2 Kurinthiyoṅ 2

¹chunāṅche maiṅ ne faislā kiyā ki maiṅ dubārā āp ke pās nahīṅ āūṅgā, varnā āp ko bahut ġam khānā paṛegā. ²kyūṅki agar maiṅ āp ko dukh pahuṅchāūṅ to kaun mujhe ḵẖush karegā? yah vah shaḵẖs nahīṅ karegā jise maiṅ ne dukh pahuṅchāyā hai. ³yahī vajah hai ki maiṅ ne āp ko yah likh diyā. maiṅ nahīṅ chāhatā thā ki āp ke pās ā kar un hī logoṅ se ġam khāūṅ jinheṅ mujhe ḵẖush karnā chāhie. kyūṅki mujhe āp sab ke bāre meṅ yaqīn hai ki merī ḵẖushī āp sab kī ḵẖushī hai. ⁴maiṅ ne āp ko nihāyat raṅjīdā aur pareshān hālat meṅ āṅsū bahā bahā kar likh diyā. maqsad yah nahīṅ thā ki āp ġamgīn ho jāeṅ balki maiṅ chāhatā thā ki āp jān leṅ ki maiṅ āp se kitnī gaharī muhabbat rakhtā hūṅ.

mujrim ko muāf kar diyā jāe

⁵agar kisī ne dukh pahuṅchāyā hai to mujhe nahīṅ balki kisī hadd tak āp sab ko (maiṅ ziyādā saḵẖtī se bāt nahīṅ karnā chāhatā). ⁶lekin mazkūrā shaḵẖs ke liye yah kāfī hai ki use jamāat ke aksar logoṅ ne sazā dī hai. ⁷ab zarūrī hai ki āp use muāf karke tasallī deṅ, varnā vah ġam khā khā kar tabāh ho jāegā. ⁸chunāṅche maiṅ is par zor denā chāhatā hūṅ ki āp use apnī muhabbat kā ihsās dilāeṅ. ⁹maiṅ ne yah mālūm karne ke liye āp ko likhā ki kyā āp imtihān meṅ pūre utareṅge aur har bāt meṅ tābe raheṅge. ¹⁰jise āp kuchh muāf karte haiṅ use maiṅ bhī muāf kartā hūṅ. aur jo kuchh maiṅ ne muāf kiyā, agar mujhe kuchh muāf karne kī zarūrat thī, vah maiṅ ne āp kī ḵẖātir masīh ke huzūr muāf kiyā hai ¹¹tāki iblīs ham se fāidā na uṭhāe. kyūṅki ham us kī chāloṅ se ḵẖūb vāqif haiṅ.

troās meṅ paulus kī pareshānī

¹²jab maiṅ masīh kī ḵẖushḵẖabarī sunāne ke liye troās gayā to ḵẖudāvand ne mere liye āge ḵẖidmat karne kā ek darvāzā khol diyā. ¹³lekin jab mujhe apnā bhāī titus vahāṅ na milā to maiṅ bechain ho gayā aur unheṅ ḵẖairbād kah kar sūbā makiduniyā chalā gayā.

masīh meṅ fatah

¹⁴lekin ḵẖudā kā shukr hai! vahī hamāre āge āge chaltā hai aur ham masīh ke qaidī ban kar us kī fatah manāte hue us ke pīchhe pīchhe chalte haiṅ. yūṅ allāh hamāre vasīle se har jagah masīh ke bāre meṅ ilm ḵẖushbū kī tarah phailātā hai. ¹⁵kyūṅki ham masīh kī ḵẖushbū haiṅ jo allāh tak pahuṅchtī hai aur sāth sāth logoṅ meṅ bhī phailtī hai, najāt pāne vāloṅ meṅ bhī aur halāk hone vāloṅ meṅ bhī. ¹⁶bāz logoṅ ke liye ham maut kī muhalak bū haiṅ jabki bāz ke liye ham zindagībaḵẖsh ḵẖushbū haiṅ. to kaun yah zimmādārī nibhāne ke lāiq hai? ¹⁷kyūṅki ham aksar logoṅ kī tarah allāh ke kalām kī tijārat nahīṅ karte, balki yah jān kar ki ham allāh ke huzūr meṅ haiṅ aur us ke bheje hue haiṅ ham ḵẖulūsdilī se logoṅ se bāt karte haiṅ.