2 Tīmuthiyus 2
masīh īsā kā vafādār sipāhī
1lekin āp, mere beṭe, us fazl se taqviyat pāeṅ jo āp ko masīh īsā meṅ mil gayā hai. 2jo kuchh āp ne bahut gavāhoṅ kī maujūdgī meṅ mujh se sunā hai use motbar logoṅ ke sapurd kareṅ. yah aise log hoṅ jo auroṅ ko sikhāne ke qābil hoṅ.
3masīh īsā ke acchhe sipāhī kī tarah hamāre sāth dukh uṭhāte raheṅ. 4jis sipāhī kī ḍyūṭī hai vah ām r’āyā ke muāmalāt meṅ phaṅsne se bāz rahatā hai, kyūṅki vah apne afsar ko pasand ānā chāhatā hai. 5isī tarah khel ke muqāble meṅ hissā lene vāle ko sirf is sūrat meṅ in’ām mil saktā hai ki vah qavāid ke mutābiq hī muqāblā kare. 6aur lāzim hai ki fasal kī kaṭāī ke vaqt pahale us ko fasal kā hissā mile jis ne khet meṅ mehanat kī hai. 7us par dhyān denā jo maiṅ āp ko batā rahā hūṅ, kyūṅki ḵẖudāvand āp ko in tamām bātoṅ kī samajh atā karegā.
8masīh īsā ko yād rakheṅ, jo dāūd kī aulād meṅ se hai aur jise murdoṅ meṅ se zindā kar diyā gayā. yahī merī ḵẖushḵẖabarī hai 9jis kī ḵẖātir maiṅ dukh uṭhā rahā hūṅ, yahāṅ tak ki mujhe ām mujrim kī tarah zanjīroṅ se bāṅdhā gayā hai. lekin allāh kā kalām zanjīroṅ se bāṅdhā nahīṅ jā saktā. 10is liye maiṅ sab kuchh allāh ke chune hue logoṅ kī ḵẖātir bardāsht kartā hūṅ tāki vah bhī najāt pāeṅ - vah najāt jo masīh īsā se miltī hai aur jo abdī jalāl kā bāis bantī hai. 11yah qaul qābil-e-etimād hai,
agar ham us ke sāth mar gae
to ham us ke sāth jieṅge bhī.
12agar ham bardāsht karte raheṅ
to ham us ke sāth hukūmat bhī kareṅge.
agar ham use jānne se inkār kareṅ
to vah bhī hameṅ jānne se inkār karegā.
13agar ham bevafā nikleṅ
to bhī vah vafādār rahegā.
kyūṅki vah apnā inkār nahīṅ kar saktā.
qābil-e-qabūl ḵẖidmatguzār
14logoṅ ko in bātoṅ kī yād dilāte raheṅ aur unheṅ sanjīdgī se allāh ke huzūr samjhāeṅ ki vah bāl kī khāl utār kar ek dūsre se na jhagṛeṅ. yah befāidā hai balki sunne vāloṅ ko bigāṛ detā hai. 15apne āp ko allāh ke sāmne yūṅ pesh karne kī pūrī koshish kareṅ ki āp maqbūl sābit hoṅ, ki āp aisā mazdūr nikleṅ jise apne kām se sharmāne kī zarūrat na ho balki jo sahīh taur par allāh kā sacchā kalām pesh kare. 16duniyāvī bakvās se bāz raheṅ. kyūṅki jitnā yah log is meṅ phaṅs jāeṅge utnā hī bedīnī kā asar baṛhegā 17aur un kī tālīm kaiṅsar kī tarah phail jāegī. in logoṅ meṅ huminyus aur filetus bhī shāmil haiṅ 18jo sacchāī se haṭ gae haiṅ. yah dāvā karte haiṅ ki murdoṅ ke jī uṭhne kā amal ho chukā hai aur yūṅ bāz ek kā īmān tabāh ho gayā hai. 19lekin allāh kī ṭhos bunyād qāim rahatī hai aur us par in do bātoṅ kī muhar lagī hai, “ḵẖudāvand ne apne logoṅ ko jān liyā hai” aur “jo bhī samjhe ki maiṅ ḵẖudāvand kā pairokār hūṅ vah nārāstī se bāz rahe.”
20baṛe gharoṅ meṅ na sirf sone aur chāṅdī ke bartan hote haiṅ balki lakṛī aur miṭṭī ke bhī. yānī kuchh sharīf kāmoṅ ke liye istemāl hote haiṅ aur kuchh kamaqdar kāmoṅ ke liye. 21agar koī apne āp ko in burī chīzoṅ se pāk-sāf kare to vah sharīf kāmoṅ ke liye istemāl hone vālā bartan hogā. vah maḵẖsūs-o-muqaddas, mālik ke liye mufīd aur har nek kām ke liye tayyār hogā. 22javānī kī burī ḵẖwāhishāt se bhāg kar rāstbāzī, īmān, muhabbat aur sulah-salāmatī ke pīchhe lage raheṅ. aur yah un ke sāth mil kar kareṅ jo ḵẖulūsdilī se ḵẖudāvand kī parastish karte haiṅ. 23hamāqat aur jahālat kī bahsoṅ se kinārā kareṅ. āp to jānte haiṅ ki in se sirf jhagṛe paidā hote haiṅ. 24lāzim hai ki ḵẖudāvand kā ḵẖādim na jhagṛe balki har ek se meharbānī kā sulūk kare. vah tālīm dene ke qābil ho aur sabr se ġalat sulūk bardāsht kare. 25jo muḵẖālafat karte haiṅ unheṅ vah narmdilī se tarbiyat de, kyūṅki ho saktā hai ki allāh unheṅ taubā karne kī taufīq de aur vah sacchāī ko jān leṅ, 26hosh meṅ āeṅ aur iblīs ke phaṅde se bach nikleṅ. kyūṅki iblīs ne unheṅ qaid kar liyā hai tāki vah us kī marzī pūrī kareṅ.