Dānyāl 3

sone ke but kī pūjā karne kā hukm

¹ek din nabūkadnazzar ne sone kā mujassmā banvāyā. us kī ūṅchāī 90 fuṭ aur chauṛāī 9 fuṭ thī. us ne hukm diyā ki but ko sūbā bābal ke maidān banām dūrā meṅ khaṛā kiyā jāe. ²phir us ne tamām sūbedāroṅ, gavarnaroṅ, muntazimoṅ, mushīroṅ, ḵẖazānachiyoṅ, jajoṅ, majisṭreṭoṅ, aur sūboṅ ke dīgar tamām baṛe baṛe sarkārī mulāzimoṅ ko paiġām bhejā ki mujassme kī maḵẖsūsiyat ke liye ā kar jamā ho jāo. ³chunāṅche sab but kī maḵẖsūsiyat ke liye jamā ho gae. jab sab us ke sāmne khaṛe the ⁴to shāhī naqīb ne buland āvāz se elān kiyā,

“ai muḵẖtalif qaumoṅ, ummatoṅ aur zabānoṅ ke logo, suno! bādshāh farmātā hai, ⁵‘jūṅ hī narsiṅgā, shahanāī, santūr, sarod, ūd, bīn aur dīgar tamām sāz bajeṅge to lāzim hai ki sab auṅdhe muṅh ho kar bādshāh ke khaṛe kie gae sone ke but ko sijdā kareṅ. ⁶jo bhī sijdā na kare use fauran bhaṛaktī bhaṭṭī meṅ phaiṅkā jāegā’.”

⁷chunāṅche jūṅ hī sāz bajne lage to muḵẖtalif qaumoṅ, ummatoṅ aur zabānoṅ ke tamām log muṅh ke bal ho kar nabūkadnazzar ke khaṛe kie gae but ko sijdā karne lage.

⁸us vaqt kuchh najūmī bādshāh ke pās ā kar yahūdiyoṅ par ilzām lagāne lage. ⁹vah bole, “bādshāh salāmat abad tak jīte raheṅ! ¹⁰ai bādshāh, āp ne farmāyā, ‘jūṅ hī narsiṅgā, shahanāī, santūr, sarod, ūd, bīn aur dīgar tamām sāz bajeṅge to lāzim hai ki sab auṅdhe muṅh ho kar bādshāh ke khaṛe kie gae is sone ke but ko sijdā kareṅ. ¹¹jo bhī sijdā na kare use bhaṛaktī bhaṭṭī meṅ phaiṅkā jāegā’ ¹²lekin kuchh yahūdī ādmī haiṅ jo āp kī parvā hī nahīṅ karte, hālāṅki āp ne unheṅ sūbā bābal kī intizāmiyā par muqarrar kiyā thā. yah ādmī banām sadrak, mīsak aur abadnajū na āp ke devtāoṅ kī pūjā karte, na sone ke us but kī parastish karte haiṅ jo āp ne khaṛā kiyā hai.”

¹³yah sun kar nabūkadnazzar āpe se bāhar ho gayā. us ne sīdhā sadrak, mīsak aur abadnajū ko bulāyā. jab pahuṅche ¹⁴to bolā, “ai sadrak, mīsak aur abadnajū, kyā yah sahīh hai ki na tum mere devtāoṅ kī pūjā karte, na mere khaṛe kie gae mujassme kī parastish karte ho? ¹⁵maiṅ tumheṅ ek āḵẖirī mauqā detā hūṅ. sāz dubārā bajeṅge to tumheṅ muṅh ke bal ho kar mere banvāe hue mujassme ko sijdā karnā hai. agar tum aisā na karo to tumheṅ sīdhā bhaṛaktī bhaṭṭī meṅ phaiṅkā jāegā. tab kaun sā ḵẖudā tumheṅ mere hāth se bachā sakegā?”

