2 Patras 2

jhūṭe ustād

¹lekin jis tarah māzī meṅ isrāīl qaum meṅ jhūṭe nabī bhī the, usī tarah āp meṅ se bhī jhūṭe ustād khaṛe ho jāeṅge. yah ḵẖudā kī jamāatoṅ meṅ muhalak tālīmāt phailāeṅge balki apne mālik ko jānne se inkār bhī kareṅge jis ne unheṅ ḵẖarīd liyā thā. aisī harkatoṅ se yah jald hī apne āp par halākat lāeṅge. ²bahut se log un kī ayyāsh harkatoṅ kī pairvī kareṅge, aur is vajah se dūsre sacchāī kī rāh par kufr bakeṅge. ³lālach ke sabab se yah ustād āp ko farzī kahāniyāṅ sunā kar āp kī lūṭ-khasūṭ kareṅge. lekin allāh ne baṛī der se unheṅ mujrim ṭhaharāyā, aur us kā faislā sustaraftār nahīṅ hai. hāṅ, un kā munsif ūṅgh nahīṅ rahā balki unheṅ halāk karne ke liye tayyār khaṛā hai.

⁴dekheṅ, allāh ne un farishtoṅ ko bachne na diyā jinhoṅ ne gunāh kiyā balki unheṅ tārīkī kī zanjīroṅ meṅ bāṅdh kar jahannum meṅ ḍāl diyā jahāṅ vah adālat ke din tak mahfūz raheṅge. ⁵isī tarah us ne qadīm duniyā ko bachne na diyā balki us ke bedīn bāshindoṅ par sailāb ko āne diyā. us ne sirf rāstbāzī ke paiġambar nūh ko sāt aur jānoṅ samet bachāyā. ⁶aur us ne sadūm aur amūrā ke shaharoṅ ko mujrim qarār de kar rākh kar diyā. yūṅ allāh ne unheṅ ibrat banā kar dikhāyā ki bedīnoṅ ke sāth kyā kuchh kiyā jāegā. ⁷sāth sāth us ne lūt ko bachāyā jo rāstbāz thā aur beusūl logoṅ ke gande chāl-chalan dekh dekh kar pistā rahā. ⁸kyūṅki yah rāstbāz ādmī un ke darmiyān bastā thā, aur us kī rāstbāz jān roz-ba-roz un kī sharīr harkateṅ dekh aur sun kar saḵẖt azāb meṅ phaṅsī rahī. ⁹yūṅ zāhir hai ki rabb dīndār logoṅ ko āzmāish se bachānā aur bedīnoṅ ko adālat ke din tak sazā ke tahat rakhnā jāntā hai, ¹⁰ḵẖāskar unheṅ jo apne jism kī gandī ḵẖwāhishāt ke pīchhe lage rahate aur ḵẖudāvand ke iḵẖtiyār ko haqīr jānte haiṅ.

yah log gustāḵẖ aur maġrūr haiṅ aur jalālī hastiyoṅ par kufr bakne se nahīṅ ḍarte. ¹¹is ke muqāble meṅ farishte bhī jo kahīṅ ziyādā tāqatvar aur qavī haiṅ rabb ke huzūr aisī hastiyoṅ par buhtān aur ilzāmāt lagāne kī jur’at nahīṅ karte. ¹²lekin yah jhūṭe ustād beaqal jānvaroṅ kī mānind haiṅ, jo fitrī taur par is liye paidā hue haiṅ ki unheṅ pakṛā aur ḵẖatm kiyā jāe. jo kuchh vah nahīṅ samajhte us par vah kufr bakte haiṅ. aur jaṅglī jānvaroṅ kī tarah vah bhī halāk ho jāeṅge. ¹³yūṅ jo nuqsān unhoṅ ne dūsroṅ ko pahuṅchāyā vahī unheṅ ḵẖud bhugatnā paṛegā. un ke nazdīk lutf uṭhāne se murād yah hai ki din ke vaqt khul kar aish kareṅ. vah dāġ aur dhabbe haiṅ jo āp kī ziyāfatoṅ meṅ sharīk ho kar apnī daġābāziyoṅ kī raṅgraliyāṅ manāte haiṅ. ¹⁴un kī āṅkheṅ har vaqt kisī badkār aurat se zinā karne kī talāsh meṅ rahatī haiṅ aur gunāh karne se kabhī nahīṅ ruktīṅ. vah kamzor logoṅ ko ġalat kām karne ke liye uksāte aur lālach karne meṅ māhir haiṅ. un par allāh kī lānat! ¹⁵vah sahīh rāh se haṭ kar āvārā phir rahe aur bal’ām bin baor ke naqsh-e-qadam par chal rahe haiṅ, kyūṅki bal’ām ne paisoṅ ke lālach meṅ ġalat kām kiyā. ¹⁶lekin gadhī ne use is gunāh ke sabab se ḍāṅṭā. is jānvar ne jo bolne ke qābil nahīṅ thā insān kī sī āvāz meṅ bāt kī aur nabī ko us kī dīvāngī se rok diyā.

¹⁷yah log sūkhe hue chashme aur āṅdhī se dhakele hue bādal haiṅ. in kī taqdīr aṅdhere kā tārīktarīn hissā hai. ¹⁸yah maġrūr bāteṅ karte haiṅ jin ke pīchhe kuchh nahīṅ hai aur ġair’aḵẖlāqī jismānī shahavatoṅ se aise logoṅ ko uksāte haiṅ jo hāl hī meṅ dhoke kī zindagī guzārne vāloṅ meṅ se bach nikle haiṅ. ¹⁹yah unheṅ āzād karne kā vādā karte haiṅ jabki ḵẖud badkārī ke ġulām haiṅ. kyūṅki insān usī kā ġulām hai jo us par ġālib ā gayā hai. ²⁰aur jo hamāre ḵẖudāvand aur najātadihandā īsā masīh ko jān lene se is duniyā kī ālūdgī se bach nikalte haiṅ, lekin bād meṅ ek bār phir is meṅ phaṅs kar maġlūb ho jāte haiṅ un kā anjām pahale kī nisbat ziyādā burā ho jātā hai. ²¹hāṅ, jin logoṅ ne rāstbāzī kī rāh ko jān liyā, lekin bād meṅ us muqaddas hukm se muṅh pher liyā jo un ke havāle kiyā gayā thā, un ke liye behatar hotā ki vah is rāh se kabhī vāqif na hote. ²²un par yah muhāvarā sādiq ātā hai ki “kuttā apnī qai ke pās vāpas ā jātā hai.” aur yah bhī ki “sūaranī nahāne ke bād dubārā kīchaṛ meṅ loṭne lagtī hai.”