1 Kurinthiyoṅ 2

paulus kī sādā munādī

¹bhāiyo, mujh par bhī ġaur kareṅ. jab maiṅ āp ke pās āyā to maiṅ ne āp ko allāh kā bhed moṭe moṭe alfāz meṅ yā falsafiyānā hikmat kā izhār karte hue na sunāyā. ²vajah kyā thī? yah ki maiṅ ne irādā kar rakhā thā ki āp ke darmiyān hote hue maiṅ īsā masīh ke sivā aur kuchh na jānūṅ, ḵẖāskar yah ki use maslūb kiyā gayā. ³hāṅ maiṅ kamazorahāl, ḵẖauf khāte aur bahut thartharāte hue āp ke pās āyā. ⁴aur guftagu aur munādī karte hue maiṅ ne duniyāvī hikmat ke baṛe zordār alfāz kī mārifat āp ko qāil karne kī koshish na kī, balki rūh-ul-quds aur allāh kī qudrat ne merī bātoṅ kī tasdīq kī, ⁵tāki āp kā īmān insānī hikmat par mabnī na ho balki allāh kī qudrat par.

ġalat aur sahīh dānāī

⁶dānāī kī bāteṅ ham us vaqt karte haiṅ jab kāmil īmān rakhne vāloṅ ke darmiyān hote haiṅ. lekin yah dānāī maujūdā jahān kī nahīṅ aur na is jahān ke hākimoṅ hī kī hai jo miṭne vāle haiṅ. ⁷balki ham ḵẖudā hī kī dānāī kī bāteṅ karte haiṅ jo bhed kī sūrat meṅ chhupī rahī hai. allāh ne tamām zamānoṅ se peshtar muqarrar kiyā hai ki yah dānāī hamāre jalāl kā bāis bane. ⁸is jahān ke kisī bhī hākim ne is dānāī ko na pahachānā, kyūṅki agar vah pahachān lete to phir vah hamāre jalālī ḵẖudāvand ko maslūb na karte. ⁹dānāī ke bāre meṅ pāk navishte bhī yahī kahate haiṅ,

“jo na kisī āṅkh ne dekhā, na kisī kān ne sunā,

aur na insān ke zahan meṅ āyā,

use allāh ne un ke liye tayyār kar diyā

jo us se muhabbat rakhte haiṅ.”

¹⁰lekin allāh ne yahī kuchh apne rūh kī mārifat ham par zāhir kiyā kyūṅki us kā rūh har chīz kā khoj lagātā hai, yahāṅ tak ki allāh kī gaharāiyoṅ kā bhī. ¹¹insān ke bātin se kaun vāqif hai sivā-e-insān kī rūh ke jo us ke andar hai? isī tarah allāh se tālluq rakhne vālī bātoṅ ko koī nahīṅ jāntā sivā-e-allāh ke rūh ke. ¹²aur hameṅ duniyā kī rūh nahīṅ milī balki vah rūh jo allāh kī taraf se hai tāki ham us kī atākaradā bātoṅ ko jān sakeṅ.

¹³yahī kuchh ham bayān karte haiṅ, lekin aise alfāz meṅ nahīṅ jo insānī hikmat se hameṅ sikhāyā gayā balki rūh-ul-quds se. yūṅ ham ruhānī haqīqatoṅ kī tashrīh ruhānī logoṅ ke liye karte haiṅ. ¹⁴jo shaḵẖs ruhānī nahīṅ hai vah allāh ke rūh kī bātoṅ ko qabūl nahīṅ kartā kyūṅki vah us ke nazdīk bevuqūfī haiṅ. vah unheṅ pahachān nahīṅ saktā kyūṅki un kī parakh sirf ruhānī shaḵẖs hī kar saktā hai. ¹⁵vahī har chīz parakh letā hai jabki us kī apnī parakh koī nahīṅ kar saktā. ¹⁶chunāṅche pāk kalām meṅ likhā hai,