Dānyāl 1

dānyāl aur us ke dost shāh-e-bābal ke darbār meṅ

¹shāh-e-yahūdāh yahūyaqīm kī saltanat ke tīsre sāl meṅ shāh-e-bābal nabūkadnazzar ne yarūshalam ā kar us kā muhāsarā kiyā. ²us vaqt rabb ne yahūyaqīm aur allāh ke ghar kā kāfī sāmān nabūkadnazzar ke havāle kar diyā. nabūkadnazzar ne yah chīzeṅ mulk-e-bābal meṅ le jā kar apne devtā ke mandir ke ḵẖazāne meṅ mahfūz kar dīṅ.

³phir us ne apne darbār ke ālā afsar ashpanāz ko hukm diyā, “yahūdāh ke shāhī ḵẖāndān aur ūṅche tabqe ke ḵẖāndānoṅ kī taftīsh karo. un meṅ se kuchh aise naujvānoṅ ko chun kar le āo ⁴jo beaib, ḵẖūbsūrat, hikmat ke har lihāz se samajhdār, tālīmayāftā aur samajhne meṅ tez hoṅ. ġaraz yah ādmī shāhī mahal meṅ ḵẖidmat karne ke qābil hoṅ. unheṅ bābal kī zabān likhne aur bolne kī tālīm do.” ⁵bādshāh ne muqarrar kiyā ki rozānā unheṅ shāhī bāvarchīḵẖāne se kitnā khānā aur mai milnī hai. tīn sāl kī tarbiyat ke bād unheṅ bādshāh kī ḵẖidmat ke liye hāzir honā thā.

⁶jab in naujvānoṅ ko chunā gayā to chār ādmī un meṅ shāmil the jin ke nām dānyāl, hananiyāh, mīsāel aur azariyāh the. ⁷darbār ke ālā afsar ne un ke nae nām rakhe. dānyāl beltashazzar meṅ badal gayā, hananiyāh sadrak meṅ, mīsāel mīsak meṅ aur azariyāh abadnajū meṅ.

⁸lekin dānyāl ne musammam irādā kar liyā ki maiṅ apne āp ko shāhī khānā khāne aur shāhī mai pīne se nāpāk nahīṅ karūṅgā. us ne darbār ke ālā afsar se in chīzoṅ se parhez karne kī ijāzat māṅgī. ⁹allāh ne pahale se is afsar kā dil narm kar diyā thā, is liye vah dānyāl kā ḵẖās lihāz kartā aur us par meharbānī kartā thā. ¹⁰lekin dānyāl kī daraḵẖwāst sun kar us ne javāb diyā, “mujhe apne āqā bādshāh se ḍar hai. un hī ne mut’ayyin kiyā ki tumheṅ kyā kyā khānā aur pīnā hai. agar unheṅ patā chale ki tum dūsre naujvānoṅ kī nisbat duble-patle aur kamzor lage to vah merā sar qalam kareṅge.” ¹¹tab dānyāl ne us nigrān se bāt kī jise darbār ke ālā afsar ne dānyāl, hananiyāh, mīsāel aur azariyāh par muqarrar kiyā thā. vah bolā, ¹²“zarā das din tak apne ḵẖādimoṅ ko āzmāeṅ. itne meṅ hameṅ khāne ke liye sirf sāg-pāt aur pīne ke liye pānī dījie. ¹³is ke bād hamārī sūrat kā muqāblā un dīgar naujvānoṅ ke sāth kareṅ jo shāhī khānā khāte haiṅ. phir is ke madd-e-nazar faislā kareṅ ki āindā āp apne ḵẖādimoṅ ko ijāzat deṅge ki nahīṅ.”

¹⁴nigrān mān gayā. das din tak vah unheṅ sāg-pāt khilā kar aur pānī pilā kar āzmātā rahā. ¹⁵das din ke bād kyā dekhtā hai ki dānyāl aur us ke tīn dost shāhī khānā khāne vāle dīgar naujvānoṅ kī nisbat kahīṅ ziyādā sehatmand aur moṭe-tāze lag rahe haiṅ. ¹⁶tab nigrān un ke liye muqarrarā shāhī khāne aur mai kā intizām band karke unheṅ sirf sāg-pāt khilāne lagā. ¹⁷allāh ne in chār ādmiyoṅ ko adab aur hikmat ke har shobe meṅ ilm aur samajh atā kī. nīz, dānyāl har qism kī royā aur ḵẖwāb kī tābīr kar saktā thā.

¹⁸muqarrarā tīn sāl ke bād darbār ke ālā afsar ne tamām naujvānoṅ ko nabūkadnazzar ke sāmne pesh kiyā. ¹⁹jab bādshāh ne un se guftagu kī to mālūm huā ki dānyāl, hananiyāh, mīsāel aur azariyāh dūsroṅ par sabqat rakhte haiṅ. chunāṅche chāroṅ bādshāh ke mulāzim ban gae. ²⁰jab bhī kisī muāmale meṅ ḵẖās hikmat aur samajh darkār hotī to bādshāh ne dekhā ki yah chār naujavān mashvrā dene meṅ pūrī saltanat ke tamām qismat kā hāl batāne vāloṅ aur jādūgaroṅ se das gunā ziyādā qābil haiṅ.

²¹dānyāl ḵẖoras kī hukūmat ke pahale sāl tak shāhī darbār meṅ ḵẖidmat kartā rahā.