1 Tīmuthiyus 3
ḵẖudā kī jamāat ke nigrān
1yah bāt yaqīnī hai ki jo jamāat kā nigrān bannā chāhatā hai vah ek acchhī zimmādārī kī ārzū rakhtā hai. 2lāzim hai ki nigrān beilzām ho. us kī ek hī bīvī ho. vah hoshmand, samajhdār [a] yūnānī lafz meṅ zabt-e-nafs kā unsur bhī pāyā jātā hai. , sharīf, mehamān-navāz aur tālīm dene ke qābil ho. 3vah sharābī na ho, na laṛākā balki narmdil aur amnapasand. vah paisoṅ kā lālach karne vālā na ho. 4lāzim hai ki vah apne ḵẖāndān ko acchhī tarah saṁbhāl sake aur ki us ke bacche sharāfat ke sāth us kī bāt māneṅ. 5kyūṅki agar vah apnā ḵẖāndān na saṁbhāl sake to vah kis tarah allāh kī jamāat kī dekh-bhāl kar sakegā? 6vah naumurīd na ho varnā ḵẖatrā hai ki vah phūl kar iblīs ke jāl meṅ ulajh jāe aur yūṅ us kī adālat kī jāe. 7lāzim hai ki jamāat se bāhar ke log us kī acchhī gavāhī de sakeṅ, aisā na ho ki vah badnām ho kar iblīs ke phaṅde meṅ phaṅs jāe.
jamāat ke madadgār
8isī tarah jamāat ke madadgār bhī sharīf hoṅ. vah riyākār na hoṅ, na hadd se ziyādā mai pieṅ. vah lālchī bhī na hoṅ. 9lāzim hai ki vah sāf zamīr rakh kar īmān kī pur’asrār sacchāiyāṅ mahfūz rakheṅ. 10yah bhī zarūrī hai ki unheṅ pahale parkhā jāe. agar vah is ke bād beilzām nikleṅ to phir vah ḵẖidmat kareṅ. 11un kī bīviyāṅ bhī sharīf hoṅ. vah buhtān lagāne vālī na hoṅ balki hoshmand aur har bāt meṅ vafādār. 12madadgār kī ek hī bīvī ho. lāzim hai ki vah apne bacchoṅ aur ḵẖāndān ko acchhī tarah saṁbhāl sake. 13jo madadgār acchhī tarah apnī ḵẖidmat saṁbhālte haiṅ un kī haisiyat baṛh jāegī aur masīh īsā par un kā īmān itnā puḵẖtā ho jāegā ki vah baṛe etimād ke sāth zindagī guzār sakeṅge.
ek azīm bhed
14agarchi maiṅ jald āp ke pās āne kī ummīd rakhtā hūṅ to bhī āp ko yah ḵẖat likh rahā hūṅ. 15lekin agar der bhī lage to yah paṛh kar āp ko mālūm hogā ki allāh ke gharāne meṅ hamārā bartāo kaisā honā chāhie. allāh kā gharānā kyā hai? zindā ḵẖudā kī jamāat, jo sacchāī kā satūn aur bunyād hai. 16yaqīnan hamāre īmān kā bhed azīm hai.
vah jism meṅ zāhir huā,
rūh meṅ rāstbāz ṭhaharā
aur farishtoṅ ko dikhāī diyā.
us kī ġairyahūdiyoṅ meṅ munādī kī gaī,
us par duniyā meṅ īmān lāyā gayā
aur use āsmān ke jalāl meṅ uṭhā liyā gayā.