1 Thissalunīkiyoṅ 5
ḵẖudāvand kī āmad ke liye tayyār rahanā
1bhāiyo, is kī zarūrat nahīṅ ki ham āp ko likheṅ ki yah sab kuchh kab aur kis mauqe par hogā. 2kyūṅki āp ḵẖud ḵẖūb jānte haiṅ ki ḵẖudāvand kā din yūṅ āegā jis tarah chor rāt ke vaqt ghar meṅ ghus ātā hai. 3jab log kaheṅge, “ab amn-o-amān hai,” to halākat achānak hī un par ān paṛegī. vah is tarah musībat meṅ paṛ jāeṅge jis tarah vah aurat jis kā bacchā paidā ho rahā hai. vah hargiz nahīṅ bach sakeṅge. 4lekin āp bhāiyo tārīkī kī girift meṅ nahīṅ haiṅ, is liye yah din chor kī tarah āp par ġālib nahīṅ ānā chāhie. 5kyūṅki āp sab raushnī aur din ke farzand haiṅ. hamārā rāt yā tārīkī se koī vāstā nahīṅ. 6ġaraz āeṅ, ham dūsroṅ kī mānind na hoṅ jo soe hue haiṅ balki jāgte raheṅ, hoshmand raheṅ. 7kyūṅki rāt ke vaqt hī log so jāte haiṅ, rāt ke vaqt hī log nashe meṅ dhut ho jāte haiṅ. 8lekin chūṅki ham din ke haiṅ is liye āeṅ ham hosh meṅ raheṅ. lāzim hai ki ham īmān aur muhabbat ko zirābaktar ke taur par aur najāt kī ummīd ko ḵẖod ke taur par pahan leṅ. 9kyūṅki allāh ne hameṅ is liye nahīṅ chunā ki ham par apnā ġazab nāzil kare balki is liye ki ham apne ḵẖudāvand īsā masīh ke vasīle se najāt pāeṅ. 10us ne hamārī ḵẖātir apnī jān de dī tāki ham us ke sāth jieṅ, ḵẖwāh ham us kī āmad ke din murdā hoṅ yā zindā. 11is liye ek dūsre kī hausalāafzāī aur tāmīr karte raheṅ, jaisā ki āp kar bhī rahe haiṅ.
āḵẖirī hidāyāt aur salām
12bhāiyo, hamārī daraḵẖwāst hai ki āp un kī qadar kareṅ jo āp ke darmiyān saḵẖt mehanat karke ḵẖudāvand meṅ āp kī rāhanumāī aur hidāyat karte haiṅ. 13un kī ḵẖidmat ko sāmne rakh kar piyār se un kī baṛī izzat kareṅ. aur ek dūsre ke sāth mel-milāp se zindagī guzāreṅ.
14bhāiyo, ham is par zor denā chāhate haiṅ ki unheṅ samjhāeṅ jo beqāidā zindagī guzārte haiṅ, unheṅ tasallī deṅ jo jaldī se māyūs ho jāte haiṅ, kamzoroṅ kā ḵẖayāl rakheṅ aur sab ko sabr se bardāsht kareṅ. 15is par dhyān deṅ ki koī kisī se burāī ke badle burāī na kare balki āp har vaqt ek dūsre aur tamām logoṅ ke sāth nek kām karne meṅ lage raheṅ.
16har vaqt ḵẖush raheṅ, 17bilānāġā duā kareṅ, 18aur har hālat meṅ ḵẖudā kā shukr kareṅ. kyūṅki jab āp masīh meṅ haiṅ to allāh yahī kuchh āp se chāhatā hai.
19rūh-ul-quds ko mat bujhāeṅ. 20nubuvvatoṅ kī tahqīr na kareṅ. 21sab kuchh parakh kar vah thāme rakheṅ jo acchhā hai, 22aur har qism kī burāī se bāz raheṅ.
23allāh ḵẖud jo salāmatī kā ḵẖudā hai āp ko pūre taur par maḵẖsūs-o-muqaddas kare. vah kare ki āp pūre taur par rūh, jān aur badan samet us vaqt tak mahfūz aur beilzām raheṅ jab tak hamārā ḵẖudāvand īsā masīh vāpas nahīṅ ā jātā. 24jo āp ko bulātā hai vah vafādār hai aur vah aisā karegā bhī.
25bhāiyo, hamāre liye duā kareṅ.
26tamām bhāiyoṅ ko hamārī taraf se bosā denā.
27ḵẖudāvand ke huzūr maiṅ āp ko tākīd kartā hūṅ ki yah ḵẖat tamām bhāiyoṅ ke sāmne paṛhā jāe.
28hamāre ḵẖudāvand īsā masīh kā fazl āp ke sāth hotā rahe.