Kulussiyoṅ 2

¹maiṅ chāhatā hūṅ ki āp jān leṅ ki maiṅ āp ke liye kis qadar jāṅfishānī kar rahā hūṅ - āp ke liye, laudīkiyā vāloṅ ke liye aur un tamām īmāndāroṅ ke liye bhī jin kī mere sāth mulāqāt nahīṅ huī. ²merī koshish yah hai ki un kī dilī hausalāafzāī kī jāe aur vah muhabbat meṅ ek ho jāeṅ, ki unheṅ vah ṭhos etimād hāsil ho jāe jo pūrī samajh se paidā hotā hai. kyūṅki maiṅ chāhatā hūṅ ki vah allāh kā rāz jān leṅ. rāz kyā hai? masīh ḵẖud. ³usī meṅ hikmat aur ilm-o-irfān ke tamām ḵẖazāne poshīdā haiṅ.

⁴ġaraz ḵẖabardār raheṅ ki koī āp ko bazāhir sahīh aur mīṭhe mīṭhe alfāz se dhokā na de. ⁵kyūṅki go maiṅ jism ke lihāz se hāzir nahīṅ hūṅ, lekin rūh meṅ maiṅ āp ke sāth hūṅ. aur maiṅ yah dekh kar ḵẖush hūṅ ki āp kitnī munazzam zindagī guzārte haiṅ, ki āp kā masīh par īmān kitnā puḵẖtā hai.

masīh meṅ zindagī

⁶āp ne īsā masīh ko ḵẖudāvand ke taur par qabūl kar liyā hai. ab us meṅ zindagī guzāreṅ. ⁷us meṅ jaṛ pakṛeṅ, us par apnī zindagī tāmīr kareṅ, us īmān meṅ mazbūt raheṅ jis kī āp ko tālīm dī gaī hai aur shukrguzārī se labrez ho jāeṅ.

⁸muhtāt raheṅ ki koī āp ko falsafiyānā aur mahaz fareb dene vālī bātoṅ se apne jāl meṅ na phaṅsā le. aisī bātoṅ kā sarchashmā masīh nahīṅ balki insānī rivāyateṅ aur is duniyā kī quvvateṅ haiṅ. ⁹kyūṅki masīh meṅ ulūhiyat kī sārī māmūrī mujassam ho kar sukūnat kartī hai. ¹⁰aur āp ko jo masīh meṅ haiṅ us kī māmūrī meṅ sharīk kar diyā gayā hai. vahī har hukmarān aur iḵẖtiyār vāle kā sar hai.

¹¹us meṅ āte vaqt āp kā ḵẖatnā bhī karvāyā gayā. lekin yah ḵẖatnā insānī hāthoṅ se nahīṅ kiyā gayā balki masīh ke vasīle se. us vaqt āp kī purānī fitrat utār dī gaī, ¹²āp ko baptismā de kar masīh ke sāth dafnāyā gayā aur āp ko īmān se zindā kar diyā gayā. kyūṅki āp allāh kī qudrat par īmān lāe the, usī qudrat par jis ne masīh ko murdoṅ meṅ se zindā kar diyā thā. ¹³pahale āp apne gunāhoṅ aur nāmaḵẖtūn jismānī hālat ke sabab se murdā the, lekin ab allāh ne āp ko masīh ke sāth zindā kar diyā hai. us ne hamāre tamām gunāhoṅ ko muāf kar diyā hai. ¹⁴hamāre qarz kī jo rasīd apnī sharāit kī binā par hamāre ḵẖilāf thī use us ne mansūḵẖ kar diyā. hāṅ, us ne ham se dūr karke use kīloṅ se salīb par jaṛ diyā. ¹⁵us ne hukmarānoṅ aur iḵẖtiyār vāloṅ se un kā asalihā chhīn kar sab ke sāmne un kī rusvāī kī. hāṅ, masīh kī salībī maut se vah allāh ke qaidī ban gae aur unheṅ fatah ke julūs meṅ us ke pīchhe pīchhe chalnā paṛā.

¹⁶chunāṅche koī āp ko is vajah se mujrim na ṭhaharāe ki āp kyā kyā khāte-pīte yā kaun kaun sī īdeṅ manāte haiṅ. isī tarah koī āp kī adālat na kare agar āp hilāl kī īd yā sabat kā din nahīṅ manāte. ¹⁷yah chīzeṅ to sirf āne vālī haqīqat kā sāyā hī haiṅ jabki yah haqīqat ḵẖud masīh meṅ pāī jātī hai. ¹⁸aise log āp ko mujrim na ṭhaharāeṅ jo zāhirī farotnī aur farishtoṅ kī pūjā par isrār karte haiṅ. baṛī tafsīl se apnī royāoṅ meṅ dekhī huī bāteṅ bayān karte karte un ke ġairruhānī zahan ḵẖwāh-m-ḵẖwāh phūl jāte haiṅ. ¹⁹yūṅ unhoṅ ne masīh ke sāth lage rahanā chhoṛ diyā agarchi vah badan kā sar hai. vahī joṛoṅ aur paṭṭhoṅ ke zarīe pūre badan ko sahārā de kar us ke muḵẖtalif hissoṅ ko joṛ detā hai. yūṅ pūrā badan allāh kī madad se taraqqī kartā jātā hai.

masīh ke sāth marnā aur zindagī guzārnā

²⁰āp to masīh ke sāth mar kar duniyā kī kuvvatoṅ se āzād ho gae haiṅ. agar aisā hai to āp zindagī aise kyūṅ guzārte haiṅ jaise ki āp abhī tak is duniyā kī milkiyat haiṅ? āp kyūṅ is ke ahkām ke tābe rahate haiṅ? ²¹maslan “ise hāth na lagānā, vah na chakhnā, yah na chhūnā.” ²²in tamām chīzoṅ kā maqsad to yah hai ki istemāl ho kar ḵẖatm ho jāeṅ. yah sirf insānī ahkām aur tālīmāt haiṅ. ²³beshak yah ahkām jo ghaṛe hue mazhabī farāiz, nām-nihād farotnī aur jism ke saḵẖt dabāo kā taqāzā karte haiṅ hikmat par mabnī to lagte haiṅ, lekin yah bekār haiṅ aur sirf jism hī kī ḵẖwāhishāt pūrī karte haiṅ.