1 Kurinthiyoṅ 4
ḵẖudāvand ke ḵẖādim aur un kā kām
1ġaraz log hameṅ masīh ke ḵẖādim samjheṅ, aise nigrān jinheṅ allāh ke bhedoṅ ko kholne kī zimmādārī dī gaī hai. 2ab nigrānoṅ kā farz yah hai ki un par pūrā etimād kiyā jā sake. 3mujhe is bāt kī ziyādā fikr nahīṅ ki āp yā koī duniyāvī adālat merā ehatisāb kare, balki maiṅ ḵẖud bhī apnā ehatisāb nahīṅ kartā. 4mujhe kisī ġaltī kā ilm nahīṅ hai agarchi yah bāt mujhe rāstbāz qarār dene ke liye kāfī nahīṅ hai. ḵẖudāvand ḵẖud merā ehatisāb kartā hai. 5is liye vaqt se pahale kisī bāt kā faislā na kareṅ. us vaqt tak intizār kareṅ jab tak ḵẖudāvand na āe. kyūṅki vahī tārīkī meṅ chhupī huī chīzoṅ ko raushnī meṅ lāegā aur diloṅ kī mansūbābandiyoṅ ko zāhir kar degā. us vaqt allāh ḵẖud har fard kī munāsib tārīf karegā.
kurinthiyoṅ kī sheḵẖībāzī
6bhāiyo, maiṅ ne in bātoṅ kā itlāq apne aur apullos par kiyā tāki āp ham par ġaur karte hue allāh ke kalām kī hudūd jān leṅ jin se tajāvuz karnā munāsib nahīṅ. phir āp phūl kar ek shaḵẖs kī himāyat karke dūsre kī muḵẖālafat nahīṅ kareṅge. 7kyūṅki kaun āp ko kisī dūsre se afzal qarār detā hai? jo kuchh āp ke pās hai kyā vah āp ko muft nahīṅ milā? aur agar muft milā to is par sheḵẖī kyūṅ mārte haiṅ goyā ki āp ne use apnī mehanat se hāsil kiyā ho?
8vāh jī vāh! āp ser ho chuke haiṅ. āp amīr ban chuke haiṅ. āp hamāre baġair bādshāh ban chuke haiṅ. kāsh āp bādshāh ban chuke hote tāki ham bhī āp ke sāth hukūmat karte! 9is ke bajāy mujhe lagtā hai ki allāh ne hamāre liye jo us ke rasūl haiṅ romī tamāshāgāh meṅ sab se nichlā darjā muqarrar kiyā hai, jo un logoṅ ke liye maḵẖsūs hotā hai jinheṅ sazā-e-maut kā faislā sunāyā gayā ho. hāṅ, ham duniyā, farishtoṅ aur insānoṅ ke sāmne tamāshā ban gae haiṅ. 10ham to masīh kī ḵẖātir bevuqūf ban gae haiṅ jabki āp masīh meṅ samajhdār ḵẖayāl kie jāte haiṅ. ham kamzor haiṅ jabki āp tāqatvar. āp kī izzat kī jātī hai jabki hamārī beizzatī. 11ab tak hameṅ bhūk aur piyās satātī hai. ham chīthṛoṅ meṅ malbūs goyā naṅge phirte haiṅ. hameṅ mukke māre jāte haiṅ. hamārī koī mustaqil rihāishgāh nahīṅ. 12aur baṛī mashaqqat se ham apne hāthoṅ se rozī kamāte haiṅ. lān-tān karne vāloṅ ko ham barkat dete haiṅ, īzā dene vāloṅ ko bardāsht karte haiṅ. 13jo hameṅ burā-bhalā kahate haiṅ unheṅ ham duā dete haiṅ. ab tak ham duniyā kā kūṛā-karkaṭ aur ġilāzat bane phirte haiṅ.
paulus kurinthiyoṅ kā ruhānī bāp hai
14maiṅ āp ko sharmindā karne ke liye yah nahīṅ likh rahā, balki apne piyāre bacche jān kar samjhāne kī ġaraz se. 15beshak masīh īsā meṅ āp ke ustād to beshumār haiṅ, lekin bāp kam haiṅ. kyūṅki masīh īsā meṅ maiṅ hī āp ko allāh kī ḵẖushḵẖabarī sunā kar āp kā bāp banā. 16ab maiṅ tākīd kartā hūṅ ki āp mere namūne par chaleṅ. 17is liye maiṅ ne tīmuthiyus ko āp ke pās bhej diyā jo ḵẖudāvand meṅ merā piyārā aur vafādār beṭā hai. vah āp ko masīh īsā meṅ merī un hidāyāt kī yād dilāegā jo maiṅ har jagah aur īmāndāroṅ kī har jamāat meṅ detā hūṅ.
18āp meṅ se bāz yūṅ phūl gae haiṅ jaise maiṅ ab āp ke pās kabhī nahīṅ āūṅgā. 19lekin agar ḵẖudāvand kī marzī huī to jald ā kar mālūm karūṅgā ki kyā yah phūle hue log sirf bāteṅ kar rahe haiṅ yā ki allāh kī qudrat un meṅ kām kar rahī hai. 20kyūṅki allāh kī bādshāhī ḵẖālī bātoṅ se zāhir nahīṅ hotī balki allāh kī qudrat se. 21kyā āp chāhate haiṅ ki maiṅ chhaṛī le kar āp ke pās āūṅ yā piyār aur halīmī kī rūh meṅ