2 Patras 1
1yah ḵẖat īsā masīh ke ḵẖādim aur rasūl shamāūn patras kī taraf se hai.
maiṅ un sab ko likh rahā hūṅ jinheṅ hamāre ḵẖudā aur najātadihandā īsā masīh kī rāstbāzī ke vasīle se vahī beshaqīmat īmān baḵẖshā gayā hai jo hameṅ bhī milā.
2ḵẖudā kare ki āp use aur hamāre ḵẖudāvand īsā ko jānne meṅ taraqqī karte karte kasrat se fazl aur salāmatī pāte jāeṅ.
allāh kā bulāvā
3allāh ne apnī ilāhī qudrat se hameṅ vah sab kuchh atā kiyā hai jo ḵẖudātaras zindagī guzārne ke liye zarūrī hai. aur hameṅ yah use jān lene se hāsil huā hai. kyūṅki us ne hameṅ apne zātī jalāl aur qudrat ke zarīe bulāyā hai. 4is jalāl aur qudrat se us ne hameṅ vah azīm aur beshaqīmat chīzeṅ dī haiṅ jin kā vādā us ne kiyā thā. kyūṅki vah chāhatā thā ki āp in se duniyā kī burī ḵẖwāhishāt se paidā hone vāle fasād se bach kar us kī ilāhī zāt meṅ sharīk ho jāeṅ. 5yah sab kuchh pesh-e-nazar rakh kar pūrī lagan se koshish kareṅ ki āp ke īmān se aḵẖlāq paidā ho jāe, aḵẖlāq se ilm, 6ilm se zabt-e-nafs, zabt-e-nafs se sābitqadmī, sābitqadmī se ḵẖudātaras zindagī, 7ḵẖudātaras zindagī se barādrānā shafqat aur barādrānā shafqat se sab ke liye muhabbat. 8kyūṅki jitnā hī āp in ḵẖūbiyoṅ meṅ baṛhte jāeṅge utnā hī yah āp ko is se mahfūz rakheṅgī ki āp hamāre ḵẖudāvand īsā masīh ko jānne meṅ sust aur bephal raheṅ. 9lekin jis meṅ yah khūbiyāṅ nahīṅ haiṅ us kī nazar itnī kamzor hai ki vah aṅdhā hai. vah bhūl gayā hai ki use us ke guzre gunāhoṅ se pāk-sāf kiyā gayā hai.
10chunāṅche bhāiyo, mazīd lagan se apne bulāve aur chunāo kī tasdīq karne meṅ koshāṅ raheṅ. kyūṅki yah karne se āp gir jāne se bacheṅge 11aur allāh baṛī ḵẖushī se āp ko hamāre ḵẖudāvand aur najātadihandā īsā masīh kī bādshāhī meṅ dāḵẖil hone kī ijāzat degā.
12is liye maiṅ hameshā āp ko in bātoṅ kī yād dilātā rahūṅgā, hālāṅki āp in se vāqif haiṅ aur mazbūtī se us sacchāī par qāim haiṅ jo āp ko milī hai. 13balki maiṅ apnā farz samajhtā hūṅ ki jitnī aur der maiṅ jism kī is jhoṁpṛī meṅ rahatā hūṅ āp ko in bātoṅ kī yād dilāne se ubhārtā rahūṅ. 14kyūṅki mujhe mālūm hai ki ab merī yah jhoṁpṛī jald hī ḍhā dī jāegī. hamāre ḵẖudāvand īsā masīh ne bhī mujh par yah zāhir kiyā thā. 15lekin maiṅ pūrī koshish karūṅgā ki mere kūch kar jāne ke bād bhī āp har vaqt in bātoṅ ko yād rakh sakeṅ.
masīh ke jalāl ke gavāh
16kyūṅki jab ham ne āp ko apne aur āp ke ḵẖudāvand masīh kī qudrat aur āmad ke bāre meṅ batāyā to ham chālākī se ghaṛe qisse-kahāniyoṅ par inhisār nahīṅ kar rahe the balki ham ne yah gavāhoṅ kī haisiyat se batāyā. kyūṅki ham ne apnī hī āṅkhoṅ se us kī azmat dekhī thī. 17ham maujūd the jab use ḵẖudā bāp se izzat-o-jalāl milā, jab ek āvāz ne allāh kī purjalāl shān se ā kar kahā, “yah merā piyārā farzand hai jis se maiṅ ḵẖush hūṅ.” 18jab ham us ke sāth muqaddas pahāṛ par the to ham ne ḵẖud yah āvāz āsmān se ātī sunī.
19is tajribe kī binā par hamārā nabiyoṅ ke paiġām par etimād ziyādā mazbūt hai. āp acchhā kareṅge agar is par ḵẖūb dhyān deṅ. kyūṅki yah kisī tārīk jagah meṅ raushnī kī mānind hai jo us vaqt tak chamaktī rahegī jab tak pau phaṭ kar subah kā sitārā āp ke diloṅ meṅ tulū na ho jāe. 20sab se baṛh kar āp ko yah samajhne kī zarūrat hai ki kalām-e-muqaddas kī koī bhī peshgoī nabī kī apnī hī tafsīr se paidā nahīṅ hotī. 21kyūṅki koī bhī peshgoī kabhī bhī insān kī taharīk se vujūd meṅ nahīṅ āī balki peshgoī karte vaqt insānoṅ ne rūh-ul-quds se taharīk pā kar allāh kī taraf se bāt kī.