1 Kurinthiyoṅ 5
zinākārī
1yah bāt hamāre kānoṅ tak pahuṅchī hai ki āp ke darmiyān zinākārī ho rahī hai, balki aisī zinākārī jise ġairyahūdī bhī ravā nahīṅ samajhte. kahate haiṅ ki āp meṅ se kisī ne apnī sautelī māṅ [a] lafzī tarjumā : bāp kī bīvī, lekin ġāliban is se murād sautelī māṅ hai. se shādī kar rakhī hai. 2kamāl hai ki āp is fel par nādim nahīṅ balki phūle phir rahe haiṅ! kyā munāsib na hotā ki āp dukh mahsūs karke is badī ke murtaqib ko apne darmiyān se ḵẖārij kar dete? 3go maiṅ jism ke lihāz se āp ke pās nahīṅ, lekin rūh ke lihāz se zarūr hūṅ. aur maiṅ us shaḵẖs par fatwā is tarah de chukā hūṅ jaise ki maiṅ āp ke darmiyān maujūd hūṅ. 4jab āp hamāre ḵẖudāvand īsā ke nām meṅ jamā hoṅge to maiṅ rūh meṅ āp ke sāth hūṅgā aur hamāre ḵẖudāvand īsā kī qudrat bhī. 5us vaqt aise shaḵẖs ko iblīs ke havāle kareṅ tāki sirf us kā jism halāk ho jāe, lekin us kī rūh ḵẖudāvand ke din rihāī pāe.
6āp kā faḵẖar karnā acchhā nahīṅ. kyā āp ko mālūm nahīṅ ki jab ham thoṛā sā ḵẖamīr tāzā guṅdhe hue āṭe meṅ milāte haiṅ to vah sāre āṭe ko ḵẖamīr kar detā hai? 7apne āp ko ḵẖamīr se pāk-sāf karke tāzā guṅdhā huā āṭā ban jāeṅ. darahaqīqat āp haiṅ bhī pāk, kyūṅki hamārā īd-e-fasah kā lelā masīh hamāre liye zabah ho chukā hai. 8is liye āie ham purāne ḵẖamīrī āṭe yānī burāī aur badī ko dūr karke tāzā guṅdhe hue āṭe yānī ḵẖulūs aur sacchāī kī roṭiyāṅ banā kar fasah kī īd manāeṅ.
9maiṅ ne ḵẖat meṅ likhā thā ki āp zinākāroṅ se tālluq na rakheṅ. 10merā matlab yah nahīṅ thā ki āp is duniyā ke zinākāroṅ se tālluq munqate kar leṅ yā is duniyā ke lālchiyoṅ, luṭeroṅ aur butparastoṅ se. agar āp aisā karte to lāzim hotā ki āp duniyā hī se kūch kar jāte. 11nahīṅ, merā matlab yah thā ki āp aise shaḵẖs se tālluq na rakheṅ jo masīh meṅ to bhāī kahalātā hai magar hai vah zinākār yā lālchī yā butparast yā gālī-galoch karne vālā yā sharābī yā luṭerā. aise shaḵẖs ke sāth khānā tak bhī na khāeṅ.
12maiṅ un logoṅ kī adālat kyūṅ kartā phirūṅ jo īmāndāroṅ kī jamāat se bāhar haiṅ? kyā āp ḵẖud bhī sirf un kī adālat nahīṅ karte jo jamāat ke andar haiṅ? 13bāhar vāloṅ kī adālat to ḵẖudā hī karegā. kalām-e-muqaddas meṅ yūṅ likhā hai, ‘sharīr ko apne darmiyān se nikāl do.’