1 Tīmuthiyus 1
1yah ḵẖat paulus kī taraf se hai jo hamāre najātadihandā allāh aur hamārī ummīd masīh īsā ke hukm par masīh īsā kā rasūl hai.
2maiṅ tīmuthiyus ko likh rahā hūṅ jo īmān meṅ merā sacchā beṭā hai.
ḵẖudā bāp aur hamārā ḵẖudāvand masīh īsā āp ko fazl, raham aur salāmatī atā kareṅ.
ġalat tālīm se ḵẖabardār
3maiṅ ne āp ko makiduniyā jāte vaqt nasīhat kī thī ki ifisus meṅ raheṅ tāki āp vahāṅ ke kuchh logoṅ ko ġalat tālīm dene se rokeṅ. 4unheṅ farzī kahāniyoṅ aur ḵẖatm na hone vāle nasbanāme ke pīchhe na lagne deṅ. in se mahaz bahs-mubāhasā paidā hotā hai aur allāh kā najātabaḵẖsh mansūbā pūrā nahīṅ hotā. kyūṅki yah mansūbā sirf īmān se takmīl tak pahuṅchtā hai. 5merī is hidāyat kā maqsad yah hai ki muhabbat ubhar āe, aisī muhabbat jo ḵẖālis dil, sāf zamīr aur beriyā īmān se paidā hotī hai. 6kuchh log in chīzoṅ se bhaṭak kar bemānī bātoṅ meṅ gum ho gae haiṅ. 7yah sharīat ke ustād bannā chāhate haiṅ, lekin unheṅ un bātoṅ kī samajh nahīṅ ātī jo vah kar rahe haiṅ aur jin par vah itne etimād se isrār kar rahe haiṅ.
8lekin ham to jānte haiṅ ki sharīat acchhī hai bashartīki ise sahīh taur par istemāl kiyā jāe. 9aur yād rahe ki yah rāstbāzoṅ ke liye nahīṅ dī gaī. kyūṅki yah un ke liye hai jo baġair sharīat ke aur sarkash zindagī guzārte haiṅ, jo bedīn aur gunāhgār haiṅ, jo muqaddas aur ruhānī bātoṅ se ḵẖālī haiṅ, jo apne māṅ-bāp ke qātil haiṅ, jo ḵẖūnī, 10zinākār, hamjinsparast aur ġulāmoṅ ke tājir haiṅ, jo jhūṭ bolte, jhūṭī qasam khāte aur mazīd bahut kuchh karte haiṅ jo sehatabaḵẖsh tālīm ke ḵẖilāf hai. 11aur sehatabaḵẖsh tālīm kyā hai? vah jo mubārak ḵẖudā kī us jalālī ḵẖushḵẖabarī meṅ pāī jātī hai jo mere sapurd kī gaī hai.
allāh ke raham ke liye shukrguzārī
12maiṅ apne ḵẖudāvand masīh īsā kā shukr kartā hūṅ jis ne merī taqviyat kī hai. maiṅ us kā shukr kartā hūṅ ki us ne mujhe vafādār samajh kar ḵẖidmat ke liye muqarrar kiyā. 13go maiṅ pahale kufr bakne vālā aur gustāḵẖ ādmī thā, jo logoṅ ko īzā detā thā, lekin allāh ne mujh par raham kiyā. kyūṅki us vaqt maiṅ īmān nahīṅ lāyā thā aur is liye nahīṅ jāntā thā ki kyā kar rahā hūṅ. 14hāṅ, hamāre ḵẖudāvand ne mujh par apnā fazl kasrat se uṅḍel diyā aur mujhe vah īmān aur muhabbat atā kī jo hameṅ masīh īsā meṅ hote hue miltī hai. 15ham is qābil-e-qabūl bāt par pūrā bharosā rakh sakte haiṅ ki masīh īsā gunāhgāroṅ ko najāt dene ke liye is duniyā meṅ āyā. un meṅ se maiṅ sab se baṛā gunāhgār hūṅ, 16lekin yahī vajah hai ki allāh ne mujh par raham kiyā. kyūṅki vah chāhatā thā ki masīh īsā mujh meṅ jo avval gunāhgār hūṅ apnā vasī sabr zāhir kare aur maiṅ yūṅ un ke liye namūnā ban jāūṅ jo us par īmān lā kar abdī zindagī pāne vāle haiṅ. 17hāṅ, hamāre azlī-o-abdī shahanshāh kī hameshā tak izzat-o-jalāl ho! vahī lāfānī, andekhā aur vāhid ḵẖudā hai. āmīn.
18tīmuthiyus mere beṭe, maiṅ āp ko yah hidāyat un peshgoiyoṅ ke mutābiq detā hūṅ jo pahale āp ke bāre meṅ kī gaī thīṅ. kyūṅki maiṅ chāhatā hūṅ ki āp in kī pairvī karke acchhī tarah laṛ sakeṅ 19aur īmān aur sāf zamīr ke sāth zindagī guzār sakeṅ. kyūṅki bāz ne yah bāteṅ radd kar dī haiṅ aur natīje meṅ un ke īmān kā beṛā ġarq ho gayā. 20huminyus aur sikandar bhī in meṅ shāmil haiṅ. ab maiṅ ne inheṅ iblīs ke havāle kar diyā hai tāki vah kufr bakne se bāz ānā sīkheṅ.