Istisnā 28

faramāṁbardārī kī barkateṅ

¹rabb terā ḵẖudā tujhe duniyā kī tamām qaumoṅ par sarfarāz karegā. shart yah hai ki tū us kī sune aur ehatiyāt se us ke un tamām ahkām par amal kare jo maiṅ tujhe āj de rahā hūṅ. ²rabb apne ḵẖudā kā faramāṁbardār rah to tujhe har tarah kī barkat hāsil hogī. ³rabb tujhe shahar aur dīhāt meṅ barkat degā. ⁴terī aulād phale phūlegī, terī acchhī-ḵẖāsī fasleṅ pakeṅgī, tere gāy-bailoṅ aur bheṛ-bakriyoṅ ke bacche taraqqī kareṅge. ⁵terā ṭokrā phal se bharā rahegā, aur āṭā gūṅdhne kā terā bartan āṭe se ḵẖālī nahīṅ hogā. ⁶rabb tujhe ghar meṅ āte aur vahāṅ se nikalte vaqt barkat degā.

⁷jab tere dushman tujh par hamlā kareṅge to vah rabb kī madad se shikast khāeṅge. go vah mil kar tujh par hamlā kareṅ to bhī tū unheṅ chāroṅ taraf muntashir kar degā.

⁸allāh tere har kām meṅ barkat degā. anāj kī kasrat ke sabab se tere godām bhare raheṅge. rabb terā ḵẖudā tujhe us mulk meṅ barkat degā jo vah tujhe dene vālā hai. ⁹rabb apnī qasam ke mutābiq tujhe apnī maḵẖsūs-o-muqaddas qaum banāegā agar tū us ke ahkām par amal kare aur us kī rāhoṅ par chale. ¹⁰phir duniyā kī tamām qaumeṅ tujh se ḵẖauf khāeṅgī, kyūṅki vah dekheṅgī ki tū rabb kī qaum hai aur us ke nām se kahalātā hai.

¹¹rabb tujhe bahut aulād degā, tere revaṛ baṛhāegā aur tujhe kasrat kī fasleṅ degā. yūṅ vah tujhe us mulk meṅ barkat degā jis kā vādā us ne qasam khā kar tere bāpdādā se kiyā. ¹²rabb āsmān ke ḵẖazānoṅ ko khol kar vaqt par terī zamīn par bārish barasāegā. vah tere har kām meṅ barkat degā. tū bahut sī qaumoṅ ko udhār degā lekin kisī kā bhī qarzdār nahīṅ hogā. ¹³rabb tujhe qaumoṅ kī dum nahīṅ balki un kā sar banāegā. tū taraqqī kartā jāegā aur zavāl kā shikār nahīṅ hogā. lekin shart yah hai ki tū rabb apne ḵẖudā ke vah ahkām mān kar un par amal kare jo maiṅ tujhe āj de rahā hūṅ. ¹⁴jo kuchh bhī maiṅ ne tujhe karne ko kahā hai us se kisī tarah bhī haṭ kar zindagī na guzārnā. na dīgar mābūdoṅ kī pairvī karnā, na un kī ḵẖidmat karnā.

nāfarmānī kī lānteṅ

¹⁵lekin agar tū rabb apne ḵẖudā kī na sune aur us ke un tamām ahkām par amal na kare jo maiṅ āj tujhe de rahā hūṅ to har tarah kī lānat tujh par āegī. ¹⁶shahar aur dīhāt meṅ tujh par lānat hogī. ¹⁷tere ṭokre aur āṭā gūṅdhne ke tere bartan par lānat hogī. ¹⁸terī aulād par, tere gāy-bailoṅ aur bheṛ-bakriyoṅ ke bacchoṅ par aur tere khetoṅ par lānat hogī. ¹⁹ghar meṅ āte aur vahāṅ se nikalte vaqt tujh par lānat hogī. ²⁰agar tū ġalat kām karke rabb ko chhoṛe to jo kuchh bhī tū kare vah tujh par lānteṅ, pareshāniyāṅ aur musībateṅ āne degā. tab terā jaldī se satyānās hogā, aur tū halāk ho jāegā.

