Istisnā 12
mulk meṅ rabb ke ahkām
1zail meṅ vah ahkām aur qavānīn haiṅ jin par tumheṅ dhyān se amal karnā hogā jab tum us mulk meṅ ābād hoge jo rabb tere bāpdādā kā ḵẖudā tujhe de rahā hai tāki tū us par qabzā kare. mulk meṅ rahate hue umr bhar un ke tābe raho.
mulk meṅ ek hī jagah par maqdis ho
2un tamām jagahoṅ ko barbād karo jahāṅ vah qaumeṅ jinheṅ tumheṅ nikālnā hai apne devtāoṅ kī pūjā kartī haiṅ, ḵẖwāh vah ūṅche pahāṛoṅ, pahāṛiyoṅ yā ghane daraḵẖtoṅ ke sāy meṅ kyūṅ na hoṅ. 3un kī qurbānagāhoṅ ko ḍhā denā. jin pattharoṅ kī pūjā vah karte haiṅ unheṅ chiknā-chūr kar denā. yasīrat devī ke khambe jalā denā. un ke devtāoṅ ke mujassme kāṭ ḍālnā. ġaraz in jagahoṅ se un kā nām-o-nishān miṭ jāe.
4rabb apne ḵẖudā kī parastish karne ke liye un ke tarīqe na apnānā. 5rabb tumhārā ḵẖudā qabīloṅ meṅ se apne nām kī sukūnat ke liye ek jagah chun legā. ibādat ke liye vahāṅ jāyā karo, 6aur vahāṅ apnī tamām qurbāniyāṅ lā kar pesh karo, ḵẖwāh vah bhasm hone vālī qurbāniyāṅ, zabah kī qurbāniyāṅ, paidāvār kā dasvāṅ hissā, uṭhāne vālī qurbāniyāṅ, mannat ke hadie, ḵẖushī se pesh kī gaī qurbāniyāṅ yā maveshiyoṅ ke pahalauṭhe kyūṅ na hoṅ. 7vahāṅ rabb apne ḵẖudā ke huzūr apne gharānoṅ samet khānā khā kar un kāmyābiyoṅ kī ḵẖushī manāo jo tujhe rabb tere ḵẖudā kī barkat ke bāis hāsil huī haiṅ.
8us vaqt tumheṅ vah nahīṅ karnā jo ham karte āe haiṅ. āj tak har koī apnī marzī ke mutābiq ibādat kartā hai, 9kyūṅki ab tak tum ārām kī us jagah nahīṅ pahuṅche jo tujhe rabb tere ḵẖudā se mīrās meṅ milnī hai. 10lekin jald hī tum daryā-e-yardan ko pār karke us mulk meṅ ābād ho jāoge jo rabb tumhārā ḵẖudā tumheṅ mīrās meṅ de rahā hai. us vaqt vah tumheṅ ird-gird ke dushmanoṅ se bachāe rakhegā, aur tum ārām aur sukūn se zindagī guzār sakoge. 11tab rabb tumhārā ḵẖudā apne nām kī sukūnat ke liye ek jagah chun legā, aur tumheṅ sab kuchh jo maiṅ batāūṅgā vahāṅ lā kar pesh karnā hai, ḵẖwāh vah bhasm hone vālī qurbāniyāṅ, zabah kī qurbāniyāṅ, paidāvār kā dasvāṅ hissā, uṭhāne vālī qurbāniyāṅ yā mannat ke ḵẖās hadie kyūṅ na hoṅ. 12vahāṅ rabb ke sāmne tum, tumhāre beṭe-beṭiyāṅ, tumhāre ġulām aur lauṅḍiyāṅ ḵẖushī manāeṅ. apne shaharoṅ meṅ ābād lāviyoṅ ko bhī apnī ḵẖushī meṅ sharīk karo, kyūṅki un ke pās maurūsī zamīn nahīṅ hogī.
13ḵẖabardār, apnī bhasm hone vālī qurbāniyāṅ har jagah par pesh na karnā 14balki sirf us jagah par jo rabb qabīloṅ meṅ se chunegā. vahīṅ sab kuchh yūṅ manā jis tarah maiṅ tujhe batātā hūṅ.
15lekin vah jānvar is meṅ shāmil nahīṅ haiṅ jo tū qurbānī ke taur par pesh nahīṅ karnā chāhatā balki sirf khānā chāhatā hai. aise jānvar tū āzādī se apne tamām shaharoṅ meṅ zabah karke us barkat ke mutābiq khā saktā hai jo rabb tere ḵẖudā ne tujhe dī hai. aisā gosht hiran aur ġazāl ke gosht kī mānind hai yānī pāk aur nāpāk donoṅ hī use khā sakte haiṅ. 16lekin ḵẖūn na khānā. use pānī kī tarah zamīn par uṅḍel kar zāe kar denā.
