Kulussiyoṅ 3
1āp ko masīh ke sāth zindā kar diyā gayā hai, is liye vah kuchh talāsh kareṅ jo āsmān par hai jahāṅ masīh allāh ke dahane hāth baiṭhā hai. 2duniyāvī chīzoṅ ko apne ḵẖayāloṅ kā markaz na banāeṅ balki āsmānī chīzoṅ ko. 3kyūṅki āp mar gae haiṅ aur ab āp kī zindagī masīh ke sāth allāh meṅ poshīdā hai. 4masīh hī āp kī zindagī hai. jab vah zāhir ho jāegā to āp bhī us ke sāth zāhir ho kar us ke jalāl meṅ sharīk ho jāeṅge.
purānī aur naī zindagī
5chunāṅche un duniyāvī chīzoṅ ko mār ḍāleṅ jo āp ke andar kām kar rahī haiṅ : zinākārī, nāpākī, shahavatparastī, burī ḵẖwāhishāt aur lālach (lālach to ek qism kī butparastī hai). 6allāh kā ġazab aisī hī bātoṅ kī vajah se nāzil hogā. 7ek vaqt thā jab āp bhī in ke mutābiq zindagī guzārte the, jab āp kī zindagī in ke qābū meṅ thī.
8lekin ab vaqt ā gayā hai ki āp yah sab kuchh yānī ġussā, taish, badasulūkī, buhtān aur gandī zabān ḵẖastāhāl kapṛe kī tarah utār kar phaiṅk deṅ. 9ek dūsre se bāt karte vaqt jhūṭ mat bolnā, kyūṅki āp ne apnī purānī fitrat us kī harkatoṅ samet utār dī hai. 10sāth sāth āp ne naī fitrat pahan lī hai, vah fitrat jis kī tajdīd hamārā ḵẖāliq apnī sūrat par kartā jā rahā hai tāki āp use aur behatar taur par jān leṅ. 11jahāṅ yah kām ho rahā hai vahāṅ logoṅ meṅ koī farq nahīṅ hai, ḵẖwāh koī ġairyahūdī ho yā yahūdī, maḵẖtūn ho yā nāmaḵẖtūn, ġairyūnānī ho yā skūtī [a] ek qabīlā jo zalīl samjhā jātā thā. , ġulām ho yā āzād. koī farq nahīṅ paṛtā, sirf masīh hī sab kuchh aur sab meṅ hai.
12allāh ne āp ko chun kar apne liye maḵẖsūs-o-muqaddas kar liyā hai. vah āp se muhabbat rakhtā hai. is liye ab taras, nekī, farotnī, narmdilī aur sabr ko pahan leṅ. 13ek dūsre ko bardāsht kareṅ, aur agar āp kī kisī se shikāyat ho to use muāf kar deṅ. hāṅ, yūṅ muāf kareṅ jis tarah ḵẖudāvand ne āp ko muāf kar diyā hai. 14in ke ilāvā muhabbat bhī pahan leṅ jo sab kuchh bāṅdh kar kāmiliyat kī taraf le jātī hai. 15masīh kī salāmatī āp ke diloṅ meṅ hukūmat kare. kyūṅki allāh ne āp ko isī salāmatī kī zindagī guzārne ke liye bulā kar ek badan meṅ shāmil kar diyā hai. shukrguzār bhī raheṅ. 16āp kī zindagī meṅ masīh ke kalām kī pūrī daulat ghar kar jāe. ek dūsre ko har tarah kī hikmat se tālīm dete aur samjhāte raheṅ. sāth sāth apne diloṅ meṅ allāh ke liye shukrguzārī ke sāth zabūr, hamd-o-sanā aur ruhānī gīt gāte raheṅ. 17aur jo kuchh bhī āp kareṅ ḵẖwāh zabānī ho yā amlī vah ḵẖudāvand īsā kā nām le kar kareṅ. har kām meṅ usī ke vasīle se ḵẖudā bāp kā shukr kareṅ.
naī zindagī meṅ tālluqāt kaise hūṅ
18bīviyo, apne shauhar ke tābe raheṅ, kyūṅki jo ḵẖudāvand meṅ hai us ke liye yahī munāsib hai.
19shauharo, apnī bīviyoṅ se muhabbat rakheṅ. un se talḵẖamizājī se pesh na āeṅ.
20baccho, har bāt meṅ apne māṅ-bāp ke tābe raheṅ, kyūṅki yahī ḵẖudāvand ko pasand hai.
21vālido, apne bacchoṅ ko mushtail na kareṅ, varnā vah bedil ho jāeṅge.
22ġulāmo, har bāt meṅ apne duniyāvī mālikoṅ ke tābe raheṅ. na sirf un ke sāmne hī aur unheṅ ḵẖush rakhne ke liye ḵẖidmat kareṅ balki ḵẖulūsdilī aur ḵẖudāvand kā ḵẖauf mān kar kām kareṅ. 23jo kuchh bhī āp karte haiṅ use pūrī lagan ke sāth kareṅ, is tarah jaisā ki āp na sirf insānoṅ kī balki ḵẖudāvand kī ḵẖidmat kar rahe hūṅ. 24āp to jānte haiṅ ki ḵẖudāvand āp ko is ke muāvaze meṅ vah mīrās degā jis kā vādā us ne kiyā hai. haqīqat meṅ āp ḵẖudāvand masīh kī hī ḵẖidmat kar rahe haiṅ. 25lekin jo ġalat kām kare use apnī ġaltiyoṅ kā muāvazā bhī milegā. allāh to kisī kī bhī jānibdārī nahīṅ kartā.