Istisnā 17

¹rabb apne ḵẖudā ko nāqis gāy-bail yā bheṛ-bakrī pesh na karnā, kyūṅki vah aisī qurbānī se nafrat rakhtā hai.

²jab tū un shaharoṅ meṅ ābād ho jāegā jo rabb terā ḵẖudā tujhe degā to ho saktā hai ki tere darmiyān koī mard yā aurat rabb tere ḵẖudā kā ahd toṛ kar vah kuchh kare jo use burā lage. ³maslan vah dīgar mābūdoṅ ko yā sūraj, chāṅd yā sitāroṅ ke pūre lashkar ko sijdā kare, hālāṅki maiṅ ne yah manā kiyā hai. ⁴jab bhī tujhe is qism kī ḵẖabar mile to is kā pūrā khoj lagā. agar bāt durust nikle aur aisī ghinaunī harkat vāqaī isrāīl meṅ kī gaī ho ⁵to qusūrvār ko shahar ke bāhar le jā kar saṅgasār kar denā. ⁶lekin lāzim hai ki pahale kam az kam do yā tīn log gavāhī deṅ ki us ne aisā hī kiyā hai. use sazā-e-maut dene ke liye ek gavāh kāfī nahīṅ. ⁷pahale gavāh us par patthar phaiṅkeṅ, is ke bād bāqī tamām log use saṅgasār kareṅ. yūṅ tū apne darmiyān se burāī miṭā degā.

maqdis meṅ ālātrīn adālat

⁸agar tere shahar ke qāziyoṅ ke liye kisī muqaddme kā faislā karnā mushkil ho to us maqdis meṅ ā kar apnā muāmalā pesh kar jo rabb terā ḵẖudā chunegā, ḵẖwāh kisī ko qatl kiyā gayā ho, use zaḵẖmī kar diyā gayā ho yā koī aur maslā ho. ⁹lāvī ke qabīle ke imāmoṅ aur maqdis meṅ ḵẖidmat karne vāle qāzī ko apnā muqaddmā pesh kar, aur vah faislā kareṅ. ¹⁰jo faislā vah us maqdis meṅ kareṅge jo rabb chunegā use mānnā paṛegā. jo bhī hidāyat vah deṅ us par ehatiyāt se amal kar. ¹¹sharīat kī jo bhī bāt vah tujhe sikhāeṅ aur jo bhī faislā vah deṅ us par amal kar. jo kuchh bhī vah tujhe batāeṅ us se na dāīṅ aur na bāīṅ taraf muṛnā.

¹²jo maqdis meṅ rabb tere ḵẖudā kī ḵẖidmat karne vāle qāzī yā imām ko haqīr jān kar un kī nahīṅ suntā use sazā-e-maut dī jāe. yūṅ tū isrāīl se burāī miṭā degā. ¹³phir tamām log yah sun kar ḍar jāeṅge aur āindā aisī gustāḵẖī karne kī jur’at nahīṅ kareṅge.

bādshāh ke bāre meṅ usūl

¹⁴tū jald hī us mulk meṅ dāḵẖil hogā jo rabb terā ḵẖudā tujhe dene vālā hai. jab tū us par qabzā karke us meṅ ābād ho jāegā to ho saktā hai ki tū ek din kahe, “āo ham ird-gird kī tamām qaumoṅ kī tarah bādshāh muqarrar kareṅ jo ham par hukūmat kare.” ¹⁵agar tū aisā kare to sirf vah shaḵẖs muqarrar kar jise rabb terā ḵẖudā chunegā. vah pardesī na ho balki terā apnā isrāīlī bhāī ho. ¹⁶bādshāh bahut ziyādā ghoṛe na rakhe, na apne logoṅ ko unheṅ ḵẖarīdne ke liye misr bheje. kyūṅki rabb ne tujh se kahā hai ki kabhī vahāṅ vāpas na jānā. ¹⁷terā bādshāh ziyādā bīviyāṅ bhī na rakhe, varnā us kā dil rabb se dūr ho jāegā. aur vah hadd se ziyādā sonā-chāṅdī jamā na kare.

¹⁸taḵẖtnashīn hote vaqt vah lāvī ke qabīle ke imāmoṅ ke pās paṛī is sharīat kī naqal likhvāe. ¹⁹yah kitāb us ke pās mahfūz rahe, aur vah umr bhar rozānā ise paṛhtā rahe tāki rabb apne ḵẖudā kā ḵẖauf mānnā sīkhe. tab vah sharīat kī tamām bātoṅ kī pairvī karegā, ²⁰apne āp ko apne isrāīlī bhāiyoṅ se ziyādā aham nahīṅ samjhegā aur kisī tarah bhī sharīat se haṭ kar kām nahīṅ karegā. natīje meṅ vah aur us kī aulād bahut arse tak isrāīl par hukūmat kareṅge.