Istisnā 21
nāmālūm qatl kā kaffārā
1jab tū us mulk meṅ ābād hogā jo rabb tujhe mīrās meṅ de rahā hai tāki tū us par qabzā kare to ho saktā hai ki koī lāsh khule maidān meṅ kahīṅ paṛī pāī jāe. agar mālūm na ho ki kis ne use qatl kiyā hai 2to pahale ird-gird ke shaharoṅ ke buzurg aur qāzī ā kar patā kareṅ ki kaun sā shahar lāsh ke ziyādā qarīb hai. 3phir us shahar ke buzurg ek javān gāy chun leṅ jo kabhī kām ke liye istemāl nahīṅ huī. 4vah use ek aisī vādī meṅ le jāeṅ jis meṅ na kabhī hal chalāyā gayā, na paude lagāe gae hoṅ. vādī meṅ aisī nahar ho jo pūrā sāl bahatī rahe. vahīṅ buzurg javān gāy kī gardan toṛ ḍāleṅ.
5phir lāvī ke qabīle ke imām qarīb āeṅ. kyūṅki rabb tumhāre ḵẖudā ne unheṅ chun liyā hai tāki vah ḵẖidmat kareṅ, rabb ke nām se barkat deṅ aur tamām jhagṛoṅ aur hamloṅ kā faislā kareṅ. 6un ke dekhte dekhte shahar ke buzurg apne hāth gāy kī lāsh ke ūpar dho leṅ. 7sāth sāth vah kaheṅ, “ham ne is shaḵẖs ko qatl nahīṅ kiyā, na ham ne dekhā ki kis ne yah kiyā. 8ai rabb, apnī qaum isrāīl kā yah kaffārā qabūl farmā jise tū ne fidyā de kar chhuṛāyā hai. apnī qaum isrāīl ko is bequsūr ke qatl kā qusūrvār na ṭhaharā.” tab maqtūl kā kaffārā diyā jāegā.
9yūṅ tū aise bequsūr shaḵẖs ke qatl kā dāġ apne darmiyān se miṭā degā. kyūṅki tū ne vahī kuchh kiyā hogā jo rabb kī nazar meṅ durust hai.
jaṅgī qaidī aurat se shādī
10ho saktā hai ki tū apne dushman se jaṅg kare aur rabb tumhārā ḵẖudā tujhe fatah baḵẖshe. jaṅgī qaidiyoṅ ko jamā karte vaqt 11tujhe un meṅ se ek ḵẖūbsūrat aurat nazar ātī hai jis ke sāth terā dil lag jātā hai. tū us se shādī kar saktā hai. 12use apne ghar meṅ le ā. vahāṅ vah apne sar ke bāloṅ ko muṅḍavāe, apne nāḵẖun tarāshe 13aur apne vah kapṛe utāre jo vah pahane hue thī jab use qaid kiyā gayā. vah pūre ek mahīne tak apne vālidain ke liye mātam kare. phir tū us ke pās jā kar us ke sāth shādī kar saktā hai.
14agar vah tujhe kisī vaqt pasand na āe to use jāne de. vah vahāṅ jāe jahāṅ us kā jī chāhe. tujhe use bechane yā us se lauṅḍī kā sā sulūk karne kī ijāzat nahīṅ hai, kyūṅki tū ne use majbūr karke us se shādī kī hai.
pahalauṭhe ke huqūq
15ho saktā hai kisī mard kī do bīviyāṅ hoṅ. ek ko vah piyār kartā hai, dūsrī ko nahīṅ. donoṅ bīviyoṅ ke beṭe paidā hue haiṅ, lekin jis bīvī se shauhar muhabbat nahīṅ kartā us kā beṭā sab se pahale paidā huā. 16jab bāp apnī milkiyat vasiyat meṅ taqsīm kartā hai to lāzim hai ki vah apne sab se baṛe beṭe kā maurūsī haq pūrā kare. use pahalauṭhe kā yah haq us bīvī ke beṭe ko muntaqil karne kī ijāzat nahīṅ jise vah piyār kartā hai. 17use taslīm karnā hai ki us bīvī kā beṭā sab se baṛā hai, jis se vah muhabbat nahīṅ kartā. natījatan use us beṭe ko dūsre beṭoṅ kī nisbat dugnā hissā denā paṛegā, kyūṅki vah apne bāp kī tāqat kā pahalā izhār hai. use pahalauṭhe kā haq hāsil hai.
sarkash beṭā
18ho saktā hai ki kisī kā beṭā haṭdharm aur sarkash ho. vah apne vālidain kī itāat nahīṅ kartā aur un ke tambīh karne aur sazā dene par bhī un kī nahīṅ suntā. 19is sūrat meṅ vālidain use pakaṛ kar shahar ke darvāze par le jāeṅ jahāṅ buzurg jamā hote haiṅ. 20vah buzurgoṅ se kaheṅ, “hamārā beṭā haṭdharm aur sarkash hai. vah hamārī itāat nahīṅ kartā balki ayyāsh aur sharābī hai.” 21yah sun kar shahar ke tamām mard use saṅgasār kareṅ. yūṅ tū apne darmiyān se burāī miṭā degā. tamām isrāīl yah sun kar ḍar jāegā.
sazā-e-maut pāne vāle ko usī din dafnānā hai
22jab tū kisī ko sazā-e-maut de kar us kī lāsh kisī lakṛī yā daraḵẖt se laṭkātā hai 23to use aglī subah tak vahāṅ na chhoṛnā. har sūrat meṅ use usī din dafnā denā, kyūṅki jise bhī daraḵẖt se laṭkāyā gayā hai us par allāh kī lānat hai. agar use usī din dafnāyā na jāe to tū us mulk ko nāpāk kar degā jo rabb terā ḵẖudā tujhe mīrās meṅ de rahā hai.