2 Kurinthiyoṅ 7

¹mere azīzo, yah tamām vāde ham se kie gae haiṅ. is liye āeṅ, ham apne āp ko har us chīz se pāk-sāf kareṅ jo jism aur rūh ko ālūdā kar detī hai. aur ham ḵẖudā ke ḵẖauf meṅ mukammal taur par muqaddas banne ke liye koshāṅ raheṅ.

paulus kī ḵẖushī

²hameṅ apne dil meṅ jagah deṅ. na ham ne kisī se nāinsāfī kī, na kisī ko bigāṛā yā us se ġalat fāidā uṭhāyā. ³maiṅ yah bāt āp ko mujrim ṭhaharāne ke liye nahīṅ kah rahā. maiṅ āp ko pahale batā chukā hūṅ ki āp hameṅ itne azīz haiṅ ki ham āp ke sāth marne aur jīne ke liye tayyār haiṅ. ⁴is liye maiṅ āp se khul kar bāt kartā hūṅ aur maiṅ āp par baṛā faḵẖar bhī kartā hūṅ. is nāte se mujhe pūrī tasallī hai, aur hamārī tamām musībatoṅ ke bāvujūd merī ḵẖushī kī intihā nahīṅ.

⁵kyūṅki jab ham makiduniyā pahuṅche to ham jism ke lihāz se ārām na kar sake. musībatoṅ ne hameṅ har taraf se gher liyā. dūsroṅ kī taraf se jhagṛoṅ se aur dil meṅ tarah tarah ke ḍar se nipaṭnā paṛā. ⁶lekin allāh ne jo dabe huoṅ ko tasallī baḵẖshtā hai titus ke āne se hamārī hausalāafzāī kī. ⁷hamārā hauslā na sirf us ke āne se baṛh gayā balki un hausalāafzā bātoṅ se bhī jin se āp ne use tasallī dī. us ne hameṅ āp kī ārzū, āp kī āh-o-zārī aur mere liye āp kī sargarmī ke bāre meṅ riporṭ dī. yah sun kar merī ḵẖushī mazīd baṛh gaī.

⁸kyūṅki agarchi maiṅ ne āp ko apne ḵẖat se dukh pahuṅchāyā to bhī maiṅ pachhtātā nahīṅ. pahale to maiṅ ḵẖat likhne se pachhtāyā, lekin ab maiṅ dekhtā hūṅ ki jo dukh us ne āp ko pahuṅchāyā vah sirf ārizī thā ⁹aur us ne āp ko taubā tak pahuṅchāyā. yah sun kar maiṅ ab ḵẖushī manātā hūṅ, is liye nahīṅ ki āp ko dukh uṭhānā paṛā hai balki is liye ki is dukh ne āp ko taubā tak pahuṅchāyā. allāh ne yah dukh apnī marzī pūrī karāne ke liye istemāl kiyā, is liye āp ko hamārī taraf se koī nuqsān na pahuṅchā. ¹⁰kyūṅki jo dukh allāh apnī marzī pūrī karāne ke liye istemāl kartā hai us se taubā paidā hotī hai aur us kā anjām najāt hai. is meṅ pachhtāne kī gunjāish hī nahīṅ. is ke bar’aks duniyāvī dukh kā anjām maut hai. ¹¹āp ḵẖud dekheṅ ki allāh ke is dukh ne āp meṅ kyā paidā kiyā hai : kitnī sanjīdgī, apnā difā karne kā kitnā josh, ġalat harkatoṅ par kitnā ġussā, kitnā ḵẖauf, kitnī chāhat, kitnī sargarmī. āp sazā dene ke liye kitne tayyār the! āp ne har lihāz se sābit kiyā hai ki āp is muāmale meṅ bequsūr haiṅ.

¹²ġaraz, agarchi maiṅ ne āp ko likhā, lekin maqsad yah nahīṅ thā ki ġalat harkateṅ karne vāle ke bāre meṅ likhūṅ yā us ke bāre meṅ jis ke sāth ġalat kām kiyā gayā. nahīṅ, maqsad yah thā ki allāh ke huzūr āp par zāhir ho jāe ki āp hamāre liye kitne sargarm haiṅ. ¹³yahī vajah hai ki hamārā hauslā baṛh gayā hai.

lekin na sirf hamārī hausalāafzāī huī hai balki ham yah dekh kar beintihā ḵẖush hue ki titus kitnā ḵẖush thā. vah kyūṅ ḵẖush thā? is liye ki us kī rūh āp sab se tar-o-tāzā huī. ¹⁴us ke sāmne maiṅ ne āp par faḵẖar kiyā thā, aur maiṅ sharmindā nahīṅ huā kyūṅki yah bāt durust sābit huī hai. jis tarah ham ne āp ko hameshā sacchī bāteṅ batāī haiṅ usī tarah titus ke sāmne āp par hamārā faḵẖar bhī durust niklā. ¹⁵āp use nihāyat azīz haiṅ kyūṅki vah āp sab kī faramāṁbardārī yād kartā hai, ki āp ne ḍarte aur kāṁpte hue use ḵẖush’āmadīd kahā. ¹⁶maiṅ ḵẖush hūṅ ki maiṅ har lihāz se āp par etimād kar saktā hūṅ.