1 Patras 3

bīvī aur shauhar

¹isī tarah āp bīviyoṅ ko bhī apne apne shauhar ke tābe rahanā hai. kyūṅki is tarah vah jo īmān nahīṅ rakhte apnī bīvī ke chāl-chalan se jīte jā sakte haiṅ. kuchh kahane kī zarūrat nahīṅ rahegī ²kyūṅki vah dekheṅge ki āp kitnī pākīzgī se ḵẖudā ke ḵẖauf meṅ zindagī guzārtī haiṅ. ³is kī fikr mat karnā ki āp zāhirī taur par ārāstā hoṅ, maslan khās taur-tarīqoṅ se guṅdhe hue bāloṅ se yā sone ke zevar aur shāndār libās pahanne se. ⁴is ke bajāy is kī fikr kareṅ ki āp kī bātinī shaḵẖsiyat ārāstā ho. kyūṅki jo rūh narmdilī aur sukūn ke lāfānī zevroṅ se sajī huī hai vahī allāh ke nazdīk beshaqīmat hai. ⁵māzī meṅ allāh par ummīd rakhne vālī muqaddas ḵẖavātīn bhī isī tarah apnā siṅgār kiyā kartī thīṅ. yūṅ vah apne shauharoṅ ke tābe rahīṅ, ⁶sārā kī tarah jo apne shauhar ibrāhīm ko āqā kah kar us kī māntī thī. āp to sārā kī beṭiyāṅ ban gaī haiṅ. chunāṅche nek kām kareṅ aur kisī bhī chīz se na ḍareṅ, ḵẖwāh vah kitnī hī ḍarāaunī kyūṅ na ho. ⁷is tarah lāzim hai ki āp jo shauhar haiṅ samajh ke sāth apnī bīviyoṅ ke sāth zindagī guzāreṅ, yah jān kar ki yah āp kī nisbat kamzor haiṅ. un kī izzat kareṅ, kyūṅki yah bhī āp ke sāth zindagī ke fazl kī vāris haiṅ. aisā na ho ki is meṅ beparvāī karne se āp kī duāiyā zindagī meṅ rukāvaṭ paidā ho jāe.

nek zindagī guzārne kī vajah se dukh

⁸āḵẖir meṅ ek aur bāt, āp sab ek hī soch rakheṅ aur ek dūsre se tālluqāt meṅ hamdardī, piyār, raham aur halīmī kā izhār kareṅ. ⁹kisī ke ġalat kām ke javāb meṅ ġalat kām mat karnā, na kisī kī gāliyoṅ ke javāb meṅ gālī denā. is ke bajāy javāb meṅ aise shaḵẖs ko barkat deṅ, kyūṅki allāh ne āp ko bhī is liye bulāyā hai ki āp us kī barkat virāsat meṅ pāeṅ. ¹⁰kalām-e-muqaddas yūṅ farmātā hai,

“kaun maze se zindagī guzārnā

aur acchhe din dekhnā chāhatā hai?

vah apnī zabān ko sharīr bāteṅ karne se roke

aur apne hoṅṭoṅ ko jhūṭ bolne se.

¹¹vah burāī se muṅh pher kar nek kām kare,

sulah-salāmatī kā tālib ho kar

us ke pīchhe lagā rahe.

¹²kyūṅki rabb kī āṅkheṅ rāstbāzoṅ par lagī rahatī haiṅ,

aur us ke kān un kī duāoṅ kī taraf māil haiṅ.

lekin rabb kā chiharā un ke ḵẖilāf hai jo ġalat kām karte haiṅ.”

¹³agar āp nek kām karne meṅ sargarm hoṅ to kaun āp ko nuqsān pahuṅchāegā? ¹⁴lekin agar āp ko rāst kām karne kī vajah se dukh bhī uṭhānā paṛe to āp mubārak haiṅ. un kī dhamkiyoṅ se mat ḍarnā aur mat ghabrānā ¹⁵balki apne diloṅ meṅ ḵẖudāvand masīh ko maḵẖsūs-o-muqaddas jāneṅ. aur jo bhī āp se āp kī masīh par ummīd ke bāre meṅ pūchhe har vaqt use javāb dene ke liye tayyār raheṅ. lekin narmdilī se aur ḵẖudā ke ḵẖauf ke sāth javāb deṅ. ¹⁶sāth sāth āp kā zamīr sāf ho. phir jo log āp ke masīh meṅ acchhe chāl-chalan ke bāre meṅ ġalat bāteṅ kar rahe haiṅ unheṅ apnī tuhamat par sharm āegī. ¹⁷yād rahe ki ġalat kām karne kī vajah se dukh sahane kī nisbat behatar yah hai ki ham nek kām karne kī vajah se taklīf uṭhāeṅ, bashartīki yah allāh kī marzī ho. ¹⁸kyūṅki masīh ne hamāre gunāhoṅ ko miṭāne kī ḵẖātir ek bār sadā ke liye maut sahī. hāṅ, jo rāstbāz hai us ne yah nārāstoṅ ke liye kiyā tāki āp ko allāh ke pās pahuṅchāe. use badan ke etibār se sazā-e-maut dī gaī, lekin rūh ke etibār se use zindā kar diyā gayā. ¹⁹is rūh ke zarīe us ne jā kar qaidī rūhoṅ ko paiġām diyā. ²⁰yah un kī rūheṅ thīṅ jo un dinoṅ meṅ nāframān the jab nūh apnī kashtī banā rahā thā. us vaqt allāh sabr se intizār kartā rahā, lekin āḵẖirkār sirf chand ek log yānī āṭh afrād pānī meṅ se guzar kar bach nikle. ²¹yah pānī us baptisme kī taraf ishārā hai jo is vaqt āp ko najāt dilātā hai. is se jism kī gandgī dūr nahīṅ kī jātī balki baptismā lete vaqt ham allāh se arz karte haiṅ ki vah hamārā zamīr pāk-sāf kar de. phir yah āp ko īsā masīh ke jī uṭhne se najāt dilātā hai. ²²ab masīh āsmān par jā kar allāh ke dahane hāth baiṭh gayā hai jahāṅ farishte, iḵẖtiyār vāle aur quvvateṅ us ke tābe haiṅ.