¹⁶sadrak, mīsak aur abadnajū ne javāb diyā, “ai nabūkadnazzar, is muāmale meṅ hameṅ apnā difā karne kī zarūrat nahīṅ hai. ¹⁷jis ḵẖudā kī ḵẖidmat ham karte haiṅ vah hameṅ bachā saktā hai, ḵẖwāh hameṅ bhaṛaktī bhaṭṭī meṅ kyūṅ na phaiṅkā jāe. ai bādshāh, vah hameṅ zarūr āp ke hāth se bachāegā. ¹⁸lekin agar vah hameṅ na bhī bachāe to bhī āp ko mālūm ho ki na ham āp ke devtāoṅ kī pūjā kareṅge, na āp ke khaṛe kie gae sone ke mujassme kī parastish kareṅge.”

¹⁹yah sun kar nabūkadnazzar āg-bagūlā ho gayā. sadrak, mīsak aur abadnajū ke sāmne us kā chiharā bigaṛ gayā aur us ne hukm diyā ki bhaṭṭī ko māmūl kī nisbat sāt gunā ziyādā garm kiyā jāe. ²⁰phir us ne kahā ki behtarīn faujiyoṅ meṅ se chand ek sadrak, mīsak aur abadnajū ko bāṅdh kar bhaṛaktī bhaṭṭī meṅ phaiṅk deṅ. ²¹tīnoṅ ko bāṅdh kar bhaṛaktī bhaṭṭī meṅ phaiṅkā gayā. un ke choġe, pājāme aur ṭopiyāṅ utārī na gaīṅ. ²²chūṅki bādshāh ne bhaṭṭī ko garm karne par ḵẖās zor diyā thā is liye āg itnī tez huī ki jo faujī sadrak, mīsak aur abadnajū ko le kar bhaṭṭī ke muṅh tak chaṛh gae vah fauran nazar-e-ātish ho gae. ²³un ke qaidī baṅdhī huī hālat meṅ sholāzan āg meṅ gir gae.

²⁴achānak nabūkadnazzar bādshāh chauṅk uṭhā. us ne uchhal kar apne mushīroṅ se pūchhā, “ham ne to tīn ādmiyoṅ ko bāṅdh kar bhaṭṭī meṅ phaiṅkavāyā ki nahīṅ?” unhoṅ ne javāb diyā, “jī, ai bādshāh.” ²⁵vah bolā, “to phir yah kyā hai? mujhe chār ādmī āg meṅ idhar udhar phirte hue nazar ā rahe haiṅ. na vah baṅdhe hue haiṅ, na unheṅ nuqsān pahuṅch rahā hai. chauthā ādmī devtāoṅ kā beṭā sā lag rahā hai.”

²⁶nabūkadnazzar jaltī huī bhaṭṭī ke muṅh ke qarīb gayā aur pukārā, “ai sadrak, mīsak aur abadnajū, ai allāh t’ālā ke bando, nikal āo! idhar āo.” tab sadrak, mīsak aur abadnajū āg se nikal āe. ²⁷sūbedār, gavarnar, muntazim aur shāhī mushīr un ke gird jamā hue to dekhā ki āg ne un ke jismoṅ ko nuqsān nahīṅ pahuṅchāyā. bāloṅ meṅ se ek bhī jhulas nahīṅ gayā thā, na un ke libās āg se mut’assir hue the. āg aur dhueṅ kī bū tak nahīṅ thī.

²⁸tab nabūkadnazzar bolā, “sadrak, mīsak aur abadnajū ke ḵẖudā kī tamjīd ho jis ne apne farishte ko bhej kar apne bandoṅ ko bachāyā. unhoṅ ne us par bharosā rakh kar bādshāh ke hukm kī nāfarmānī kī. apne ḵẖudā ke sivā kisī aur kī ḵẖidmat yā parastish karne se pahale vah apnī jān ko dene ke liye tayyār the. ²⁹chunāṅche merā hukm suno! sadrak, mīsak aur abadnajū ke ḵẖudā ke ḵẖilāf kufr baknā tamām qaumoṅ, ummatoṅ aur zabānoṅ ke afrād ke liye saḵẖt manā hai. jo bhī aisā kare use ṭukṛe ṭukṛe kar diyā jāegā aur us ke ghar ko kachre kā ḍher banāyā jāegā. kyūṅki koī bhī devtā is tarah nahīṅ bachā saktā.” ³⁰phir bādshāh ne tīnoṅ ādmiyoṅ ko sūbā bābal meṅ sarfarāz kiyā.