²¹rabb tujh meṅ vabāī bīmāriyāṅ phailāegā jin ke sabab se tujh meṅ se koī us mulk meṅ zindā nahīṅ rahegā jis par tū abhī qabzā karne vālā hai. ²²rabb tujhe muhalak bīmāriyoṅ, buḵẖār aur sūjan se māregā. jhulsāne vālī garmī, kāl, patrog aur phaphūṅdī terī fasleṅ ḵẖatm karegī. aisī musībatoṅ ke bāis tū tabāh ho jāegā. ²³tere ūpar āsmān pītal jaisā saḵẖt hogā jabki tere nīche zamīn lohe kī mānind hogī. ²⁴bārish kī jagah rabb tere mulk par gard aur ret barasāegā jo āsmān se tere mulk par chhā kar tujhe barbād kar degī.

²⁵jab tū apne dushmanoṅ kā sāmnā kare to rabb tujhe shikast dilāegā. go tū mil kar un kī taraf baṛhegā to bhī un se bhāg kar chāroṅ taraf muntashir ho jāegā. duniyā ke tamām mamālik meṅ logoṅ ke roṅgṭe khaṛe ho jāeṅge jab vah terī musībateṅ dekheṅge. ²⁶parinde aur jaṅglī jānvar terī lāshoṅ ko khā jāeṅge, aur unheṅ bhagāne vālā koī nahīṅ hogā. ²⁷rabb tujhe un hī phoṛoṅ se māregā jo misriyoṅ ko nikle the. aise jildī amrāz phaileṅge jin kā ilāj nahīṅ hai. ²⁸tū pāgalpan kā shikār ho jāegā, rabb tujhe aṅdhāpan aur zahanī abtarī meṅ mubtalā kar degā. ²⁹dopahar ke vaqt bhī tū aṅdhe kī tarah ṭaṭol ṭaṭol kar phiregā. jo kuchh bhī tū kare us meṅ nākām rahegā. roz-ba-roz log tujhe dabāte aur lūṭte raheṅge, aur tujhe bachāne vālā koī nahīṅ hogā.

³⁰terī maṅgnī kisī aurat se hogī to koī aur ā kar us kī ismatdarī karegā. tū apne liye ghar banāegā lekin us meṅ nahīṅ rahegā. tū apne liye aṅgūr kā bāġ lagāegā lekin us kā phal nahīṅ khāegā. ³¹tere dekhte dekhte terā bail zabah kiyā jāegā, lekin tū us kā gosht nahīṅ khāegā. terā gadhā tujh se chhīn liyā jāegā aur vāpas nahīṅ kiyā jāegā. terī bheṛ-bakriyāṅ dushman ko dī jāeṅgī, aur unheṅ chhuṛāne vālā koī nahīṅ hogā. ³²tere beṭe-beṭiyoṅ ko kisī dūsrī qaum ko diyā jāegā, aur tū kuchh nahīṅ kar sakegā. roz-ba-roz tū apne bacchoṅ ke intizār meṅ ufaq ko taktā rahegā, lekin dekhte dekhte terī āṅkheṅ dhundalā jāeṅgī.

³³ek ajnabī qaum terī zamīn kī paidāvār aur terī mehanat-o-mashaqqat kī kamāī le jāegī. tujhe umr bhar zulm aur dabāo bardāsht karnā paṛegā.

³⁴jo haulnāk bāteṅ terī āṅkheṅ dekheṅgī un se tū pāgal ho jāegā. ³⁵rabb tujhe taklīfdih aur lāilāj phoṛoṅ se māregā jo talve se le kar chāṅdī tak pūre jism par phail kar tere ghuṭnoṅ aur ṭāṅgoṅ ko mut’assir kareṅge.

³⁶rabb tujhe aur tere muqarrar kie hue bādshāh ko ek aise mulk meṅ le jāegā jis se na tū aur na tere bāpdādā vāqif the. vahāṅ tū dīgar mābūdoṅ yānī lakṛī aur patthar ke butoṅ kī ḵẖidmat karegā. ³⁷jis jis qaum meṅ rabb tujhe hāṅk degā vahāṅ tujhe dekh kar logoṅ ke roṅgṭe khaṛe ho jāeṅge aur vah terā mazāq uṛāeṅge. tū un ke liye ibrat’aṅgez misāl hogā.

