2 Kurinthiyoṅ 9

maqaddasīn kī madad

¹asal meṅ is kī zarūrat nahīṅ ki maiṅ āp ko us kām ke bāre meṅ likhūṅ jo hameṅ yahūdiyā ke muqaddasīn kī ḵẖidmat meṅ karnā hai. ²kyūṅki maiṅ āp kī garmajoshī jāntā hūṅ, aur maiṅ makiduniyā ke īmāndāroṅ ke sāmne āp par faḵẖar kartā rahā hūṅ ki “aḵẖyā ke log pichhle sāl se dene ke liye tayyār the.” yūṅ āp kī sargarmī ne ziyādātar logoṅ ko ḵẖud dene ke liye ubhārā. ³ab maiṅ ne in bhāiyoṅ ko bhej diyā hai tāki hamārā āp par faḵẖar bebunyād na nikle balki jis tarah maiṅ ne kahā thā āp tayyār raheṅ. ⁴aisā na ho ki jab maiṅ makiduniyā ke kuchh bhāiyoṅ ko sāth le kar āp ke pās pahuṅchūṅgā to āp tayyār na hūṅ. us vaqt maiṅ, balki āp bhī sharmindā hoṅge ki maiṅ ne āp par itnā etimād kiyā hai. ⁵is liye maiṅ ne is bāt par zor denā zarūrī samjhā ki bhāī pahale hī āp ke pās ā kar us hadie kā intizām kareṅ jis kā vādā āp ne kiyā hai. kyūṅki maiṅ chāhatā hūṅ ki mere āne tak yah hadiyā jamā kiyā gayā ho aur aisā na lage jaisā ise mushkil se āp se nikālnā paṛā. is ke bajāy āp kī saḵẖāvat zāhir ho jāe.

⁶yād rahe ki jo shaḵẖs bīj ko bachā bachā kar botā hai us kī fasal bhī utnī kam hogī. lekin jo bahut bīj botā hai us kī fasal bhī bahut ziyādā hogī. ⁷har ek utnā de jitnā dene ke liye us ne pahale apne dil meṅ ṭhaharā liyā hai. vah is meṅ taklīf yā majbūrī mahsūs na kare, kyūṅki allāh us se muhabbat rakhtā hai jo ḵẖushī se detā hai. ⁸aur allāh is qābil hai ki āp ko āp kī zarūriyāt se kahīṅ ziyādā de. phir āp ke pās har vaqt aur har lihāz se kāfī hogā balki itnā ziyādā ki āp har qism kā nek kām kar sakeṅge. ⁹chunāṅche kalām-e-muqaddas meṅ yah bhī likhā hai, “us ne fayyāzī se zarūratmandoṅ meṅ ḵẖairāt bikher dī, us kī rāstbāzī hameshā tak qāim rahegī.” ¹⁰ḵẖudā hī bīj bone vāle ko bīj muhayyā kartā aur use khāne ke liye roṭī detā hai. aur vah āp ko bhī bīj de kar us meṅ izāfā karegā aur āp kī rāstbāzī kī fasal ugne degā. ¹¹hāṅ, vah āp ko har lihāz se daulatmand banā degā aur āp har mauqe par fayyāzī se de sakeṅge. chunāṅche jab ham āp kā hadiyā un ke pās le jāeṅge jo zarūratmand haiṅ to vah ḵẖudā kā shukr kareṅge. ¹²yūṅ āp na sirf muqaddasīn kī zarūriyāt pūrī kareṅge balki vah āp kī is ḵẖidmat se itne mut’assir ho jāeṅge ki vah baṛe josh se ḵẖudā kā bhī shukriyā adā kareṅge. ¹³āp kī ḵẖidmat ke natīje meṅ vah allāh ko jalāl deṅge. kyūṅki āp kī un par aur tamām īmāndāroṅ par saḵẖāvat kā izhār sābit karegā ki āp masīh kī ḵẖushḵẖabarī na sirf taslīm karte haiṅ balki us ke tābe bhī rahate haiṅ. ¹⁴aur jab vah āp ke liye duā kareṅge to āp ke ārzūmand raheṅge, is liye ki allāh ne āp ko kitnā baṛā fazl de diyā hai. ¹⁵allāh kā us kī nāqābil-e-bayān baḵẖshish ke liye shukr ho