2 Kurinthiyoṅ 4
miṭṭī ke bartanoṅ meṅ ruhānī ḵẖazānā
1pas chūṅki hameṅ allāh ke raham se yah ḵẖidmat sauṁpī gaī hai is liye ham bedil nahīṅ ho jāte. 2ham ne chhupī huī sharmanāk bāteṅ mustarad kar dī haiṅ. na ham chālākī se kām karte, na allāh ke kalām meṅ taharīf karte haiṅ. balki hameṅ apnī sifārish kī zarūrat bhī nahīṅ, kyūṅki jab ham allāh ke huzūr logoṅ par haqīqat ko zāhir karte haiṅ to hamārī neknāmī ḵẖud-ba-ḵẖud har ek ke zamīr par zāhir ho jātī hai. 3aur agar hamārī ḵẖushḵẖabarī niqāb tale chhupī huī bhī ho to vah sirf un ke liye chhupī huī hai jo halāk ho rahe haiṅ. 4is jahān ke sharīr ḵẖudā ne un ke zahanoṅ ko aṅdhā kar diyā hai jo īmān nahīṅ rakhte. is liye vah allāh kī ḵẖushḵẖabarī kī jalālī raushnī nahīṅ dekh sakte. vah yah paiġām nahīṅ samajh sakte jo masīh ke jalāl ke bāre meṅ hai, us ke bāre meṅ jo allāh kī sūrat hai. 5kyūṅki ham apnā parchār nahīṅ karte balki īsā masīh kā paiġām sunāte haiṅ ki vah ḵẖudāvand hai. apne āp ko ham īsā kī ḵẖātir āp ke ḵẖādim qarār dete haiṅ. 6kyūṅki jis ḵẖudā ne farmāyā, “aṅdhere meṅ se raushnī chamke,” us ne hamāre diloṅ meṅ apnī raushnī chamakne dī tāki ham allāh kā vah jalāl jān leṅ jo īsā masīh ke chihare se chamaktā hai.
7lekin ham jin ke andar yah ḵẖazānā hai ām miṭṭī ke bartanoṅ kī mānind haiṅ tāki zāhir ho ki yah zabardast quvvat hamārī taraf se nahīṅ balki allāh kī taraf se hai. 8log hameṅ chāroṅ taraf se dabāte haiṅ, lekin koī hameṅ kuchal kar ḵẖatm nahīṅ kar saktā. ham uljhan meṅ paṛ jāte haiṅ, lekin ummīd kā dāman hāth se jāne nahīṅ dete. 9log hameṅ īzā dete haiṅ, lekin hameṅ akelā nahīṅ chhoṛā jātā. logoṅ ke dhakkoṅ se ham zamīn par gir jāte haiṅ, lekin ham tabāh nahīṅ hote. 10har vaqt ham apne badan meṅ īsā kī maut liye phirte haiṅ tāki īsā kī zindagī bhī hamāre badan meṅ zāhir ho jāe. 11kyūṅki har vaqt hameṅ zindā hālat meṅ īsā kī ḵẖātir maut ke havāle kar diyā jātā hai tāki us kī zindagī hamāre fānī badan meṅ zāhir ho jāe. 12yūṅ ham meṅ maut kā asar kām kartā hai jabki āp meṅ zindagī kā asar.
13kalām-e-muqaddas meṅ likhā hai, “maiṅ īmān lāyā aur is liye bolā.” hameṅ īmān kā yahī rūh hāsil hai is liye ham bhī īmān lāne kī vajah se bolte haiṅ. 14kyūṅki ham jānte haiṅ ki jis ne ḵẖudāvand īsā ko murdoṅ meṅ se zindā kar diyā hai vah īsā ke sāth hameṅ bhī zindā karke āp logoṅ samet apne huzūr khaṛā karegā. 15yah sab kuchh āp ke fāide ke liye hai. yūṅ allāh kā fazl āge baṛhte baṛhte mazīd bahut se logoṅ tak pahuṅch rahā hai aur natīje meṅ vah allāh ko jalāl de kar shukrguzārī kī duāoṅ meṅ bahut izāfā kar rahe haiṅ.
īmān kī zindagī
16isī vajah se ham bedil nahīṅ ho jāte. beshak zāhirī taur par ham ḵẖatm ho rahe haiṅ, lekin andar hī andar roz-ba-roz hamārī tajdīd hotī jā rahī hai. 17kyūṅki hamārī maujūdā musībat halkī aur pal bhar kī hai, aur vah hamāre liye ek aisā abdī jalāl paidā kar rahī hai jis kī nisbat maujūdā musībat kuchh bhī nahīṅ. 18is liye ham dekhī huī chīzoṅ par ġaur nahīṅ karte balki andekhī chīzoṅ par. kyūṅki dekhī huī chīzeṅ ārizī haiṅ, jabki andekhī chīzeṅ abdī haiṅ.