1 Yūhannā 4

haqīqī aur jhūṭī rūh

¹azīzo, har ek rūh kā yaqīn mat karnā balki rūhoṅ ko parakh kar mālūm kareṅ ki vah allāh se haiṅ yā nahīṅ, kyūṅki mut’addid jhūṭe nabī duniyā meṅ nikle haiṅ. ²is se āp allāh ke rūh ko pahachān lete haiṅ : jo bhī rūh is kā etirāf kartī hai ki īsā masīh mujassam ho kar āyā hai vah allāh se hai. ³lekin jo bhī rūh īsā ke bāre meṅ yah taslīm na kare vah allāh se nahīṅ hai. yah muḵẖālif-e-masīh kī rūh hai jis ke bāre meṅ āp ko ḵẖabar milī ki vah āne vālā hai balki is vaqt duniyā meṅ ā chukā hai.

⁴lekin āp piyāre baccho, allāh se haiṅ aur un par ġālib ā gae haiṅ. kyūṅki jo āp meṅ hai vah us se baṛā hai jo duniyā meṅ hai. ⁵yah log duniyā se haiṅ aur is liye duniyā kī bāteṅ karte haiṅ aur duniyā un kī suntī hai. ⁶ham to allāh se haiṅ aur jo allāh ko jāntā hai vah hamārī suntā hai. lekin jo allāh se nahīṅ hai vah hamārī nahīṅ suntā. yūṅ ham sacchāī kī rūh aur fareb dene vālī rūh meṅ imtiyāz kar sakte haiṅ.

allāh muhabbat hai

⁷azīzo, āeṅ ham ek dūsre se muhabbat rakheṅ. kyūṅki muhabbat allāh kī taraf se hai, aur jo muhabbat rakhtā hai vah allāh se paidā ho kar us kā farzand ban gayā hai aur allāh ko jāntā hai. ⁸jo muhabbat nahīṅ rakhtā vah allāh ko nahīṅ jāntā, kyūṅki allāh muhabbat hai. ⁹is meṅ allāh kī muhabbat hamāre darmiyān zāhir huī ki us ne apne iklaute farzand ko duniyā meṅ bhej diyā tāki ham us ke zarīe jieṅ. ¹⁰yahī muhabbat hai, yah nahīṅ ki ham ne allāh se muhabbat kī balki yah ki us ne ham se muhabbat karke apne farzand ko bhej diyā tāki vah hamāre gunāhoṅ ko miṭāne ke liye kaffārā de.

¹¹azīzo, chūṅki allāh ne hameṅ itnā piyār kiyā is liye lāzim hai ki ham bhī ek dūsre ko piyār kareṅ. ¹²kisī ne bhī allāh ko nahīṅ dekhā. lekin jab ham ek dūsre ko piyār karte haiṅ to allāh hamāre andar bastā hai aur us kī muhabbat hamāre andar takmīl pātī hai.

¹³ham kis tarah pahachān lete haiṅ ki ham us meṅ rahate heṅ aur vah ham meṅ? is tarah ki us ne hameṅ apnā rūh baḵẖsh diyā hai. ¹⁴aur ham ne yah bāt dekh lī aur is kī gavāhī dete haiṅ ki ḵẖudā bāp ne apne farzand ko duniyā kā najātadihandā banne ke liye bhej diyā hai. ¹⁵agar koī iqrār kare ki īsā allāh kā farzand hai to allāh us meṅ rahatā hai aur vah allāh meṅ. ¹⁶aur ḵẖud ham ne vah muhabbat jān lī hai aur us par īmān lāe haiṅ jo allāh ham se rakhtā hai. allāh muhabbat hī hai. jo bhī muhabbat meṅ qāim rahatā hai vah allāh meṅ rahatā hai aur allāh us meṅ. ¹⁷isī tarah muhabbat hamāre darmiyān takmīl tak pahuṅchtī hai, aur yūṅ ham adālat ke din pūre etimād ke sāth khaṛe ho sakeṅge, kyūṅki jaise vah hai vaise hī ham bhī is duniyā meṅ haiṅ. ¹⁸muhabbat meṅ ḵẖauf nahīṅ hotā balki kāmil muhabbat ḵẖauf ko bhagā detī hai, kyūṅki ḵẖauf ke pīchhe sazā kā ḍar hai. jo ḍartā hai us kī muhabbat takmīl tak nahīṅ pahuṅchī.

¹⁹ham is liye muhabbat rakhte haiṅ ki allāh ne pahale ham se muhabbat rakhī. ²⁰agar koī kahe, “maiṅ allāh se muhabbat rakhtā hūṅ” lekin apne bhāī se nafrat kare to vah jhūṭā hai. kyūṅki jo apne bhāī se jise us ne dekhā hai muhabbat nahīṅ rakhtā vah kis tarah allāh se muhabbat rakh saktā hai jise us ne nahīṅ dekhā? ²¹jo hukm masīh ne hameṅ diyā hai vah yah hai, jo allāh se muhabbat rakhtā hai vah apne bhāī se bhī muhabbat rakhe.