2 Kurinthiyoṅ 3
nae ahd ke ḵẖādim
1kyā ham dubārā apnī ḵẖūbiyoṅ kā ḍhaṅḍorā pīṭ rahe haiṅ? yā kyā ham bāz logoṅ kī mānind haiṅ jinheṅ āp ko sifārishī ḵẖat dene yā āp se aise ḵẖat likhvāne kī zarūrat hotī hai? 2nahīṅ, āp to ḵẖud hamārā ḵẖat haiṅ jo hamāre diloṅ par likhā huā hai. sab ise pahachān aur paṛh sakte haiṅ. 3yah sāf zāhir hai ki āp masīh kā ḵẖat haiṅ jo us ne hamārī ḵẖidmat ke zarīe likh diyā hai. aur yah ḵẖat siyāhī se nahīṅ balki zindā ḵẖudā ke rūh se likhā gayā, patthar kī taḵẖtiyoṅ par nahīṅ balki insānī diloṅ par.
4ham yah is liye yaqīn se kah sakte haiṅ kyūṅki ham masīh ke vasīle se allāh par etimād rakhte haiṅ. 5hamāre andar to kuchh nahīṅ hai jis kī binā par ham dāvā kar sakte ki ham yah kām karne ke lāiq haiṅ. nahīṅ, hamārī liyāqat allāh kī taraf se hai. 6usī ne hameṅ nae ahd ke ḵẖādim hone ke lāiq banā diyā hai. aur yah ahd likhī huī sharīat par mabnī nahīṅ hai balki rūh par, kyūṅki likhī huī sharīat ke asar se ham mar jāte haiṅ jabki rūh hameṅ zindā kar detā hai.
7sharīat ke hurūf patthar kī taḵẖtiyoṅ par kandā kie gae aur jab use diyā gayā to allāh kā jalāl zāhir huā. yah jalāl itnā tez thā ki isrāīlī mūsā ke chihare ko lagātār dekh na sake. agar us chīz kā jalāl itnā tez thā jo ab mansūḵẖ hai 8to kyā rūh ke nizām kā jalāl is se kahīṅ ziyādā nahīṅ hogā? 9agar purānā nizām jo hameṅ mujrim ṭhaharātā thā jalālī thā to phir nayā nizām jo hameṅ rāstbāz qarār detā hai kahīṅ ziyādā jalālī hogā. 10hāṅ, pahale nizām kā jalāl nae nizām ke zabardast jalāl kī nisbat kuchh bhī nahīṅ hai. 11aur agar us purāne nizām kā jalāl bahut thā jo ab mansūḵẖ hai to phir us nae nizām kā jalāl kahīṅ ziyādā hogā jo qāim rahegā.
12pas chūṅki ham aisī ummīd rakhte haiṅ is liye baṛī dilerī se ḵẖidmat karte haiṅ. 13ham mūsā kī mānind nahīṅ haiṅ jis ne sharīat sunāne ke iḵẖtitām par apne chihare par niqāb ḍāl liyā tāki isrāīlī use takte na raheṅ jo ab mansūḵẖ hai. 14to bhī vah zahanī taur par aṛ gae, kyūṅki āj tak jab purāne ahdanāme kī tilāvat kī jātī hai to yahī niqāb qāim hai. āj tak niqāb ko haṭāyā nahīṅ gayā kyūṅki yah ahd sirf masīh meṅ mansūḵẖ hotā hai. 15hāṅ, āj tak jab mūsā kī sharīat paṛhī jātī hai to yah niqāb un ke diloṅ par paṛā rahatā hai. 16lekin jab bhī koī ḵẖudāvand kī taraf rujū kartā hai to yah niqāb haṭāyā jātā hai, 17kyūṅki ḵẖudāvand rūh hai aur jahāṅ ḵẖudāvand kā rūh hai vahāṅ āzādī hai. 18chunāṅche ham sab jin ke chiharoṅ se niqāb haṭāyā gayā hai ḵẖudāvand kā jalāl mun’akis karte aur qadam-ba-qadam jalāl pāte hue masīh kī sūrat meṅ badalte jāte haiṅ. yah ḵẖudāvand hī kā kām hai jo rūh hai.