³⁸tū apne khetoṅ meṅ bahut bīj bone ke bāvujūd kam hī fasal kāṭegā, kyūṅki ṭiḍḍe use khā jāeṅge. ³⁹tū aṅgūr ke bāġ lagā kar un par ḵẖūb mehanat karegā lekin na un ke aṅgūr toṛegā, na un kī mai piegā, kyūṅki kīṛe unheṅ khā jāeṅge. ⁴⁰go tere pūre mulk meṅ zaitūn ke daraḵẖt hoṅge to bhī tū un kā tel istemāl nahīṅ kar sakegā, kyūṅki zaitūn ḵẖarāb ho kar zamīn par gir jāeṅge.

⁴¹tere beṭe-beṭiyāṅ to hoṅge, lekin tū un se maharūm ho jāegā. kyūṅki unheṅ giriftār karke kisī ajnabī mulk meṅ le jāyā jāegā. ⁴²ṭiḍḍiyoṅ ke ġol tere mulk ke tamām daraḵẖtoṅ aur fasloṅ par qabzā kar leṅge. ⁴³tere darmiyān rahane vālā pardesī tujh se baṛh kar taraqqī kartā jāegā jabki tujh par zavāl ā jāegā. ⁴⁴us ke pās tujhe udhār dene ke liye paise hoṅge jabki tere pās use udhār dene ko kuchh nahīṅ hogā. āḵẖir meṅ vah sar aur tū dum hogā.

⁴⁵yah tamām lānteṅ tujh par ān paṛeṅgī. jab tak tū tabāh na ho jāe vah terā tāqqub kartī raheṅgī, kyūṅki tū ne rabb apne ḵẖudā kī na sunī aur us ke ahkām par amal na kiyā. ⁴⁶yūṅ yah hameshā tak tere aur terī aulād ke liye ek mojizānā aur ibrat’aṅgez ilāhī nishān raheṅgī.

⁴⁷chūṅki tū ne dilī ḵẖushī se us vaqt rabb apne ḵẖudā kī ḵẖidmat na kī jab tere pās sab kuchh thā ⁴⁸is liye tū un dushmanoṅ kī ḵẖidmat karegā jinheṅ rabb tere ḵẖilāf bhejegā. tū bhūkā, piyāsā, naṅgā aur har chīz kā hājatmand hogā, aur rabb terī gardan par lohe kā jūā rakh kar tujhe mukammal tabāhī tak le jāegā.

⁴⁹rabb tere ḵẖilāf ek qaum khaṛī karegā jo dūr se balki duniyā kī intihā se ā kar uqāb kī tarah tujh par jhapaṭṭā māregī. vah aisī zabān bolegī jis se tū vāqif nahīṅ hogā. ⁵⁰vah saḵẖt qaum hogī jo na buzurgoṅ kā lihāz karegī aur na bacchoṅ par raham karegī. ⁵¹vah tere maveshī aur fasleṅ khā jāegī aur tū bhūkoṅ mar jāegā. tū halāk ho jāegā, kyūṅki tere liye kuchh nahīṅ bachegā, na anāj, na mai, na tel, na gāy-bailoṅ yā bheṛ-bakriyoṅ ke bacche. ⁵²dushman tere mulk ke tamām shaharoṅ kā muhāsarā karegā. āḵẖirkār jin ūṅchī aur mazbūt fasīloṅ par tū etimād karegā vah bhī sab gir paṛeṅgī. dushman us mulk kā koī bhī shahar nahīṅ chhoṛegā jo rabb terā ḵẖudā tujhe dene vālā hai.

