1 Patras 4

tabdīlashudā zindagiyāṅ

¹ab chūṅki masīh ne jismānī taur par dukh uṭhāyā is liye āp bhī apne āp ko us kī sī soch se les kareṅ. kyūṅki jis ne masīh kī ḵẖātir jismānī taur par dukh sah liyā hai us ne gunāh se nipaṭ liyā hai. ²natīje meṅ vah zamīn par apnī bāqī zindagī insān kī burī ḵẖwāhishāt pūrī karne meṅ nahīṅ guzāregā balki allāh kī marzī pūrī karne meṅ. ³māzī meṅ āp ne kāfī vaqt vah kuchh karne meṅ guzārā jo ġairīmāndār pasand karte haiṅ yānī ayyāshī, shahavatparastī, nashābāzī, sharābnoshī, raṅgraliyoṅ, nāch-raṅg aur ghinaunī butparastī meṅ. ⁴ab āp ke ġairīmāndār dost tājjub karte haiṅ ki āp un ke sāth mil kar ayyāshī ke is tez dhāre meṅ chhalāṅg nahīṅ lagāte. is liye vah āp par kufr bakte haiṅ. ⁵lekin unheṅ allāh ko javāb denā paṛegā jo zindoṅ aur murdoṅ kī adālat karne ke liye tayyār khaṛā hai. ⁶yahī vajah hai ki allāh kī ḵẖushḵẖabarī unheṅ bhī sunāī gaī jo ab murdā haiṅ. maqsad yah thā ki vah allāh ke sāmne rūh meṅ zindagī guzār sakeṅ agarchi insānī lihāz se un ke jism kī adālat kī gaī hai.

apnī nemtoṅ se ek dūsre kī ḵẖidmat kareṅ

⁷tamām chīzoṅ kā ḵẖātmā qarīb ā gayā hai. chunāṅche duā karne ke liye chust aur hoshmand raheṅ. ⁸sab se zarūrī bāt yah hai ki āp ek dūsre se lagātār muhabbat rakheṅ, kyūṅki muhabbat gunāhoṅ kī baṛī tādād par pardā ḍāl detī hai. ⁹buṛabuṛāe baġair ek dūsre kī mehamān-navāzī kareṅ. ¹⁰allāh apnā fazl muḵẖtalif nemtoṅ se zāhir kartā hai. fazl kā yah intizām vafādārī se chalāte hue ek dūsre kī ḵẖidmat kareṅ, har ek us nemat se jo use milī hai. ¹¹agar koī bole to allāh ke se alfāz ke sāth bole. agar koī ḵẖidmat kare to us tāqat ke zarīe jo allāh use muhayyā kartā hai, kyūṅki is tarah hī allāh ko īsā masīh ke vasīle se jalāl diyā jāegā. azal se abad tak jalāl aur qudrat usī kī ho! āmīn.

āp kī musībat ġairmāmūlī nahīṅ hai

¹²azīzo, īzārasānī kī us āg par tājjub na kareṅ jo āp ko āzmāne ke liye āp par ān paṛī hai. yah mat sochnā ki mere sāth kaisī ġairmāmūlī bāt ho rahī hai. ¹³balki ḵẖushī manāeṅ ki āp masīh ke dukhoṅ meṅ sharīk ho rahe haiṅ. kyūṅki phir āp us vaqt bhī ḵẖushī manāeṅge jab masīh kā jalāl zāhir hogā. ¹⁴agar log is liye āp kī beizzatī karte haiṅ ki āp masīh ke pairokār haiṅ to āp mubārak haiṅ. kyūṅki is kā matlab hai ki allāh kā jalālī rūh āp par ṭhaharā huā hai. ¹⁵agar āp meṅ se kisī ko dukh uṭhānā paṛe to yah is liye nahīṅ honā chāhie ki āp qātil, chor, mujrim yā fasādī haiṅ. ¹⁶lekin agar āp ko masīh ke pairokār hone kī vajah se dukh uṭhānā paṛe to na sharmāeṅ balki masīh ke nām meṅ allāh kī hamd-o-sanā kareṅ.

¹⁷kyūṅki ab vaqt ā gayā hai ki allāh kī adālat shurū ho jāe, aur pahale us ke ghar vāloṅ kī adālat kī jāegī. agar aisā hai to phir is kā anjām un ke liye kyā hogā jo allāh kī ḵẖushḵẖabarī ke tābe nahīṅ haiṅ? ¹⁸aur agar rāstbāz mushkil se bacheṅge to phir bedīn aur gunāhgār kā kyā hogā? ¹⁹chunāṅche jo allāh kī marzī se dukh uṭhā rahe haiṅ vah nek kām karne se bāz na āeṅ balki apnī jānoṅ ko usī ke havāle kareṅ jo un kā vafādār ḵẖāliq hai.