17jo bhī chīzeṅ rabb ke liye maḵẖsūs kī gaī haiṅ unheṅ apne shaharoṅ meṅ na khānā maslan anāj, aṅgūr ke ras aur zaitūn ke tel kā dasvāṅ hissā, maveshiyoṅ ke pahalauṭhe, mannat ke hadie, ḵẖushī se pesh kī gaī qurbāniyāṅ aur uṭhāne vālī qurbāniyāṅ. 18yah chīzeṅ sirf rabb ke huzūr khānā yānī us jagah par jise vah maqdis ke liye chunegā. vahīṅ tū apne beṭe-beṭiyoṅ, ġulāmoṅ, lauṅḍiyoṅ aur apne qabāilī ilāqe ke lāviyoṅ ke sāth jamā ho kar ḵẖushī manā ki rabb ne hamārī mehanat ko barkat dī hai. 19apne mulk meṅ lāviyoṅ kī zarūriyāt umr bhar pūrī karne kī fikr rakh.
20jab rabb terā ḵẖudā apne vāde ke mutābiq terī sarhaddeṅ baṛhā degā aur tū gosht khāne kī ḵẖwāhish rakhegā to jis tarah jī chāhe gosht khā sakegā. 21agar terā ghar us maqdis se dūr ho jise rabb terā ḵẖudā apne nām kī sukūnat ke liye chunegā to tū jis tarah jī chāhe apne shaharoṅ meṅ rabb se mile hue maveshiyoṅ ko zabah karke khā saktā hai. lekin aisā hī karnā jaisā maiṅ ne hukm diyā hai. 22aisā gosht hiran aur ġazāl ke gosht kī mānind hai yānī pāk aur nāpāk donoṅ hī use khā sakte haiṅ. 23alabattā gosht ke sāth ḵẖūn na khānā, kyūṅki ḵẖūn jāndār kī jān hai. us kī jān gosht ke sāth na khānā. 24ḵẖūn na khānā balki use zamīn par uṅḍel kar zāe kar denā. 25use na khānā tāki tujhe aur terī aulād ko kāmyābī hāsil ho, kyūṅki aisā karne se tū rabb kī nazar meṅ sahīh kām karegā.
26lekin jo chīzeṅ rabb ke liye maḵẖsūs-o-muqaddas haiṅ yā jo tū ne mannat mān kar us ke liye maḵẖsūs kī haiṅ lāzim hai ki tū unheṅ us jagah le jāe jise rabb maqdis ke liye chunegā. 27vahīṅ, rabb apne ḵẖudā kī qurbāngāh par apnī bhasm hone vālī qurbāniyāṅ gosht aur ḵẖūn samet chaṛhā. zabah kī qurbāniyoṅ kā ḵẖūn qurbāngāh par uṅḍel denā, lekin un kā gosht tū khā saktā hai.
28jo bhī hidāyāt maiṅ tujhe de rahā hūṅ unheṅ ehatiyāt se pūrā kar. phir tū aur terī aulād ḵẖushhāl raheṅge, kyūṅki tū vah kuchh karegā jo rabb tere ḵẖudā kī nazar meṅ acchhā aur durust hai.
29rabb terā ḵẖudā un qaumoṅ ko miṭā degā jin kī taraf tū baṛh rahā hai. tū unheṅ un ke mulk se nikāltā jāegā aur ḵẖud us meṅ ābād ho jāegā. 30lekin ḵẖabardār, un ke ḵẖatm hone ke bād bhī un ke devtāoṅ ke bāre meṅ mālūmāt hāsil na kar, varnā tū phaṅs jāegā. mat kahanā ki yah qaumeṅ kis tarīqe se apne devtāoṅ kī pūjā kartī haiṅ? ham bhī aisā hī kareṅ. 31aisā mat kar! yah qaumeṅ aise ghinaune tarīqe se pūjā kartī haiṅ jin se rabb nafrat kartā hai. vah apne bacchoṅ ko bhī jalā kar apne devtāoṅ ko pesh karte haiṅ.
32kalām kī jo bhī bāt maiṅ tumheṅ pesh kartā hūṅ us ke tābe rah kar us par amal karo. na kisī bāt kā izāfā karnā, na koī bāt nikālnā.