⁵³jab dushman tere shaharoṅ kā muhāsarā karegā to tū un meṅ itnā shadīd bhūkā ho jāegā ki apne bacchoṅ ko khā legā jo rabb tere ḵẖudā ne tujhe die haiṅ. ^54-55 muhāsare ke daurān tum meṅ se sab se sharīf aur shāistā ādmī bhī apne bacche ko zabah karke khāegā, kyūṅki us ke pās koī aur ḵẖurāk nahīṅ hogī. us kī hālat itnī burī hogī ki vah use apne sage bhāī, bīvī yā bāqī bacchoṅ ke sāth taqsīm karne ke liye tayyār nahīṅ hogā. ^56-57 tum meṅ se sab se sharīf aur shāistā aurat bhī aisā hī karegī, agarchi pahale vah itnī nāzuk thī ki farsh ko apne talve se chhūne kī jur’at nahīṅ kartī thī. muhāsare ke daurān use itnī shadīd bhūk hogī ki jab us ke bacchā paidā hogā to vah chhup chhup kar use khāegī. na sirf yah balki vah paidāish ke vaqt bacche ke sāth ḵẖārij huī ālāīsh bhī khāegī aur use apne shauhar yā apne bāqī bacchoṅ meṅ bāṅṭne ke liye tayyār nahīṅ hogī. itnī musībat tujh par muhāsare ke daurān āegī.

⁵⁸ġaraz ehatiyāt se sharīat kī un tamām bātoṅ kī pairvī kar jo is kitāb meṅ darj haiṅ, aur rabb apne ḵẖudā ke purjalāl aur bārob nām kā ḵẖauf mānnā. ⁵⁹varnā vah tujh aur terī aulād meṅ saḵẖt aur lāilāj amrāz aur aisī dahshatanāk vabāeṅ phailāegā jo rokī nahīṅ jā sakeṅgī. ⁶⁰jin tamām vabāoṅ se tū misr meṅ dahshat khātā thā vah ab tere darmiyān phail kar tere sāth chimṭī raheṅgī. ⁶¹na sirf sharīat kī is kitāb meṅ bayān kī huī bīmāriyāṅ aur musībateṅ tujh par āeṅgī balki rabb aur bhī tujh par bhejegā, jab tak ki tū halāk na ho jāe.

⁶²agar tū rabb apne ḵẖudā kī na sune to āḵẖirkār tum meṅ se bahut kam bache raheṅge, go tum pahale sitāroṅ jaise beshumār the. ⁶³jis tarah pahale rabb ḵẖushī se tumheṅ kāmyābī detā aur tumhārī tādād baṛhātā thā usī tarah ab vah tumheṅ barbād aur tabāh karne meṅ ḵẖushī mahsūs karegā. tumheṅ zabardastī us mulk se nikālā jāegā jis par tū is vaqt dāḵẖil ho kar qabzā karne vālā hai. ⁶⁴tab rabb tujhe duniyā ke ek sire se le kar dūsre sire tak tamām qaumoṅ meṅ muntashir kar degā. vahāṅ tū dīgar mābūdoṅ kī pūjā karegā, aise devtāoṅ kī jin se na tū aur na tere bāpdādā vāqif the.

⁶⁵un mamālik meṅ bhī na tū ārām-o-sukūn pāegā, na tere pāoṅ jam jāeṅge. rabb hone degā ki terā dil thartharātā rahegā, terī āṅkheṅ pareshānī ke bāis dhundalā jāeṅgī aur terī jān se ummīd kī har kiran jātī rahegī. ⁶⁶terī jān har vaqt ḵẖatre meṅ hogī aur tū din rāt dahshat khāte hue marne kī tavaqqo karegā. ⁶⁷subah uṭh kar tū kahegā, “kāsh shām ho!” aur shām ke vaqt, “kāsh subah ho!” kyūṅki jo kuchh tū dekhegā us se tere dil ko dahshat gher legī.

⁶⁸rabb tujhe jahāzoṅ meṅ biṭhā kar misr vāpas le jāegā agarchi maiṅ ne kahā thā ki tū use dubārā kabhī nahīṅ dekhegā. vahāṅ pahuṅch kar tum apne dushmanoṅ se bāt karke apne āp ko ġulām ke taur par bechane kī koshish karoge, lekin koī bhī tumheṅ ḵẖarīdnā nahīṅ chāhegā.”