1 Tīmuthiyus 2

jamāat kī parastish

¹pahale maiṅ is par zor denā chāhatā hūṅ ki āp sab ke liye daraḵẖwāsteṅ, duāeṅ, siphārisheṅ aur shukraguzāriyāṅ pesh kareṅ, ²bādshāhoṅ aur iḵẖtiyār vāloṅ ke liye bhī tāki ham ārām aur sukūn se ḵẖudātaras aur sharīf zindagī guzār sakeṅ. ³yah acchhā aur hamāre najātadihandā allāh ko pasandīdā hai. ⁴hāṅ, vah chāhatā hai ki tamām insān najāt pā kar sacchāī ko jān leṅ. ⁵kyūṅki ek hī ḵẖudā hai aur allāh aur insān ke bīch meṅ ek hī darmiyānī hai yānī masīh īsā, vah insān ⁶jis ne apne āp ko fidyā ke taur par sab ke liye de diyā tāki vah maḵẖlsī pāeṅ. yūṅ us ne muqarrarā vaqt par gavāhī dī ⁷aur yah gavāhī sunāne ke liye mujhe munād, rasūl aur ġairyahūdiyoṅ kā ustād muqarrar kiyā tāki unheṅ īmān aur sacchāī kā paiġām sunāūṅ. maiṅ jhūṭ nahīṅ bol rahā balki sacch kah rahā hūṅ.

⁸ab maiṅ chāhatā hūṅ ki har maqāmī jamāat ke mard muqaddas hāth uṭhā kar duā kareṅ. vah ġusse yā bahs-mubāhasā kī hālat meṅ aisā na kareṅ. ⁹isī tarah maiṅ chāhatā hūṅ ki ḵẖavātīn munāsib kapṛe pahan kar sharāfat aur shāistagī se apne āp ko ārāstā kareṅ. vah guṅdhe hue bāl, sonā, motī yā hadd se ziyādā mahaṅge kapṛoṅ se apne āp ko ārāstā na kareṅ ¹⁰balki nek kāmoṅ se. kyūṅki yahī aisī ḵẖavātīn ke liye munāsib hai jo ḵẖudātaras hone kā dāvā kartī haiṅ. ¹¹ḵẖātūn ḵẖāmoshī se aur pūrī faramāṁbardārī ke sāth sīkhe. ¹²maiṅ ḵẖavātīn ko tālīm dene yā ādmiyoṅ par hukūmat karne kī ijāzat nahīṅ detā. vah ḵẖāmosh raheṅ. ¹³kyūṅki pahale ādam ko tashkīl diyā gayā, phir havvā ko. ¹⁴aur ādam ne iblīs se dhokā na khāyā balki havvā ne, jis kā natījā gunāh thā. ¹⁵lekin ḵẖavātīn bacche janm dene se najāt pāeṅgī. shart yah hai ki vah samajh ke sāth īmān, muhabbat aur muqaddas hālat meṅ zindagī guzārtī raheṅ.