2 Kurinthiyoṅ 12

paulus par kaī bātoṅ kā inkishāf

¹lāzim hai ki maiṅ kuchh aur faḵẖar karūṅ. agarchi is kā koī fāidā nahīṅ, lekin ab maiṅ un royāoṅ aur inkishāfāt kā zikr karūṅgā jo ḵẖudāvand ne mujh par zāhir kie. ²maiṅ masīh meṅ ek ādmī ko jāntā hūṅ jise chaudah sāl hue chhīn kar tīsre āsmān tak pahuṅchāyā gayā. mujhe nahīṅ patā ki use yah tajribā jism meṅ yā is ke bāhar huā. ḵẖudā jāntā hai. ³hāṅ, ḵẖudā hī jāntā hai ki vah jism meṅ thā yā nahīṅ. lekin yah maiṅ jāntā hūṅ ⁴ki use chhīn kar firdaus meṅ lāyā gayā jahāṅ us ne nāqābil-e-bayān bāteṅ sunīṅ, aisī bāteṅ jin kā zikr karnā insān ke liye ravā nahīṅ. ⁵is qism ke ādmī par maiṅ faḵẖar karūṅgā, lekin apne āp par nahīṅ. maiṅ sirf un bātoṅ par faḵẖar karūṅgā jo merī kamzor hālat ko zāhir kartī haiṅ. ⁶agar maiṅ faḵẖar karnā chāhatā to is meṅ ahamaq na hotā, kyūṅki maiṅ haqīqat bayān kartā. lekin maiṅ yah nahīṅ karūṅgā, kyūṅki maiṅ chāhatā hūṅ ki sab kī mere bāre meṅ rāy sirf us par munhasir ho jo maiṅ kartā yā bayān kartā hūṅ. koī mujhe is se ziyādā na samjhe.

⁷lekin mujhe in ālā inkishāfāt kī vajah se ek kāṅṭā chubho diyā gayā, ek taklīfdih chīz jo mere jism meṅ dhaṅsī rahatī hai tāki maiṅ phūl na jāūṅ. iblīs kā yah paiġambar mere mukke mārtā rahatā hai tāki maiṅ maġrūr na ho jāūṅ. ⁸tīn bār maiṅ ne ḵẖudāvand se iltijā kī ki vah ise mujh se dūr kare. ⁹lekin us ne mujhe yahī javāb diyā, “merā fazl tere liye kāfī hai, kyūṅki merī qudrat kā pūrā izhār terī kamzor hālat hī meṅ hotā hai.” is liye maiṅ mazīd ḵẖushī se apnī kamzoriyoṅ par faḵẖar karūṅgā tāki masīh kī qudrat mujh par ṭhaharī rahe. ¹⁰yahī vajah hai ki maiṅ masīh kī ḵẖātir kamzoriyoṅ, gāliyoṅ, majbūriyoṅ, īzārasāniyoṅ aur pareshāniyoṅ meṅ ḵẖush hūṅ, kyūṅki jab maiṅ kamzor hotā hūṅ tab hī maiṅ tāqatvar hotā hūṅ.

paulus kī kurinthiyoṅ ke liye fikr

¹¹maiṅ bevuqūf ban gayā hūṅ, lekin āp ne mujhe majbūr kar diyā hai. chāhie thā ki āp hī dūsroṅ ke sāmne mere haq meṅ bāt karte. kyūṅki beshak maiṅ kuchh bhī nahīṅ hūṅ, lekin in nām-nihād ḵẖās rasūloṅ ke muqāble meṅ maiṅ kisī bhī lihāz se kam nahīṅ hūṅ. ¹²jo mut’addid ilāhī nishān, mojize aur zabardast kām mere vasīle se hue vah sābit karte haiṅ ki maiṅ rasūl hūṅ. hāṅ, vah baṛī sābitqadmī se āp ke darmiyān kie gae. ¹³jo ḵẖidmat maiṅ ne āp ke darmiyān kī, kyā vah ḵẖudā kī dīgar jamāatoṅ meṅ merī ḵẖidmat kī nisbat kam thī? hargiz nahīṅ! is meṅ farq sirf yah thā ki maiṅ āp ke liye mālī bojh na banā. mujhe muāf kareṅ agar mujh se is meṅ ġaltī huī hai.

¹⁴ab maiṅ tīsrī bār āp ke pās āne ke liye tayyār hūṅ. is martabā bhī maiṅ āp ke liye bojh kā bāis nahīṅ banūṅgā, kyūṅki maiṅ āp kā māl nahīṅ balki āp hī ko chāhatā hūṅ. āḵẖir bacchoṅ ko māṅ-bāp kī madad ke liye māl jamā nahīṅ karnā chāhie balki māṅ-bāp ko bacchoṅ ke liye. ¹⁵maiṅ to baṛī ḵẖushī se āp ke liye har ḵẖarchā uṭhā lūṅgā balki apne āp ko bhī ḵẖarch kar dūṅgā. kyā āp mujhe kam piyār kareṅge agar maiṅ āp se ziyādā muhabbat rakhūṅ?

¹⁶ṭhīk hai, maiṅ āp ke liye bojh na banā. lekin bāz sochte haiṅ ki maiṅ chālāk hūṅ aur āp ko dhoke se apne jāl meṅ phaṅsā liyā. ¹⁷kis tarah? jin logoṅ ko maiṅ ne āp ke pās bhejā kyā maiṅ ne un meṅ se kisī ke zarīe āp se ġalat fāidā uṭhāyā? ¹⁸maiṅ ne titus kī hausalāafzāī kī ki vah āp ke pās jāe aur dūsre bhāī ko bhī sāth bhej diyā. kyā titus ne āp se ġalat fāidā uṭhāyā? hargiz nahīṅ! kyūṅki ham donoṅ ek hī rūh meṅ ek hī rāh par chalte haiṅ.

¹⁹āp kāfī der se soch rahe hoṅge ki ham āp ke sāmne apnā difā kar rahe haiṅ. lekin aisā nahīṅ hai balki ham masīh meṅ hote hue allāh ke huzūr hī yah kuchh bayān kar rahe haiṅ. aur mere azīzo, jo kuchh bhī ham karte haiṅ ham āp kī tāmīr karne ke liye karte haiṅ. ²⁰mujhe ḍar hai ki jab maiṅ āūṅgā to na āp kī hālat mujhe pasand āegī, na merī hālat āp ko. mujhe ḍar hai ki āp meṅ jhagṛā, hasad, ġussā, ḵẖudġarzī, buhtān, gapbājī, ġarūr aur betartībī pāī jāegī. ²¹hāṅ, mujhe ḍar hai ki aglī dafā jab āūṅgā to allāh mujhe āp ke sāmne nīchā dikhāegā, aur maiṅ un bahutoṅ ke liye ġam khāūṅgā jinhoṅ ne māzī meṅ gunāh karke ab tak apnī nāpākī, zinākārī aur ayyāshī se taubā nahīṅ kī.