2 Tīmuthiyus 3

āḵẖirī din

¹lekin yah bāt jān leṅ ki āḵẖirī dinoṅ meṅ haulnāk lamhe āeṅge. ²log ḵẖudpasand aur paisoṅ ke lālchī hoṅge. vah sheḵẖībāz, maġrūr, kufr bakne vāle, māṅ-bāp ke nāframān, nāshukre, bedīn ³aur muhabbat se ḵẖālī hoṅge. vah sulah karne ke liye tayyār nahīṅ hoṅge, dūsroṅ par tuhamat lagāeṅge, ayyāsh aur vahashī hoṅge aur bhalāī se nafrat rakheṅge. ⁴vah namakaharām, ġairmuhtāt aur ġarūr se phūle hue hoṅge. allāh se muhabbat rakhne ke bajāy unheṅ aish-o-ishrat piyārī hogī. ⁵vah bazāhir ḵẖudātaras zindagī guzāreṅge, lekin haqīqī ḵẖudātaras zindagī kī quvvat kā inkār kareṅge. aisoṅ se kinārā kareṅ. ⁶un meṅ se kuchh log gharoṅ meṅ ghus kar kamzor ḵẖavātīn ko apne jāl meṅ phaṅsā lete haiṅ, aisī ḵẖavātīn ko jo apne gunāhoṅ tale dabī huī haiṅ aur jinheṅ kaī tarah kī shahavateṅ chalātī haiṅ. ⁷go yah har vaqt tālīm hāsil kartī rahatī haiṅ to bhī sacchāī ko jānne tak kabhī nahīṅ pahuṅch saktīṅ. ⁸jis tarah yannes aur yambres mūsā kī muḵẖālafat karte the usī tarah yah log bhī sacchāī kī muḵẖālafat karte haiṅ. in kā zahan bigṛā huā hai aur in kā īmān nāmaqbūl niklā. ⁹lekin yah ziyādā taraqqī nahīṅ kareṅge kyūṅki in kī hamāqat sab par zāhir ho jāegī, bilkul usī tarah jis tarah yannes aur yambres ke sāth bhī huā.

āḵẖirī hidāyāt

¹⁰lekin āp har lihāz se mere shāgird rahe haiṅ, chāl-chalan meṅ, irāde meṅ, īmān meṅ, sabr meṅ, muhabbat meṅ, sābitqadmī meṅ, ¹¹īzārasāniyoṅ meṅ aur dukhoṅ meṅ. antākiyā, ikuniyum aur lustarā meṅ mere sāth kyā kuchh na huā! vahāṅ mujhe kitnī saḵẖt īzārasāniyoṅ kā sāmnā karnā paṛā. lekin ḵẖudāvand ne mujhe in sab se rihāī dī. ¹²bāt yah hai ki sab jo masīh īsā meṅ ḵẖudātaras zindagī guzārnā chāhate haiṅ unheṅ satāyā jāegā. ¹³sāth sāth sharīr aur dhokebāz log apne ġalat kāmoṅ meṅ taraqqī karte jāeṅge. vah dūsroṅ ko ġalat rāh par le jāeṅge aur unheṅ ḵẖud bhī ġalat rāh par lāyā jāegā. ¹⁴lekin āp ḵẖud us par qāim raheṅ jo āp ne sīkh liyā aur jis par āp ko yaqīn āyā hai. kyūṅki āp apne ustādoṅ ko jānte haiṅ ¹⁵aur āp bachpan se muqaddas sahīfoṅ se vāqif haiṅ. allāh kā yah kalām āp ko vah hikmat atā kar saktā hai jo masīh īsā par īmān lāne se najāt tak pahuṅchātī hai. ¹⁶kyūṅki har pāk navishtā allāh ke rūh se vujūd meṅ āyā hai aur tālīm dene, malāmat karne, islāh karne aur rāstbāz zindagī guzārne kī tarbiyat dene ke liye mufīd hai. ¹⁷kalām-e-muqaddas kā maqsad yahī hai ki allāh kā bandā har lihāz se qābil aur har nek kām ke liye tayyār ho.