3 Yūhannā 1
1yah ḵẖat buzurg yūhannā kī taraf se hai.
maiṅ apne azīz gayus ko likh rahā hūṅ jise maiṅ sacchāī se piyār kartā hūṅ.
2mere azīz, merī duā hai ki āp kā hāl har tarah se ṭhīk ho aur āp jismānī taur par utne hī tandurust hoṅ jitne āp ruhānī lihāz se haiṅ. 3kyūṅki maiṅ nihāyat ḵẖush huā jab bhāiyoṅ ne ā kar gavāhī dī ki āp kis tarah sacchāī ke mutābiq zindagī guzārte haiṅ. aur yaqīnan āp hameshā sacchāī ke mutābiq zindagī guzārte haiṅ. 4jab maiṅ suntā hūṅ ki mere bacche sacchāī ke mutābiq zindagī guzār rahe haiṅ to yah mere liye sab se ziyādā ḵẖushī kā bāis hotā hai.
gayus kī tārīf
5mere azīz, jo kuchh āp bhāiyoṅ ke liye kar rahe haiṅ us meṅ āp vafādārī dikhā rahe haiṅ, hālāṅki vah āp ke jānne vāle nahīṅ haiṅ. 6unhoṅ ne ḵẖudā kī jamāat ke sāmne hī āp kī muhabbat kī gavāhī dī hai. meharbānī karke un kī safar ke liye yūṅ madad kareṅ ki allāh ḵẖush ho. 7kyūṅki vah masīh ke nām kī ḵẖātir safar ke liye nikle haiṅ aur ġairīmāndāroṅ se madad nahīṅ lete. 8chunāṅche yah hamārā farz hai ki ham aise logoṅ kī mehamān-navāzī kareṅ, kyūṅki yūṅ ham bhī sacchāī ke hamḵẖidmat ban jāte haiṅ.
diyutrifes aur demetriyus
9maiṅ ne to jamāat ko kuchh likh diyā thā, lekin diyutrifes jo un meṅ avval hone kī ḵẖwāhish rakhtā hai hameṅ qabūl nahīṅ kartā. 10chunāṅche maiṅ jab āūṅgā to use un burī harkatoṅ kī yād dilāūṅgā jo vah kar rahā hai, kyūṅki vah hamāre ḵẖilāf burī bāteṅ bak rahā hai. aur na sirf yah balki vah bhāiyoṅ ko ḵẖush’āmadīd kahane se bhī inkār kartā hai. jab dūsre yah karnā chāhate haiṅ to vah unheṅ rok kar jamāat se nikāl detā hai.
11mere azīz, jo burā hai us kī naqal mat karnā balki us kī karnā jo acchhā hai. jo acchhā kām kartā hai vah allāh se hai. lekin jo burā kām kartā hai us ne allāh ko nahīṅ dekhā.
12sab log demetriyus kī acchhī gavāhī dete haiṅ balki sacchāī ḵẖud bhī us kī acchhī gavāhī detī hai. ham bhī is ke gavāh haiṅ, aur āp jānte haiṅ ki hamārī gavāhī sacchī hai.
āḵẖirī salām
13mujhe āp ko bahut kuchh likhnā thā, lekin yah aisī bāteṅ haiṅ jo maiṅ qalam aur siyāhī ke zarīe āp ko nahīṅ batā saktā. 14maiṅ jald hī āp se milne kī ummīd rakhtā hūṅ. phir ham rū-ba-rū bāt kareṅge.
15salāmatī āp ke sāth hotī rahe.
yahāṅ ke dost āp ko salām kahate haiṅ. vahāṅ ke har dost ko shaḵẖsī taur par hamārā salām deṅ.