1 Yūhannā 1

zindagī kā kalām

¹ham āp ko us kī munādī karte haiṅ jo ibtidā se thā, jise ham ne apne kānoṅ se sunā, apnī āṅkhoṅ se dekhā, jis kā mushāhadā ham ne kiyā aur jise ham ne apne hāthoṅ se chhuā. vahī zindagī kā kalām hai. ²vah jo ḵẖud zindagī thā zāhir huā, ham ne use dekhā. aur ab ham gavāhī de kar āp ko us abdī zindagī kī munādī karte haiṅ jo ḵẖudā bāp ke pās thī aur ham par zāhir huī hai. ³ham āp ko vah kuchh sunāte haiṅ jo ham ne ḵẖud dekh aur sun liyā hai tāki āp bhī hamārī rifāqat meṅ sharīk ho jāeṅ. aur hamārī rifāqat ḵẖudā bāp aur us ke farzand īsā masīh ke sāth hai. ⁴ham yah is liye likh rahe haiṅ tāki hamārī ḵẖushī pūrī ho jāe.

allāh nūr hai

⁵jo paiġām ham ne us se sunā aur āp ko sunā rahe haiṅ vah yah hai, allāh nūr hai aur us meṅ tārīkī hai hī nahīṅ. ⁶jab ham tārīkī meṅ chalte hue allāh ke sāth rifāqat rakhne kā dāvā karte haiṅ to ham jhūṭ bol rahe aur sacchāī ke mutābiq zindagī nahīṅ guzār rahe. ⁷lekin jab ham nūr meṅ chalte haiṅ, bilkul usī tarah jis tarah allāh nūr meṅ hai, to phir ham ek dūsre ke sāth rifāqat rakhte haiṅ aur us ke farzand īsā kā ḵẖūn hameṅ tamām gunāhoṅ se pāk-sāf kar detā hai.

⁸agar ham gunāh se pāk hone kā dāvā kareṅ to ham apne āp ko fareb dete haiṅ aur ham meṅ sacchāī nahīṅ hai.

⁹lekin agar ham apne gunāhoṅ kā iqrār kareṅ to vah vafādār aur rāst sābit hogā. vah hamāre gunāhoṅ ko muāf karke hameṅ tamām nārāstī se pāk-sāf karegā. ¹⁰agar ham dāvā kareṅ ki ham ne gunāh nahīṅ kiyā to ham use jhūṭā qarār dete haiṅ aur us kā kalām hamāre andar nahīṅ hai.