Istisnā 25
koṛe lagāne kī munāsib sazā
1agar log apnā ek dūsre ke sāth jhagṛā ḵẖud nipṭā na sakeṅ to vah apnā muāmalā adālat meṅ pesh kareṅ. qāzī faislā kare ki kaun bequsūr hai aur kaun mujrim. 2agar mujrim ko koṛe lagāne kī sazā denī hai to use qāzī ke sāmne hī muṅh ke bal zamīn par liṭānā. phir use itne koṛe lagāe jāeṅ jitnoṅ ke vah lāiq hai. 3lekin us ko ziyādā se ziyādā 40 koṛe lagāne haiṅ, varnā tere isrāīlī bhāī kī sar-e-ām beizzatī ho jāegī.
bail kā muṅh na bāṅdhnā
4jab tū fasal gāhane ke liye us par bail chalne detā hai to us kā muṅh bāṅdh kar na rakhnā.
marhūm bhāī kī bīvī se shādī karne kā hukm
5agar koī shādīshudā mard beaulād mar jāe aur us kā sagā bhāī sāth rahe to us kā farz hai ki bevā se shādī kare. bevā shauhar ke ḵẖāndān se haṭ kar kisī aur se shādī na kare balki sirf apne devar se. 6pahalā beṭā jo is rishte se paidā hogā pahale shauhar ke beṭe kī haisiyat rakhegā. yūṅ us kā nām qāim rahegā.
7lekin agar devar bhābī se shādī karnā na chāhe to bhābī shahar ke darvāze par jamā hone vāle buzurgoṅ ke pās jāe aur un se kahe, “merā devar mujh se shādī karne se inkār kartā hai. vah apnā farz adā karne ko tayyār nahīṅ ki apne bhāī kā nām qāim rakhe.” 8phir shahar ke buzurg devar ko bulā kar use samjhāeṅ. agar vah is ke bāvujūd bhī us se shādī karne se inkār kare 9to us kī bhābī buzurgoṅ kī maujūdgī meṅ us ke pās jā kar us kī ek chappal utār le. phir vah us ke muṅh par thūk kar kahe, “us ādmī se aisā sulūk kiyā jātā hai jo apne bhāī kī nasal qāim rakhne ko tayyār nahīṅ.” 10āindā isrāīl meṅ devar kī nasal “naṅge pāoṅ vāle kī nasal” kahalāegī.
jhagṛe meṅ nāzebā harkateṅ
11agar do ādmī laṛ rahe hoṅ aur ek kī bīvī apne shauhar ko bachāne kī ḵẖātir muḵẖālif ke uzv-e-tanāsul ko pakaṛ le 12to lāzim hai ki tū aurat kā hāth kāṭ ḍāle. us par raham na karnā.
dhokā na denā
13tolte vaqt apne thaile meṅ sahīh vazan ke bāṭ rakh, aur dhokā dene ke liye halke bāṭ sāth na rakhnā. 14isī tarah apne ghar meṅ anāj kī paimāish karne kā sahīh bartan rakh, aur dhokā dene ke liye chhoṭā bartan sāth na rakhnā. 15sahīh vazan ke bāṭ aur paimāish karne ke sahīh bartan istemāl karnā tāki tū der tak us mulk meṅ jītā rahe jo rabb terā ḵẖudā tujhe degā. 16kyūṅki use har dhokebāz se ghin hai.
amālīqiyoṅ ko sazā denā
17yād rahe ki amālīqiyoṅ ne tujh se kyā kuchh kiyā jab tum misr se nikal kar safar kar rahe the. 18jab tū thakāhārā thā to vah tujh par hamlā karke pīchhe pīchhe chalne vāle tamām kamzoroṅ ko jān se mārte rahe. vah allāh kā ḵẖauf nahīṅ mānte the. 19chunāṅche jab rabb terā ḵẖudā tujhe ird-gird ke tamām dushmanoṅ se sukūn degā aur tū us mulk meṅ ābād hogā jo vah tujhe mīrās meṅ de rahā hai tāki tū us par qabzā kare to amālīqiyoṅ ko yūṅ halāk kar ki duniyā meṅ un kā nām-o-nishān na rahe. yah bāt mat bhūlnā.