Istisnā 24

talāq aur dubārā shādī

¹ho saktā hai koī ādmī kisī aurat se shādī kare lekin bād meṅ use pasand na kare, kyūṅki use bīvī ke bāre meṅ kisī sharmanāk bāt kā patā chal gayā hai. vah talāqnāmā likh kar use aurat ko detā aur phir use ghar se vāpas bhej detā hai. ²is ke bād us aurat kī shādī kisī aur mard se ho jātī hai, ³aur vah bhī bād meṅ use pasand nahīṅ kartā. vah bhī talāqnāmā likh kar use aurat ko detā aur phir use ghar se vāpas bhej detā hai. ḵẖwāh dūsrā shauhar use vāpas bhej de yā shauhar mar jāe, ⁴aurat ke pahale shauhar ko us se dubārā shādī karne kī ijāzat nahīṅ hai, kyūṅki vah aurat us ke liye nāpāk hai. aisī harkat rabb kī nazar meṅ qābil-e-ghin hai. us mulk ko yūṅ gunāh’ālūdā na karnā jo rabb terā ḵẖudā tujhe mīrās meṅ de rahā hai.

mazīd hidāyāt

⁵agar kisī ādmī ne abhī abhī shādī kī ho to tū use bhartī karke jaṅg karne ke liye nahīṅ bhej saktā. tū use koī bhī aisī zimmādārī nahīṅ de saktā, jis se vah ghar se dūr rahane par majbūr ho jāe. ek sāl tak vah aisī zimmādāriyoṅ se barī rahe tāki ghar meṅ rah kar apnī bīvī ko ḵẖush kar sake.

⁶agar koī tujh se udhār le to zamānat ke taur par us se na us kī chhoṭī chakkī, na us kī baṛī chakkī kā pāṭ lenā, kyūṅki aisā karne se tū us kī jān legā yānī tū vah chīz legā jis se us kā guzārā hotā hai.

⁷agar kisī ādmī ko pakṛā jāe jis ne apne hamvatan ko aġvā karke ġulām banā liyā yā bech diyā hai to use sazā-e-maut denā hai. yūṅ tū apne darmiyān se burāī miṭā degā.

⁸agar koī vabāī jildī bīmārī tujhe lag jāe to baṛī ehatiyāt se lāvī ke qabīle ke imāmoṅ kī tamām hidāyāt par amal karnā. jo bhī hukm maiṅ ne unheṅ diyā use pūrā karnā. ⁹yād kar ki rabb tere ḵẖudā ne mariyam ke sāth kyā kiyā jab tum misr se nikal kar safar kar rahe the.

ġarīboṅ ke huqūq

¹⁰apne hamvatan ko udhār dete vaqt us ke ghar meṅ na jānā tāki zamānat kī koī chīz mile ¹¹balki bāhar ṭhahar kar intizār kar ki vah ḵẖud ghar se zamānat kī chīz nikāl kar tujhe de. ¹²agar vah itnā zarūratmand ho ki sirf apnī chādar de sake to rāt ke vaqt zamānat tere pās na rahe. ¹³use sūraj ḍūbne tak vāpas karnā tāki qarzdār us meṅ lipaṭ kar so sake. phir vah tujhe barkat degā aur rabb terā ḵẖudā terā yah qadam rāst qarār degā.

¹⁴zarūratmand mazdūr se ġalat fāidā na uṭhānā, chāhe vah isrāīlī ho yā pardesī. ¹⁵use rozānā sūraj ḍūbne se pahale pahale us kī mazdūrī de denā, kyūṅki is se us kā guzārā hotā hai. kahīṅ vah rabb ke huzūr terī shikāyat na kare aur tū qusūrvār ṭhahare.

¹⁶vālidain ko un ke bacchoṅ ke jarāim ke sabab se sazā-e-maut na dī jāe, na bacchoṅ ko un ke vālidain ke jarāim ke sabab se. agar kisī ko sazā-e-maut denī ho to us gunāh ke sabab se jo us ne ḵẖud kiyā hai.

¹⁷pardesiyoṅ aur yatīmoṅ ke huqūq qāim rakhnā. udhār dete vaqt zamānat ke taur par bevā kī chādar na lenā. ¹⁸yād rakh ki tū bhī misr meṅ ġulām thā aur ki rabb tere ḵẖudā ne fidyā de kar tujhe vahāṅ se chhuṛāyā. isī vajah se maiṅ tujhe yah hukm detā hūṅ.

¹⁹agar tū fasal kī kaṭāī ke vaqt ek pūlā bhūl kar khet meṅ chhoṛ āe to use lāne ke liye vāpas na jānā. use pardesiyoṅ, yatīmoṅ aur bevāoṅ ke liye vahīṅ chhoṛ denā tāki rabb terā ḵẖudā tere har kām meṅ barkat de. ²⁰jab zaitūn kī fasal pak gaī ho to daraḵẖtoṅ ko mār mār kar ek hī bār un meṅ se phal utār. is ke bād unheṅ na chheṛnā. bachā huā phal pardesiyoṅ, yatīmoṅ aur bevāoṅ ke liye chhoṛ denā. ²¹isī tarah apne aṅgūr toṛne ke liye ek hī bār bāġ meṅ se guzarnā. is ke bād use na chheṛnā. bachā huā phal pardesiyoṅ, yatīmoṅ aur bevāoṅ ke liye chhoṛ denā. ²²yād rakh ki tū ḵẖud misr meṅ ġulām thā. isī vajah se maiṅ tujhe yah hukm detā hūṅ.