1 Kurinthiyoṅ 12

ek rūh aur muḵẖtalif nemteṅ

¹bhāiyo, maiṅ nahīṅ chāhatā ki āp ruhānī nemtoṅ ke bāre meṅ nāvāqif raheṅ. ²āp jānte haiṅ ki īmān lāne se peshtar āp ko bār bār bahakāyā aur gūṅge butoṅ kī taraf khaiṅchā jātā thā. ³isī ke pesh-e-nazar maiṅ āp ko āgāh kartā hūṅ ki allāh ke rūh kī hidāyat se bolne vālā kabhī nahīṅ kahegā, “īsā par lānat.” aur rūh-ul-quds kī hidāyat se bolne vāle ke sivā koī nahīṅ kahegā, “īsā ḵẖudāvand hai.”

⁴go tarah tarah kī nemteṅ hotī haiṅ, lekin rūh ek hī hai. ⁵tarah tarah kī ḵẖidmateṅ hotī haiṅ, lekin ḵẖudāvand ek hī hai. ⁶allāh apnī qudrat kā izhār muḵẖtalif andāz se kartā hai, lekin ḵẖudā ek hī hai jo sab meṅ har tarah kā kām kartā hai. ⁷ham meṅ se har ek meṅ rūh-ul-quds kā izhār kisī nemat se hotā hai. yah nemteṅ is liye dī jātī haiṅ tāki ham ek dūsre kī madad kareṅ. ⁸ek ko rūh-ul-quds hikmat kā kalām atā kartā hai, dūsre ko vahī rūh ilm-o-irfān kā kalām. ⁹tīsre ko vahī rūh puḵẖtā īmān detā hai aur chauthe ko vahī ek rūh shifā dene kī nemteṅ. ¹⁰vah ek ko mojize karne kī tāqat detā hai, dūsre ko nubuvvat karne kī salāhiyat aur tīsre ko muḵẖtalif rūhoṅ meṅ imtiyāz karne kī nemat. ek ko us se ġairzabāneṅ bolne kī nemat miltī hai aur dūsre ko in kā tarjumā karne kī. ¹¹vahī ek rūh yah tamām nemteṅ taqsīm kartā hai. aur vahī faislā kartā hai ki kis ko kyā nemat milnī hai.

ek jism aur muḵẖtalif āzā

¹²insānī jism ke bahut se āzā hote haiṅ, lekin yah tamām āzā ek hī badan ko tashkīl dete haiṅ. masīh kā badan bhī aisā hai. ¹³ḵẖwāh ham yahūdī the yā yūnānī, ġulām the yā āzād, baptisme se ham sab ko ek hī rūh kī mārifat ek hī badan meṅ shāmil kiyā gayā hai, ham sab ko ek hī rūh pilāyā gayā hai.

¹⁴badan ke bahut se hisse hote haiṅ, na sirf ek. ¹⁵farz kareṅ ki pāoṅ kahe, “maiṅ hāth nahīṅ hūṅ is liye badan kā hissā nahīṅ.” kyā yah kahane par us kā badan se tālluq ḵẖatm ho jāegā? ¹⁶yā farz kareṅ ki kān kahe, “maiṅ āṅkh nahīṅ hūṅ is liye badan kā hissā nahīṅ.” kyā yah kahane par us kā badan se nātā ṭūṭ jāegā? ¹⁷agar pūrā jism āṅkh hī hotā to phir sunne kī salāhiyat kahāṅ hotī? agar sārā badan kān hī hotā to phir sūṅghne kā kyā bantā? ¹⁸lekin allāh ne jism ke muḵẖtalif āzā banā kar har ek ko vahāṅ lagāyā jahāṅ vah chāhatā thā. ¹⁹agar ek hī uzv pūrā jism hotā to phir yah kis qism kā jism hotā? ²⁰nahīṅ, bahut se āzā hote haiṅ, lekin jism ek hī hai.

²¹āṅkh hāth se nahīṅ kah saktī, “mujhe terī zarūrat nahīṅ,” na sar pāoṅ se kah saktā hai, “mujhe tumhārī zarūrat nahīṅ.” ²²balki agar dekhā jāe to aksar aisā hotā hai ki jism ke jo āzā ziyādā kamzor lagte haiṅ un kī ziyādā zarūrat hotī hai. ²³vah āzā jinheṅ ham kam izzat ke lāiq samajhte haiṅ unheṅ ham ziyādā izzat ke sāth ḍhāṁp lete haiṅ, aur vah āzā jinheṅ ham sharm se chhupā kar rakhte haiṅ un hī kā ham ziyādā ehatirām karte haiṅ. ²⁴is ke bar’aks hamāre izzatdār āzā ko is kī zarūrat hī nahīṅ hotī ki ham un kā ḵẖās ehatirām kareṅ. lekin allāh ne jism ko is tarah tartīb diyā ki us ne kamaqdar āzā ko ziyādā izzatdār ṭhaharāyā, ²⁵tāki jism ke āzā meṅ tafriqā na ho balki vah ek dūsre kī fikr kareṅ. ²⁶agar ek uzv dukh meṅ ho to us ke sāth dīgar tamām āzā bhī dukh mahsūs karte haiṅ. agar ek uzv sarfarāz ho jāe to us ke sāth bāqī tamām āzā bhī masrūr hote haiṅ.

²⁷āp sab mil kar masīh kā badan haiṅ aur infirādī taur par us ke muḵẖtalif āzā. ²⁸aur allāh ne apnī jamāat meṅ pahale rasūl, dūsre nabī aur tīsre ustād muqarrar kie haiṅ. phir us ne aise log bhī muqarrar kie haiṅ jo mojize karte, shifā dete, dūsroṅ kī madad karte, intizām chalāte aur muḵẖtalif qism kī ġairzabāneṅ bolte haiṅ. ²⁹kyā sab rasūl haiṅ? kyā sab nabī haiṅ? kyā sab ustād haiṅ? kyā sab mojize karte haiṅ? ³⁰kyā sab ko shifā dene kī nemteṅ hāsil haiṅ? kyā sab ġairzabāneṅ bolte haiṅ? kyā sab in kā tarjumā karte haiṅ? ³¹lekin āp un nemtoṅ kī talāsh meṅ raheṅ jo afzal haiṅ.

ab maiṅ āp ko is se kahīṅ umdā rāh batātā hūṅ.