hadd se ziyādā mushkil haiṅ, na terī pahuṅch se bāhar. ¹²vah āsmān par nahīṅ haiṅ ki tū kahe, ‘kaun āsmān par chaṛh kar hamāre liye yah ahkām nīche le āe tāki ham unheṅ sun sakeṅ aur un par amal kar sakeṅ?’ ¹³vah samundar ke pār bhī nahīṅ haiṅ ki tū kahe, ‘kaun samundar ko pār karke hamāre liye yah ahkām lāegā tāki ham unheṅ sun sakeṅ aur un par amal kar sakeṅ?’ ¹⁴kyūṅki yah kalām tere nihāyat qarīb balki tere muṅh aur dil meṅ maujūd hai. chunāṅche us par amal karne meṅ koī bhī rukāvaṭ nahīṅ hai.

zindagī yā maut kā chunāo

¹⁵dekh, āj maiṅ tujhe do rāste pesh kartā hūṅ. ek zindagī aur ḵẖushhālī kī taraf le jātā hai jabki dūsrā maut aur halākat kī taraf. ¹⁶āj maiṅ tujhe hukm detā hūṅ ki rabb apne ḵẖudā ko piyār kar, us kī rāhoṅ par chal aur us ke ahkām ke tābe rah. phir tū zindā rah kar taraqqī karegā, aur rabb terā ḵẖudā tujhe us mulk meṅ barkat degā jis meṅ tū dāḵẖil hone vālā hai.

¹⁷lekin agar terā dil is rāste se haṭ kar nāfarmānī kare to barkat kī tavaqqo na kar. agar tū āzmāish meṅ paṛ kar dīgar mābūdoṅ ko sijdā aur un kī ḵẖidmat kare ¹⁸to tum zarūr tabāh ho jāoge. āj maiṅ elān kartā hūṅ ki is sūrat meṅ tum ziyādā der us mulk meṅ ābād nahīṅ rahoge jis meṅ tū daryā-e-yardan ko pār karke dāḵẖil hogā tāki us par qabzā kare.

¹⁹āj āsmān aur zamīn tumhāre ḵẖilāf mere gavāh haiṅ ki maiṅ ne tumheṅ zindagī aur barkatoṅ kā rāstā aur maut aur lāntoṅ kā rāstā pesh kiyā hai. ab zindagī kā rāstā iḵẖtiyār kar tāki tū aur terī aulād zindā rahe. ²⁰rabb apne ḵẖudā ko piyār kar, us kī sun aur us se lipṭā rah. kyūṅki vahī terī zindagī hai aur vahī karegā ki tū der tak us mulk meṅ jītā rahegā jis kā vādā us ne qasam khā kar tere bāpdādā ibrāhīm, ishāq aur yāqūb se kiyā thā.”